ሃዋሬታ ኦሱዋ 25 - ጌሻ ማፃፋ

ጳዉሎስ ፍስፆሳ ስንን

¹ ፍስፆስ ካዎትዳ ሄ ጋላሳፐ ጉየ ቅሳረፐ የሩሳላመ ብስ።

² ያን ካህነ ሀላቃትነ አይሁደታ ካለይሳት ጳዉሎሳ ሞትዶሶና።

³ ጳዉሎሳ የሩሳላመ ኤህሽን ኦገን ቆሰትድ እያ ዎናዉ ኤንታዉ እንጀታና መላ ባንታና ማዶ ግድ ፍስፆሳ ዎስዶሶና።

⁴ ፍስፆስ ኤንታኮ፥ “ጳዉሎስ፥ ቅሳረን ቃሾ ኬን ደኤስ፤ ታኒ ታ ሁጰንካ ኤለሳዳ ጉየ ስማና ሀናይስ።

⁵ እ ባልዳባይ ደእኮ ህንተ ግዶን አዋተይሳት ታራ ቅሳረ ብድ እያ ሞቶና” ያግድ ዛርስ።

⁶ ፍስፆስ ኤንታ ማታን ሆስፑን ዎይኮ ታሙ ጋላሳ መላ ጋምእዳፐ ጉየ ቅሳረ ብስ። ዎንተ ጋላስ ፕርዳ ኦይደን ኡትድ ጳዉሎሳ ኤሀና መላ ኪትስ።

⁷ እ ይን የሩሳላመፐ ይዳ አይሁደት እያ ዩሹዋን ኤቅድ ኤንቲ ላናዉ ዳንዳኦና ዳሮ ዴፆ ሞቶ እያ ቦላ ሺሽዶሶና።

⁸ ጳዉሎስ ዛሪድ፥ “ታኒ አይሁደ ህግያ ግድን ፆሳ ኬ ዎይኮ ሮመ ካዋ ቄሳረ ናቃብከ” ያግስ።

⁹ ሽን ፍስፆስ አይሁደታ ኡፋይሳናዉ ኮይድ ጳዉሎሳኮ፥ “የሩሳላመ ባዳ ሀ ሞቱዋባ ያን ታ ስንን ፕርደታናዉ ኮያይ?” ያግድ ኦይችስ።

¹⁰ ሽን ጳዉሎስ፥ “ታኒ ፕርደታናዉ በሲያ ቄሳረ ፕርዳ ኬን ኤቃ ክቻስ። ኔኒ ሎይ ኤረይሳዳ ታኒ አይሁደታ አይብንካ ናቃብከ።

¹¹ ህዛ፥ ታኒ ናቅዳባይ ዎይኮ ሀይቆስ ጋያባ ኦዳባ ግድኮ ሀይቆፐ ታና አሻ ጊከ። ሽን ኤንቲ ታና ሞትያ ሞቶይ መላ ግድዳፐ ጉየ ኦንካ ታና ኤንታዉ አድ እማናዉ ዳንዳኤና። ቄሳረይ ታባ ፕርዶ ጋዳ ኦይቻይስ” ያግስ።

¹² ሄ ዎደ ፍስፆስ ባ ዞራንቾታራ ዞረትድ፥ “ኔኒ ቄሳረይ ታባ ፕርዶ ጋዳ ኦይቻዳሳ፤ ቄሳረኮ ባሳ” ያግድ ዛርስ።

ጳዉሎስ አግርጳነ ባርንቀ ስንን

¹³ ጉ ጋላሳፐ ጉየ ካዎይ አግርጵነ ባርንቀይ ፍስፆሳ ሳሮናዉ ቅሳረ ብዶሶና።

¹⁴ ያን ኤንቲ ዳሮ ጋላስ ጋምእን፥ ፍስፆስ ካዋስ ጳዉሎሳባ ሀይሳዳ ያግድ ኦድስ፤ “ፍልክስ ብሎና አግድ ብዳ እስ አደይ ሀይሳን ደኤስ።

