Amoxe 8 - ጌሻ ማፃፋ

ቴራ አይፈይ ኩምዳ ዳቾ

¹ ኡባ ሃርያ ጎዳይ ታና ሀራ ቆንጨ በስስ፤ ሄስካ፥ ቴራ አይፈይ ኩምዳ ዳቾ በስስ።

² እ ታኮ፥ “አሞፀ፥ ኔኒ አይ በአይ?” ያግድ ኦይችስ። ታኒ፥ “ቴራ አይፈይ ኩምዳ ዳቾ በአይስ” ያጋስ። ጎዳይ ታኮ፥ “ታ አሳ እስራኤለ ዉርሰይ ጋክስ፤ ህዛፐ ጉየ ታኒ ኤንታ ሴሮና አግከ” ያግስ።

³ ኡባ ሃርያ ጎዳይ፥ “ሄ ጋላስ ካዎ ኬን የፅያ የይ ዬሆን ላመታና፤ አሳ አህ ዱማ ዱማ በሳን ዎና፤ ዬሆይ ዋሶይ ባይና ስእ ግድ የገታና” ያጌስ።

⁴ ህንተኖ፥ መቶታንቾታ ኡንኤይሳቶ፥ ቢታን ደእያ ማንቆታ ይሳናዉ ኮየይሳቶ፥ ሀይሳ ስእተ!

⁵ ህንተ፥ “ኑኒ ካ ባይዛናዉ አጌና ፄሮ ባለይ አዉደ አነ! ቃስ ኑኒ ኑ ዛልእያ ዶማናዉ ሳምባት አዉደ አነ! ኑኒ ካ ጉባን ማክድ፥ ዳሮ ሚሸን ባይዛና። ቃስ ዎርዶ ምዛነን አሳ ጭማና።

⁶ ማንቁዋ ብራን፥ መቶታንቹዋ ዋ ጫማን ሻማና፤ ቃስ ሀርቆ ግስተ ሙሩቶ ግስተ ጋተን ባይዛና” ያጌታ።

⁷ ያይቆብ እያ ሱንን ጬቀትያ ጎዳይ፥ ፆሳይ፥ ሀይሳዳ ያግድ ባ ሁጰን ጫቅስ፦ “ታኒ ኤንቲ ኦዳ ኢታ ኦሶ ኡባ ዶግከ።

⁸ ሄሳ ጋሶን ቢታይ ያርኬስ፤ አሳ ኡባይ ዬኬስ። ናይለ ሻፋይ ክፅድ ከየይሳዳነ ዎይሳዳ ቢታ ኡባይ ቃፃናነ ስም ዎና” ያግስ።

⁹ ኡባ ሃርያ ጎዳይ፥ “ሄ ጋላስ ታኒ አዋ ሴታ ጋላስ ዉልሳና፤ ጋላሳ ቃምሳና።

¹⁰ ታኒ ህንተ ኡፋይሳ ባልያ አዛኖን፥ ህንተ የ ዬሆን ላማና። ፐፅ እስ ናእ ሀይቅን ዬክያ አሳዳ፥ ህንተ ህንተ ሁጵያ ሜደትድ ካዮ ማኦ ማአናዳ፥ ህንተና ኦና። ሄ ጋላሳ ዉርሰይ ዳሮ ጫሞ ግዳና” ያጌስ።

¹¹ ኡባ ሃርያ ጎዳይ፥ “ሄኮ፥ ታኒ ቢታ ኡባ ቦላ ኮሻ የድያ ዎደይ ያና። ሄ ኮሻይ ካ ዎይኮ ሃ ኮሻ ግዶናሽን፥ ስአናዉ ጎዳ ቃላ ዮ ኮሻ ግዳና።

¹² አሳይ ዶሎሀፐ ዉሎሀ ጋካናዉ፥ ፑደሀፐ ዱገሀ ጋካናዉ ዎፀረታና። ኤንቲ ጎዳ ቃላ ኮያናዉ ያነ ሃነ ዎፃና፥ ሽን ደሞኮና።

¹³ ሄ ጋላስ የገልሳ ጌላኦትነ ዎልቃማ ፓንት ሳሞን ፕቅ ጋና።

¹⁴ ሳማረ ኤቃታራ ጫቅዳይሳት፥ ‘ዳና ፆሳይ ኤሮ!’ ያገይሳት፥ ‘በርሳበ ፆሳይ ኤሮ’ ያገይሳት ኩንዳና። ኤንቲ ዛር ደንዶኮና” ያጌስ።