ሃዋሬታ ኦሱዋ 18 - ጌሻ ማፃፋ

ጳዉሎስ ቆሮንቶሳን

¹ ሄሳፈ ጉየ፥ ጳዉሎስ አቴናፐ ከይድ፥ ቆሮንቶሳ ብስ።

² ያን ጳንፆሳን የለትዳ እስ አይሁደ አድያ አቅላ ደምስ። አይሁደ አሳ ኡባይ ሮመፐ ከያና መላ ካዎይ ቃላዉድዮስ ኪትዳ ግሾ ጉ ዎደፐ ካሰ እ ባ ማቸ ጵርስቅላራ ፃለፐ ይስ። ጳዉሎስ ኤንታራ ጋሄታናዉ ብስ።

³ እያ ኦሶይ ኤንታይሳዳ ዱንካነ ስኮ ግድያ ግሾ፥ ኤንታራ ኡትድ እስፈ ኦስ።

⁴ ጳዉሎስ ሳምባታ ኡባን አይሁደታነ ግርከታ አማንናዉ አይሁደ ዎሳ ኬን ፓላሜስ።

⁵ ስላሰይነ ፅሞትዮስ ማቀዶነፐ ይዳ ዎደ ጳዉሎስ ባ ኩመ ዎድያ እምድ አይሁደታስ የሱሲ እ፥ ክርስቶሳ ግድ ቃላ ኦድስ።

⁶ ሽን ኤንቲ ጳዉሎሳ እፅድ እያ ጫይን ጳዉሎስ ባ ማኡዋፐ ባና ቆቆፍሸ፥ “ህንተ ጎመይ ህንተና ኦይኮ፤ ታኒ ሄሳን ደእከ። ህዛፐ ጉየ፥ ታኒ አይሁደ ግዶና አሳኮ ባይስ” ያግስ።

⁷ ያፐ ከይድ ፆሳ ጎይንያ ትቶስ ዮስፆሳ ጌተትያ ኡራ ሶ ብስ። ዮስፆሳ ኬይ አይሁደ ዎሳ ኬ ማታን ደኤስ።

⁸ አይሁደ ዎሳ ኬ ሀላቃይ ቃርስጶስ ባ ሶ አሳ ኡባራ ጎዳ አማንስ። ቆሮንቶሳ አሳታፐካ ዳሮት ፆሳ ቃላ ስእዳ ዎደ አማንድ ፃማቀትዶሶና።

⁹ ጎዳይ እስ ቃማ ጳዉሎሳስ ቆንጭድ፥ “ያዮፋ፤ ኦዳ፥ ስእ ጎፓ።

¹⁰ ታኒ ኔራ ደአይስ። ታዉ ሀ ካታማን ዳሮ አስ ደእያ ግሾ ነና ቆህድ ኢታባን የጋና አስ ኦንካ ባዋ” ያግስ።

¹¹ ሄሳ ግሾ፥ ጳዉሎስ ፆሳ ቃላ አሳ ታማርስሸ እስ ላይነ ኡሱፑን አጌና ኤንታራ ኡትስ።

¹² ጋልዮስ አካያ ቢታ አይስያ ዎደ አይሁደት እስፈ ጳዉሎሳ ቦላ ደንድድ ፕርዳ ኬ እያ ኤፍድ፥

¹³ “ሀ አደይ ህግያ እፅድ፥ አሳይ ፆሳ ጎይናና መላ ኦስ” ያግዶሶና።

¹⁴ ጳዉሎስ ኦደታና ሀንሽን፥ ጋልዮስ አይሁደታኮ፥ “አይሁደቶ፥ ሄስ ኢታ ኦሶ ዎይኮ ናቆ ግድያኮ ታኒ ህንተባ ዳንዳአዳ ስአናዉ በሴስ።

