3 ዮሃንሳ 1 - ጌሻ ማፃፋ

ሳሮነ ዎሳ

¹ ታኒ ጭማይ፥ ቱማ ዶስያ ጋዮሳስ ኪትዳ ኪታ።

² ታ ሲቁዋዉ፥ ኔኒ ነ ሸምፑዋን ሎኦ ደኤይሳ ታ ኤረይሳዳ ነዉ ፓያተ ዳና መላነ ነ ኦያባይ ሱራና መላ ነዉ ፆሳ ዎሳይስ።

³ ጉ አማንያ አሳት ይድ፥ ኡባ ዎደ ኔኒ ቱማን ደኤይሳነ ነ ቱማተባ ማርካትዳ ዎደ ታኒ ዳሮ ኡፋይታስ።

⁴ ታ ናይት ቱማተን ደኤይሳ ስኤይሳፈ አድ፥ ታና ኡፋይስያባይ ባዋ።

ጋዮስ ሳበትስ

⁵ ታ ሲቁዋዉ፥ ኤንቲ ነዉ እማ ግድኮካ፥ ኔኒ አማንያ አሳታስ አማንያ ኦሶ ኦሳ።

⁶ ኤንቲ ነ ሲቁዋባ ዎሳ ኬን ማርካቶሶና። ሀእካ ኤንቲ ብያ ኦግያን ፆሳይ ዶሰይሳዳ ኦዳ ኤንታ ማድኮ ሎኦ ኦሳ።

⁷ ኤንቲ ክርስቶሳ ሱን ግሾ ከይሸ፥ አማኖና አሳታፐ አይኮካ ኤክቦኮና።

⁸ ኑኒ ቱማ ኦሱዋ ኤንታራ እስፈ ኦናዉ ሀይሳ መላ አሳታ ማዳናዉ በሴስ።

ድዮትራፍስ ቦረትስ

⁹ ታኒ ዎሳ ኬታስ ዳብዳበ ፃፋስ፥ ሽን ኤንታ ሀላቃ ግዳናዉ ኮይያ ድዮትራፍስ ኑኒ ገይሳ ኤከና።

¹⁰ ሄሳ ግሾ፥ ታኒ ያ ብያ ዎደ እ ኑ ቦላ ኦደትያ ኢታ ኦዳነ እ ኦዳ ኦሱዋ ኦዳና። እ ሄስ ጉፅስ ግድ፥ ኑ እሻት ያ ዎደ ሞከና። ሀር አቶሽን፥ ኤንታ ሞካናዉ ኮየይሳታካ ድግድ ዎሳ ኬፈ ከሴስ።

ድመፅሮስ ናሸትስ

¹¹ ታ ሲቁዋዉ፥ ሎኦባ ዳናፐ አትሽን፥ ኢታባ ዳኖፓ። ሎኦባ ኦያ ኦንካ ፆሳ አስ፥ ሽን ኢታባ ኦያ ኦንካ ፆሳ በእቤና።

¹² ድመፅሮስ ሎኦ አስ ግደይሳ አሳ ኡባይ ማርካቴስ። ቱማይ ባ ሁጰን እያባ ማርካቴስ፤ ኑካ እያባ ማርካቶስ፤ ኑ ማርካተይ ቱማ ግደይሳ ህንተ ኤሬታ።

ሳሮ

¹³ ታኒ ነዉ ፃፋናዉ ኮይዳ ዳሮባይ ደኤስ፥ ሽን ቃላመንነ ዎርቃተን ፃፋናዉ ኮይከ።

¹⁴ ሽን ታኒ ማታራ ኔራ ጋሄታናዉ ቆፓይስ፤ ሄ ዎደ ኑኒ ኦደታና።

¹⁵ ሳሮይ ነዉ ግዶ። ነ ዳቦት ነና ሳሮ ያጎሶና። ኑ ዳቦታ ኡባ ኤንታ ሱን ሱን ፄጋዳ ታና “ሳሮ ግስ” ያጋ።