Amoxe 6 - ጌሻ ማፃፋ

እስራኤለ አየ!

¹ ህንተኖ፥ አሳይ ማዶ ኦይችያ ቦንቸትዳ እስራኤለ ሀላቃቶ፥ ህንተኖ፥ ፅዮነን እንጀን ደኤይሳቶ፥ ሳማረ ካታማን ህርግ ባይና ኡትዳይሳቶ፥ ህንተና አየ!

² አነ ካልነ ካታማ ብድ በእተ። ያፐ ግታ ሀማታ ካታማነ ፍልስፄመ ካታማ ጌተ ዎተ። ኤንቲ ህንተ ናምኡ ካዎተታፐ አና? ኤንታ ቢታይ ህንተ ቢታፈ ዳልጊ?

³ ህንተ፥ “ኢታ ጋላስ ኤለ ዬና” ግድ፥ ኢታ ኦሶ ኦይሳቶ፥

⁴ ዛለፐ ኦሰትዳ አርሳን ዝንኤይሳቶ፥ እንጀን ኡትዳይሳቶ፥ ዶርሳ ዉድያፐ አንቃራታነ ሚዛ ዎድያፐ ጋታርመንዋ መይሳቶ፥

⁵ ዳዊቲዳ የ ሚሸ ህንተዉ ጊግስድ፥ ዱማ ዱማ የ የፀይሳቶ፥

⁶ ዎይነይ ኡሻ ከረራ ጋነይሳቶ፥ አልኦ ሽቶን ትየተይሳቶ፥ ዮሰፋ ኮቻታ ዩዋን አዛኖናይሳቶ፥ ህንተና አየ!

⁷ ሄሳ ግሾ፥ ኮይሮ ድኤታናይ ህንተና፤ ሄ ዎደ ህንተ እንጀ ዱሳይ አታና።

⁸ ጎዳይ፥ ኡባፈ ዎልቃማ ፆሳይ ሀይሳዳ ያግድ፥ ባናን ጫቅስ፦ “ታኒ ያይቆባ ኦቶሩዋ እፃስ፤ ኤንታ ሚፃካ ሻተታስ፤ ታኒ ካታማነ ካታማን ደእያ ኡባ ኤንታ ሞርከታስ አዳ እማና” ያጌስ።

⁹ እስ ኬን ታሙ አስ አትኮ፥ ኤንትካ ሀይቃና።

¹⁰ ሀይቅዳይሳታ ዳቦታፐ እሶይ አሀ ሞጋናዉ ሶፐ ከስ ኤፍሸ፥ ሄ ኬን ቆሰትዳ ኡራኮ፥ “ኔራ አትዳ ሀራ አስ ደኢ?” ያግድ ኦይቻና። እ ዛሪድ፥ “ባዋ” ያጋና። ኦይቸይስ ዛሪድ፥ “ሀይዛ፥ ሀይዛ! ጎዳ ሱን ኑኒ ፄጋናዉ ኮሸና” ያጋና።

¹¹ ጎዳ ኪታን፥ ግታ ኬት ላለታና፤ ላፋ ኬት መቀረታና።

¹² ፓራት ዛላ ቦላ ጋላባናዉ ዳንዳኦና? ዎይኮ ጎሻንቾይ ቦር ዋፅድ፥ አባ ጎያናዉ ዳንዳኢ? ሽን ህንተ ሱረ ፕርዳ ጪየ፥ ፅሎተ ጫሞ ኦደታ።

¹³ ህንተ ሎዶባራ ካታማ ፆንዳ ግሾ ኡፋይተታ፤ ህንተ፥ “ኑኒ ቃርናይማ ካታማ ኑ ምኖተን ኦይክዳ” ግድ ጬቀተታ።

¹⁴ “ህንተኖ፥ እስራኤለ አሳዉ፥ ታኒ ህንተ ቦላ ሀራ ካዎተ ደንና፤ ኤንቲ ህንተና ሀማታ ፕኑዋፐ ዶምድ፥ አራባ ዛንጋራ ጋካናዉ ኡንኤና” ያጌስ ጎዳይ፥ ኡባፈ ዎልቃማ ፆሳይ።