¹⁵ ታኒ የሩሳላመ ብዳ ዎደ ካህነ ሀላቃትነ አይሁደ ጭማት እያ ቦላ ፕርዳና መላ ታና ዎስድ እያባ ታዉ ኦድዶሶና።

¹⁶ ታኒ፥ ‘ሞተትዳ ኡራይ ባና ሞተይሳታ ስንን ኤቅድ ባ ሞትዳባስ ዛሮ እሞናሽን፥ ኦና ግድኮካ አድ እመተይስ ሮመ ህገ ግደና’ ያጋዳ ኤንታዉ ዛራስ።

¹⁷ “ሄሳ ግሾ፥ ኤንቲ ሀይሳን ሺቅዳ ዎደ ታኒ ጋምኦና ዎንተ ጋላስ ፕርዳ ኬ ገላዳ ጳዉሎሳ ኤሀና መላ ኪታስ።

¹⁸ እያ ሞተይሳት እያ ማታን ኤቅድ፥ ኢታባን እያ ሞቶና አጎኮና ጋዳ ታኒ ቆፕዳይሳ መላ እያ ሞትቦኮና።

¹⁹ ሽን ኤንቲ ባንታ ሀይማኖተባነ ጳዉሎስ፥ ‘ፓፃ ደኤስ’ ግያ እስ ሀይቅዳ የሱሳ ጌተትያ አድያባ እያራ ፓላሞሶና።

²⁰ ሀ ኦዳይ ታና ሻካናዉ መትዳ ግሾ፥ ጳዉሎስ የሩሳላመ ብድ፥ ያን ፕርደታናዉ ኮያኮ ጋዳ እያ ኦይቻስ።

²¹ ሽን ጳዉሎስ ባ ኦዳ ቄሳረይ እያባ በአና ጋካናዉ ቃሾ ኬን ጋምአናዉ ኦይችስ። ታኒ እያ ቄሳረኮ የዳና ጋካናዉ እ ቃሸታና መላ ኪታስ” ያግስ።

²² ሄሳ ግሾ፥ አግርጵ ፍስፆሳኮ፥ “ታኒ ታ ሁጰንካ ሄ ኡራይ ግያባ ስአናዉ ኮያይስ” ያግስ። ፍስፆስ እያኮ፥ “ኔኒ ዎንቶ እ ግያባ ስአና” ያግስ።

²³ ዎንተ ጋላስ አግርጵነ ባርንቀይ ግታ ቦንቾን ሻላቃታራነ ካታማን ደእያ ግታ አሳታራ ይድ ፕርዳ ኬ ገልዶሶና። ፍስፆስ ጳዉሎሳ ፄግስድ ኤህስ።

²⁴ ፍስፆስ፥ “ካዋዉ አግርጳ፥ ሀይሳን ኑራ ደእያ አሳዉ፥ አይሁደት የሩሳላመንካ ሀይሳንካ ዋስድ፥ ‘እ ህዛፐ ጉየ ፓፃ ዳናዉ በሰና’ ያግድ፥ ታና ዎስዳ ኡራ ሀይሳ በኤታ።

²⁵ ሽን እያ ሀይቆስ ጋያባ አይብባካ ታኒ ደማብከ። እ ባ ሁጰን፥ ‘ቄሳረይ ታባ ፕርዶ ያጋዳ ኦይቻይስ’ ግዳ ግሾ፥ ቄሳረኮ እያ የዳናዉ ቆፋ ቃቻስ።

²⁶ ታኒ እያባ ታ ጎዳ ቄሳረስ ፃፋናዉ ግድያ ጋሶይ አይብካ ባዋ። ሄሳ ግሾ፥ እያባ ህንተ በእኮ ታ ፃፍያባይ በንታነኮ ጋዳ ህንተ ስን ኡባራካ ካዋዉ፥ አግርጳ፥ ነ ስን እያ ኤሀስ።

²⁷ አይስ ጊኮ፥ ቃሸትዳ አስ ቦላ ዳይናስ አያ ዎደ እ አይስ ሞተትዳኮ ቆንጭሶና አገይስ ታዉ ኤያተ ዳኔስ” ያግስ።