¹⁵ ሽን ቃላስ፥ ሱንስነ ህንተ ህግያስ ህንተ ፓላምያባ ግድኮ ህንተ፥ ህንተዉ ብልተ፤ ሄሳ ታኒ ፕርድከ” ያግስ።

¹⁶ ያትድ፥ ኤንታ ፕርዳ ኬፈ ካረ ከስስ።

¹⁷ ሄሳፈ ጉየ፥ ግርከ አሳ ኡባይ አይሁደ ዎሳ ኬ ሀላቃ ሶስተኔሳ ኦይክድ ፕርዳ ኬ ስንን ዋዶሶና። ሽን ጋልዮስ ሄሳ ፓፃባ ግቤና።

ጵርስቅላ፥ አቅላነ አጵሎሳ

¹⁸ ጳዉሎስ ዳሮ ጋላስ ቆሮንቶሳን ኡትዳፐ ጉየ አማንያ አሳ ሳሮድ፥ ጵርስቅልራነ አቅላራ ማርካበን ሶረ ብስ። ሽን እ ባናፐ ስን ባዉ ጋሶይ ደእያ ግሾ ክንክራ ካታማን ባ ሁጵያ ቡሉሰትስ።

¹⁹ ኤንቲ ኤፈሶና ጋክዳ ዎደ ጳዉሎስ ጵርስቅሎነ አቅላ ያን አግስ። ሽን ባዉ አይሁደ ዎሳ ኬ ገልድ አይሁደታራ ኦደትስ።

²⁰ ኤንቲ ባንታራ ዳሮ ዎደ ኡታና መላ ጳዉሎሳ ዎስዶሶና ሽን እ እፅስ።

²¹ ኤንታፈ ሻከትሸ፥ “ታኒ ያ ባልያ የሩሳላመን ቦንቻናዉ በሴስ። ሽን ፆሲ ጊኮ ህንተኮ ስማ ያና” ያግድ ኤፈሶናፐ ማርካብያን ብስ።

²² ቅሳረ ጋክዳ ዎደ የሩሳላመ ብድ ዎሳ ኬ አሳ ሳሮዳፐ ጉየ አንፆከ ብስ።

²³ ያን ጉ ዎደ ጋምእዳፐ ጉየ አማንያ አሳታ ኡባ ምንሸ ጋላትያራነ ፕርገራ አስ።

²⁴ እስክንድረን የለትዳ እስ አጵሎሳ ጌተትያ አይሁደ አስ ኤፈሶና ብስ። እ ኦዳ ኤርያ አስነ ፆሳ ቃላ ዳሮ ኤርያ አስ።

²⁵ ጎዳ ኦግያካ ታማርስ፥ አያናን ፁገትድ የሱሳባ ሱረ ታማርሴስ። ግዶሽን፥ ዮሃንሳ ፅንቃትያ ፃላላ ኤሬስ።

²⁶ እ አይሁደ ዎሳ ኬን ያዮና ታማርሴስ። ጵርስቅላነ አቅል እ ኦደይሳ ስእዳ ዎደ ባንታራ ሶ እያ ኤፍድ ፆሳ ኦግያ ካሰይሳፈ ጌሽድ እያዉ ኦድዶሶና።

²⁷ አጵሎስ አካያ ባናዉ ኮይን ኤፈሶናን ደእያ አማንያ አሳይ እያ ቆፋ ኤክድ አካያን ደእያ አማነይሳት እያ ሞካና መላ ኤንታዉ ዳብዳበ ፃፍዶሶና። እ ያ ጋክዳ ዎደ ፆሳ አ ኬሀተ ባጋራ የሱስ ክርስቶሳ አማንዳይሳታ ዳሮ ማድስ።

²⁸ አይስ ጊኮ፥ የሱሲ፥ እ፥ ክርስቶሳ ግደይሳ አይሁደታስ ፆሳ ቃላፐ ቆንጭስድ ደርያ ስንን ምን ኦድድ ኤንታ ላስ።