Astiro 7 - ጌሻ ማፃፋ

ሃም ካቀትስ

¹ ካዎይነ ሃም አስትር ግብራ ማናዉ ብዶሶና።

² ሄ ናምአን ጋላስ ግብራስ ብድ፥ ኤንቲ ዎይነ ኡሻ ኡይሽን፥ ካዎይ፥ “ካወ አስትረ፥ ኔኒ ዎስያባይ አይቤ? ታኒ ነዉ እማና። ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታኒ ነ ኦይሻ ፖላና” ያግድ ኦይችስ።

³ ካውያ አስትራ ዛራዳ፥ “ካዋዉ፥ ኔኒ ታናን ኡፋይትዳባ ግድኮ፥ ቃስ ታ ኦይሻካ ፖላናዉ ዶስያባ ግድኮ፥ ታ ዎሳይነ ታ ኦይሻይ ታነ ታ አሳይ ሀይቆና አታና መላሳ።

⁴ ታነ ታ አሳይ እሶይካ አቶና ኡባይ ሀይቆስ ባይዘትዳ። ኑኒ ባይዘትዳይ ማጫ አይለነ አደ አይለ ግድድ ደአናሳ ግድያኮ፥ ታኒ ስእ ጋና። ሄሳ መላ መቶይ ካዋ ዋይሳናዉ በሲያባ ግደና” ያጋሱ።

⁵ ካዎይ አርፀክስስ ዛሪድ፥ “ሄሳ ኦናዉ ፃልታምዳይ ኦኔ? እ ሄ አደይ አዉን ደኢ?” ያግድ ካውዉ አስትሮ ኦይችስ።

⁶ አስትራ፥ “ኑ ሞርከይ፥ ኑና ይሳናዉ ኮየይ፥ ሀ ኢታ አድያ ሃማ” ያጋሱ። ሄ ዎደ ሃም ካዋ ስንንነ ካወ ስንን ዳሮ ዳጋምስ።

⁷ ካዎይ ዳሮ ሀንቀትድ፥ ባ ኡትዳ በሳፈ ደንድ፥ ካዎ ጋ አታክልተ በሳ ብስ። ሽን ሃም ካዎይ እያ ቦላ ኢታባ ኤሀናዉ ቆፕዳይሳ ኤርዳ ግሾ፥ አስትራ እያ ሀይቆፐ አሻና መላ ዎሳናዉ ጉየ አትስ።

⁸ ካዎይ አታክልተ በሳፈ ስሚድ ገልያ ዎደ፥ ሃም ካዊዉ አስትሮ ማሮታ ዎሳናዉ፥ እያ ኡትዳ አርሳ ቦላ ጉፋንዳይሳ በእስ። ካዎይ ይሎ ኤፅድ፥ ባ ቃላ ቁ ኦድ፥ “ላ ሀ አደይ ሀይሳን ካዎ ኬን፥ ታ ስንን፥ ካውዉ ካዉሻናዉ ኮይዬ?” ያግስ። ካዎይ ቡሮ ሄሳ ሃሳይሽን፥ ካዎ ሹፋት ይድ፥ ሃማ ሶምኡዋ ጎዝዶሶና።

⁹ ኤንታፈ እሶይ፥ ሀርቦና ጌተትያ ሹፋይ፥ “ካዋዉ፥ ሃም ነና ሀይቆፐ አሽዳ ማርድክዮሳ ካቃናዉ ኤስዳ እሻታሙ ዋ ም እያ ሶን ደኤስ” ያግስ። ካዎይ ዛሪድ፥ “ሃማ ኤፍድ፥ ሄ ምን ካቅተ” ያግድ ኪትስ።

¹⁰ ሄሳ ግሾ፥ ማርድክዮሳ ካቃና ግድ ጊግስዳ ምን ሃም ካቀትስ። ሄሳፈ ጉየ፥ ካዋ ሀንቆይ ዶችስ።