Daanela 1 - ጌሻ ማፃፋ

ዳነልነ እያ ላገት ባብሎነን

¹ ይሁዳ ካዎይ እዮአቄም ካዎትዳ ሄን ላይን ባብሎነ ካዎይ ናቡካዳናፆር የሩሳላመ ካታማ ቦላ ደንድ ካታማ ተቅስ።

² ጎዳይ ይሁዳ ካዋ እዮአከመነ ፆሳ ኬን ደእያ ሚሸታፐ ባጋ፥ እያ ኩሸን አድ እሚስ። እ ሄ ሚሸታ ሳናኦራ ቢታን ደእያ ባ ኤቃ ፆሳታ ኬ ኤፍድ፥ ሚሸ ምንጅያ ኬን ዎስ።

³ ካዎይ፥ አስፋናዛ ጌተትያ ባ ኦሳንቾታ ሀላቃ ሀይሳዳ ያግድ ኪትስ፦ “እስራኤለ አሳ ግዶፈ ካዎ ኮቸ ግድዳይሳታነ ግታ አሳታ ኮቸ ግድዳይሳታ ዶራ።

⁴ ዶረታና ናአተት፥ ቦረይ ባይናይሳታ፥ ማላ ሎኦታ፥ ትምርተ ኤለስድ ኤካናዉ ዳንዳኤይሳታ፥ አኬካንቾታ፥ ኤራተ ኩምዳይሳታነ ካዎ ጋን ኦናዉ ዳንዳኤይሳታ ግዳናዉ በሴስ። ኤንታ ባብሎነ ዶናነ ፃፎ ታማርሳ” ያግስ።

⁵ ኤንቲ ማና ካነ ኡያና ዎይነ ኡሻ ካዋ ካፈነ ኡሻፈ ጋላስ ጋላስ እማና መላ ካዎይ ኪትስ። ሄ ላይ ሎህዳፐ ጉየ ካዋ ስን ሺቅድ ኦሶ ዶማና መላ ቆፋ ኩይስ።

⁶ ዶረትዳይሳታ ግዶፈ ይሁዳ ኮቸ ግድዳ ዳነላ፥ አናና፥ ምሳኤላነ አዛራ ጌተተይሳት ደኦሶና።

⁷ ካዋ ኦሳንቾታ ሀላቃይ ኤንታ ሱን ላምድ፥ ዳነላ ብልፃሶራ፥ አናና ስድራቃ፥ ምሳኤላ ምሳቃ፥ አዛራ አብዳናጎ ግድ ሱንስ።

⁸ ዳነል ካዋ ካ ምድነ ዎይነ ኡሻ ኡይድ፥ ባና ቱንሶና መላ ባ ዎዛናን ቆፋ ቃችድ፥ ሄ ቆፋ ኤካናዳ፥ ካዋ ኦሳንቾታ ሀላቃ ዎስስ።

⁹ ፆሳይ፥ ኦሳንቾታ ሀላቃ ስንን ዳነላስ ሳባነ ቃ እሚስ።

¹⁰ ግዶሽን፥ ኦሳንቾታ ሀላቃይ ዳነላኮ፥ “ህንተዉ ሀ ካነ ኡሻ ኪትዳ ታ ጎዳ፥ ካዋ ያያይስ። ህንተ ላገ ግድዳ ናአተታ ሶምኡዋፈ ህንተ ሶምኦይ ግልቅድ በንትኮ፥ ህንተ ጋሶን ካዎይ ታና ዎና” ያግስ።

¹¹ ኦሳንቾታ ሀላቃይ ሹምን ዳነላ፥ አናና፥ ምሳኤላነ አዛራ ናግያ አድያኮ፥ ዳነል ሀይሳዳ ያግስ፦

¹² “ማናዉ ኑስ አታክልተ፥ ኡያናዉ ሃ ፃላላ እማዳ፥ ኑና ነ አይለታ ታሙ ጋላስ ፓጫ።

¹³ ያታዳ፥ ኑ ሶምኡዋነ ካዎ ካ ምያ ናአተታ ሶምኡዋ ፄላዳ፥ ኑና ነ አይለታ ነዉ በንትዳይሳዳ ኦ” ያግስ።

¹⁴ እ፥ ሄሳ ኤክድ ታሙ ጋላስ ኤንታ ፓጭስ።

¹⁵ ታሙ ጋላሳፐ ጉየ፥ ካዋ ካ ምዳ ናአተታ ኡባፈ ኤንታ ሶምኦይ ጪይን፥ ሞድ በንትዶሶና።

¹⁶ እ፥ ኤንታዉ ጊግዳ ካነ ዎይነ ኡሻ ድግድ አታክልተ እሚስ።

¹⁷ ሀ ኦይዱ ናአተታስ ፆሳይ ኤራነ ኡባ ቆሞ ፁፈነ ትምርተ ኤክያ አኬካ እሚስ። ዳነል ቆንጨነ አሙሆ ብርሸ ኤሬስ።

¹⁸ ካዎይ፥ ናአተት ባኮ ገላናዳ ኪትዳ ዎደይ ጋክን፥ ኦሳንቾታ ሀላቃይ ኤንታ ናቡካዳናፆራ ስን ኤህስ።

¹⁹ ካዎይ፥ ኤንታ ኦድስያ ዎደ ዳነላ፥ አናና፥ ምሳኤላነ አዛራ መላ አስ ኤንታ ግዶን በንትቤና። ያትን፥ ኤንቲ ካዋስ ኦናዉ ገልዶሶና።

²⁰ ካዎይ ኤንታ ኦይችዳ አይ ጭንጫተነ አኬካ ኦይሻን፥ እያ ካዎተን ደእያ ማሮታፐነ ብታንቾታፐ ኤንቲ ታሙ ኩሸ አድ በንትዶሶና።

²¹ ዳነል፥ ካዎይ ቅሮስ ካዎትዳ ኮይሮ ላይ ጋካናዉ ጋምእስ።