Amoxe 9 - ጌሻ ማፃፋ

እስራኤለይ ፕርደታና

¹ ታኒ ጎዳይ ያርሾ በሳ ማታን ኤቅዳሽን በአስ። እ ታኮ፥ “ባሶይ ቃፃና ጋካናዉ ፆሳ ኬ ጉምቡዋ ሾጫዳ አሳ ኡባ ሁጰን መንረ። ሄሳፈ አትዳ አሳ ታኒ ማሻን ዎና። ባቃትያ አስ ከስ ኤከና፤ ከስ ኤክዳ አስካ ፓፃ አተና።

² ኤንቲ ቢታ ቦክድ፥ ስኦለን ዎኮካ፥ ታኒ ኤንታና ያፐ ከሳና። ሳሉዋ ከይኮካ፥ ታኒ ኤንታ ያፐ ዎሳና።

³ ኤንቲ ቃርመሎሳ ዙማ ሁጰን ቆሰትኮካ፥ ታኒ ኤንታ ኮያዳ ያፐ ከሳና። አባ ጪሞን ገልድ፥ ታ ስንፈ ጌምኮካ፥ ታኒ ዳወ ኪትን፥ እ ኤንታ ዱካና።

⁴ ኤንቲ ባንታ ሞርከታን ድኤትድ፥ ቢኮካ፥ ያን ኤንቲ ማሻን ሀይቃናዳ ኪታና፤ ታኒ ኤንታ ኢታ አይፈን ፄላና፤ ኤንታ ሎኦ አይፈን ፄልከ” ያግስ።

⁵ ጎዳይ፥ ኡባፈ ዎልቃማ ፆሳይ፥ ሳኣ ቦችን ሳእ ትልኤስ፤ ቃስ ሳአን ደእያ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎና።

⁶ ባ ኬ ሳሎን ኬፅዳይ፥ እያ ባሱዋ ሳአን ኤስዳይ፥ አባ ሃ ፄግድ፥ ቢታ ቦላ ዱገ ቡክሰይ፤ እያ ሱንይ ጎዳ።

⁷ ጎዳይ፥ “እስራኤለ አሳዉ፥ ህንተ ታዉ ቶጰ አሳ መላ ግደከትዬ? ታኒ ህንተና ግብፀ ቢታፈ ከስዳይሳዳ፥ ፍልስፄመ አሳ ካፍቶራፐ፥ ቃስ ሶረ አሳ ቂራፐ ከሳብክና?” ያጌስ።

⁸ ጎዳይ፥ “ሄኮ፥ ኡባ ሃርያ ጎዳ አይፈይ ናጋራንቾ ካዎተ ቦላ ደኤስ። ታኒ እያ ቢታ ቦላፈ ይሳና፤ ሽን ታኒ ያይቆባ ኮቻ ኡባ ይስከ።

⁹ ታኒ ካ ዛርዛረን ሀርቀተይሳዳ እስራኤለ አሳይ ካዎተታ ኡባ ግዶን ላለታና መላ ኪታና። ሽን ኤንታ ግዶን አማነትዳይሳታፐ እሶይካ ሳአን ዎድ የና።

¹⁰ ‘ኑና አይባ ኢትካ ጋከና ዎይኮ ደመና’ ግያ ታ አሳ ግዶን ደእያ ናጋራንቾት ኡባይ ማሻን ዉራና” ያጌስ።

እስራኤለይ ዛሪድ ደንዳና

¹¹ “ሄ ጋላስ ታኒ ኩንድዳ ዳዊታ ካዎተ ደንና። ድርሳ ግምበታ ዛራ ኤሳና፤ ላለትዳ በሳታ ኦራና፤ ታኒ እያ ካሰይሳዳ ኦዳ ኬፃና።

¹² ሄስካ ኤዶመፐ አትዳይሳታነ ታ ሱንን ፄገትዳ ካዎተታ ኡባ ላታና” ያጌስ ሄሳ ኦያ ጎዳይ።

¹³ “ካ ጫከይሳት ጫክ ዉርሶና ደእሽን፥ ጎየይሳት ጋክያ ዎደይ፥ ዎይነ ጉምኤይሳት ጉምእድ ዉርሶና ደእሽን፥ ዎይነ ቶከይሳት ጋክያ ዎደይ ያና። ሄ ዎደ ደረት ማልኦ ዎይነ ኡሽ ፑልታና፤ ዙማት ዎይነ ኡሻን ምተታና።

¹⁴ ድኤትድ ብዳ ታ አሳ እስራኤለ ዛራና፤ ኤንቲ ላለትዳ ካታማታ ዛር ኬፅድ ዳና። ዎይነ ቶክድ እያፐ ዎይነ ኡሻ ኡያና፤ አታክልተ ቶክድ ኤንታ አይፍያ ማና።

¹⁵ ታኒ ታ አሳ፥ እስራኤለ ኤንታ ቢታን ቶካና፤ ኤንቲ ታኒ ኤንታዉ እምዳ ቢታፈ ዛሪድ ሾደቶኮና” ያጌስ ሄሳ ኦያ ጎዳይ።