Astiro 6 - ጌሻ ማፃፋ

ማርድክዮስ ቦንቸትስ

¹ ሄ ዎደ ቃማ ካዋ ስኮይ ኤኮና እፅስ። ሄሳ ግሾ፥ ካዎይ ካዎ ታርከ ፃፍያ ማፃፋ ኤህድ፥ ካሰ ሀንዳ ታርከታ እያዉ ናባባና መላ ኪትስ።

² ናባበትዳ ታርከታፐ እሶይ ማርድክዮስ ኦዳባ። ሄስካ፥ ካዎይ ደእያ ክፍልያ ናግያ፥ ጋባታነ ታራ ጌተትያ ናምኡ ሹፋት ካዋ ዎናዉ ማቅዳ ማቁዋ ማርድክዮስ ቆንጭስስ።

³ ካዎይ፥ “ያትን፥ እ ሄሳ ኦዳ ግሾ እያዉ እመትዳ ሹማተይ ዎይኮ ዎይቶይ አይቤ?” ያግስ። ካዋ አይለት ዛሪድ፥ “እያዉ አይኮይ ኦሰትቤና” ያግዶሶና።

⁴ ካዎይ ዛሪድ፥ “ካረ ዳባባን ደኤይ ኦኔ?” ያግስ። ሄ ዎደ ባ ጊግስዳ ምን ማርድክዮሳ ካቃናዉ፥ ካዋ ኦይቻናዉ፥ ሃም ካረ ዳባባ ገልሸ ደኤስ።

⁵ ካዋ አይለት፥ “ሃም ካረ ዳባባን ኤቅስ” ያግዶሶና። ካዎይ ዛሪድ፥ “ሃ ገላ ጊተ” ያግስ።

⁶ ሃም ገልዳፐ ጉየ ካዎይ፥ “ካዎይ ቦንቻናዉ ዶስያ አሳስ አይ ኦናዉ ኮሺ?” ያግድ ኦይችስ። ሃም፥ “ካዎይ ታፐ ሀራ ኦና ቦንቻናዉ ዶሲ?” ያግድ ባ ዎዛናን ቆፕስ።

⁷ ሄሳ ግሾ፥ ሃም ካዋስ ያግድ ዛርስ፤ “ካዎይ ቦንቻናዉ ዶስያ አሳስ፥

⁸ ካዎይ ባ ካዎተ ማኡዋ ኤህሶ፤ ባ ቶግያ ፓራ ሁጰን ጉቸ ዎ።

⁹ ሄሳፈ ጉየ፥ ካዎይ ባ ሞርናታፐ እስ ዳሮ ቦንቸትዳይሳ ፄግስድ፥ ካዎተ ማኦ እያ ማይዛናዳነ ካዋ ፓራ ቦላ እያ ኡትስድ፥ ካታማ ዳባባ ከሳናዳ ኪቶ። ያትኮ ሄ ዳሮ ቦንቸትዳ ሞርናይ እያ ስንን ሄመትሸ፥ ‘ካዎይ ቦንቻናዉ ዶስያ ኡራስ ሀይሳዳ ኦስ’ ያግድ አዋጆ” ያግስ።

¹⁰ ካዎይ ዛሪድ፥ ሃማ ሀይሳዳ ያግድ ኪትስ፤ “ህዛ ኤለሳ ደንዳዳ ካዎተ ማኡዋነ ታ ፓራ ኤካዳ፥ ነ ግዳይሳዳ አይሁደ ግድዳ ማርድክዮሳስ ኦ። እ ካዎ ኬ ገልያ ፐንገን ደኤስ። ነ ግዳይሳፈ እስባካ አሾፋ” ያግስ።

¹¹ ሄሳ ግሾ፥ ሃም ማርድክዮሳ ካዎተ ማኦ ማይዝድ፥ ካዋ ፓራ ቦላ ኡትስስ። ቃስ ካታማ ዳባባን እያፐ ስንራ ሄመትሸ፥ “ካዎይ ቦንቻናዉ ዶስያ ኡራስ ሀይሳዳ ኦስ” ያግድ አዋጅስ።

¹² ሄሳፈ ጉየ፥ ማርድክዮስ ካዎ ኬ ፐንገ ጉየ ስሚድ ብስ። ሽን ሃም ዳሮ አዛንዳ ግሾ፥ ጉሉንትድ፥ ኤለስሸ ባ ሶ ብስ።

¹³ ባና ጋክዳባ ኡባ ባ ማቸ ዞሳርስነ ባ ላገታስ ኦድስ። ኤንቲ እያኮ፥ “እያ ስንን ኔኒ ካዉያናዉ ዶምዳ ሀ አደይ፥ ማርድክዮስ፥ አይሁደ አስ ግድኮ፥ ነ እያራ ኤቀታዳ፥ እያ ፆናናዉ ዳንዳአካ፤ ቱማ እ ነና ይሳና” ያግዶሶና።

¹⁴ ኤንቲ ቡሮ ሄሳ ኦደትሽን፥ ካዋ ሹፋት ጋክድ፥ ሃማ አስትራ ጊግስዳ ግብራስ ኤለስድ ኤፍዶሶና።