Amoxe 3 - ጌሻ ማፃፋ

እስራኤለ ቦላ ፄገትዳ ማርካታ

¹ ግብፀ ቢታፈ ህንተና ከስዳ፥ እስራኤለ አሳዉ፥ ጎዳይ ህንተዉ ኦደይሳ ስእተ።

² ጎዳይ፥ “ሳአን ደእያ አሳ ኡባፈ ታኒ ህንተ ፃላላ ዶራስ። ሄሳ ግሾ፥ ህንተ ኦዳ ናጋራ ኡባስ ታኒ ህንተና ሴራና” ያጌስ።

³ ናምኡ አሳት ዎላ ባና ግድ ቆፋ ቃቾና ደእሸ እስፈ ሄመቶና?

⁴ ጋሞይ ዎ ደሞና ዎራን ጮ ጉድዬ? ዎይኮ ዎዳላ ጋሞይ አይኮ የደድ ኦይኮና ኡት ደንድድ ሳርቡቅዬ?

⁵ ካፎይ ፅሄይ ባይና ጮ ደንባን ኦይከትዬ? ዎይኮ ፅሄይ አይኮይ ቦቾና ጮ ፕርዬ?

⁶ ካታማ ግዶን ኦላ ሞይዘይ ፑነትያ ዎደ አሳይ ያሻን ኮኮረነዬ? ዎይኮ ጎዳይ ኪቶና ደእሽን ዮይ እስ ካታማ ቦላ ዪዬ?

⁷ ቱማ ኡባ ሃርያ ጎዳይ ባ ፁራ ናበታስ፥ ባ ኦሳንቾታስ ካሰትድ ቆንጭሶና ደእሸ አይኮካ ኦና።

⁸ ጋሞይ ጉድን ያዮናይ ኦኔ? ኡባ ሃርያ ጎዳይ ኦድን፥ ትንብተ ኦዶናይ ኦኔ?

⁹ አሽዶዳንነ ግብፀን ደእያ ሚፃ ኡባስ ሀይሳዳ ያግድ አዋጅተ፦ “ሳማርያ ደረታ ቦላ ሺቅድ፥ ያን ደእያ ኢታተነ ሱገ በእተ” ያግተ።

¹⁰ “ሀ አሳይ ሎኦባ ኦ ኤሮኮና፤ ኢታተንነ ቦንቅድ ኤህዳ ሚሸን ባንታ ኬ ኩንሶና” ያጌስ ጎዳይ።

¹¹ ሄሳ ግሾ፥ “ሞርከይ ህንተ ቢታ ተቃና፤ ህንተ ባሱዋ ላላና፤ ህንተ ኬ ቦንቃና” ያጌስ ኡባ ሃርያ ጎዳይ።

¹² “ሄንንቾይ ጋሞ ዶናፐ ናምኡ ሹቁለ ዎይኮ ዱፃ ሀይ የግስ ኤከይሳዳ፥ ሳማረ ቢታን እንጀ ዱሱ ደእያ እስራኤለ አሳፐ ጉት አታና” ያጌስ ጎዳይ።

¹³ “ሀይሳ ስእድ ያይቆባ ኮቻታ ቦላ ሀይሳዳ ያግድ ማርካትተ።

¹⁴ ታኒ እስራኤለ አሳ ኤንታ ናጋራ ግሾ ሴርያ ዎደ፥ ቤተለ ካታማን ደእያ ያርሾ በሳታ ላላና፤ ያርሾ በሳን ደእያ ካጨት መእድ፥ ሳአን ዎና።

¹⁵ ኤንቲ ባልጎነ ቦነ ደእያ ኬታ ኡባ ታኒ ይሳና። ኤንቲ ዳንጋርሳ ዛለን አሌቅስድ፥ ኬፅዳ ኬ ላላና፤ ቃስ ግታ ግታ ኬት ኡባይ ያና” ያጌስ ጎዳይ፥ ኡባፈ ዎልቃማ ፆሳይ።