Astiro 5 - ጌሻ ማፃፋ

አስትራ ካዋ ኦይቻሱ

¹ ፆማይ ዶመትን ሄን ጋላስ አስትራ ካዎተ ማኦ ማአዳ፥ ካዎ ጋን ግዶ ዳባባ ገላዳ ኤቃሱ። ካዎይ ካዎ ኬ ገልያ ፐንግያን ደእያ ባ አራታን ኡትስ።

² አስትራ ገላዳ፥ ግዶ ዳባባን ኤቅዳሮ ካዎይ በእድ እን ኡፋይትዳ ግሾ፥ ባ ዎርቃ ፃምኣ ኢኮ ምጭስ። እያ ሺቃዳ ፃምኣ ፄራ ቦቻሱ።

³ ካዎይ ኢኮ፥ “ካወ አስትረ፥ ኔኒ ታኮ አይስ ያዲ? ቃስ ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታ ነዉ እማና” ያግስ።

⁴ አስትራ ዛራዳ፥ “ካዋዉ፥ ነና ኡፋይስያባ ግድኮ፥ ታኒ ነዉ ጊግስዳ ግብራ ማናዉ ኔራ ሃማራ ናምአይ ሀች ኦማርስ ያኮ ዶሳይስ” ያጋሱ።

⁵ ሄሳፈ ጉየ ካዎይ፥ “ኑኒ አስትራ ጊግስዳ ግብራስ ባናዉ ሃማ ኤለስድ ኤህተ” ያግስ። ሄሳ ግሾ ናምአይ ሄ በሳ ብዶሶና።

⁶ ኤንቲ እስፈ ዎይነ ኡሻ ኡይሽን፥ ካዎይ ናምአን አስትሮ፥ “ኔኒ ታና ዎስያባይ አይቤ? ታኒ ነዉ እማና። ቃስ ኔኒ ታና ኦይችያባይ አይቤ? ሀር አቶሽን ታ ካዎተፈ ባጋ ግድኮካ፥ ታ ነ ኦይሻ ፖላና” ያግስ።

⁷ አስትራ ዛራዳ ታ ኦይቸይነ ታ ዎሰይ ሀይሳ፤

⁸ “ካዋዉ፥ ኔኒ ታናን ኡፋይትያባ ግድኮ፥ ቃስ ታኒ ዎስያባ እማናዉነ ታ ኦይሻ ፖላናዉ ኔኒ ዶስያባ ግድኮ፥ ዎንቶ ታ ጊግስያ ሀራ ግብራስ ኔራ ሃማራ ያና መላ ኦይቻይስ። ታኒ አይ ኮያኮ ሄ ዎደ ነዉ ቆንጭሳና” ያጋሱ።

ሃም ማርድክዮሳ ዎሳናዉ ማቅስ

⁹ ሃም ግብራ በሳፈ ከይድ ብያ ዎደ፥ ዳሮ ኡፋይትዳ ግሾ፥ ባ ዎዛናን ኡፋይስ ኖጩ ግሸ ብስ። ሽን እ ካዎ ኬ ገልያ ፐንግያ ማታራ አድ ብያ ዎደ ያን ኡትዳ ማርድክዮሳ በእስ። እያዉ ደንድቦናይሳነ ያይድ ኮኮርቦናይሳ በእድ ሃም ይሎ ኤፅስ።

¹⁰ ግዶሽን፥ ባ ይሉዋ ዳንዳእድ ብድ ባ ሶ ጋክስ። ሄሳፈ ጉየ፥ ባ ላገታነ ባ ማችዉ ዞሳራ ፄግስድ፥

¹¹ ሃም ባ ዱረተ ልክያ፥ ባ አደ ናይታ ታይቡዋ፥ ካዎይ ባና ቦንችዳ ቦንቹዋነ ሀራ ሀላቃታፐነ ካዎ ሞርናታፐ አያ ሹማተ እምድ፥ ዋትድ እያ ቦንችዳኮ ናሸትስ።

¹² ጉጅድካ ሃም፥ “ሀር አቶሽን ካውያ አስትራካ ባ ጊግስዳ ግብራስ ካዉዋራ ባና መላ ታፐ አትሽን፥ ሀራ ኦናካ ፄጋቡኩ። ቃስ ዎንቶካ ካዉዋራ ባና መላ ታና ፄጋሱ።

¹³ ሽን አይሁደ ግድዳ ማርድክዮስ ካዎ ኬ ገልያ ፐንገን ኡትዳይሳ በእያ ዎደ ሀ ኡባይካ ታና ኡፋይሰና” ያግስ።

¹⁴ ሄ ዎደ እያ ማችያ ዞሳራነ እያ ላገት ኡባይ ሀይሳዳ ያግዶሶና፤ “ኔኒ እሻታሙ ዋ ም ኤስሳዳ ዎንቶ ጉራ ማርድክዮስ ካቀታና መላ ካዋ ኦይቻ። ሄሳፈ ጉየ፥ ኡፋይታሸ ግብራ ማናዉ ባ” ያግዶሶና። ሃማ ሀ ቆፋይ ኡፋይስዳ ግሾ፥ ኤንቲ ግዳይሳዳ ካቃ ም ጊግስስ።