2 Taarike 9 - ጌሻ ማፃፋ

ሳባ ካውዉ

¹ ሳባ ካውያ ሶሎሞነ ዎርያ ስአዳ፥ ሰመንከን እያ ፓጫናዉ ሳዎ፥ ዳሮ ዎርቃነ አልኦ ሹቹ ጫነትዳ ዳሮ ግማለራ፥ ዳሮ አዣባን የሩሳላመ ባሱ። ባ ዎዛናን ደእያባ ኡባ ሶሎሞነስ ኦዳሱ።

² ሶሎሞነይ እያ ኦይችዳባ ኡባስ ዛሮ እሚስ፤ እ እዉ ብርሾና እያፐ ጌምድ አትዳባይ አይብካ ባዋ።

³ ሳባ ካውያ ሶሎሞነ ጭንጫተ፥ እ ኬፅዳ ጋዋ፥

⁴ እያ ጋይታን ሺቅያ ካ፥ እያ ሞርናት ኡትያ ኡተ፥ እያ ኦሳንቾት ኦያ ኦሱዋነ ማእያ ማኡዋ፥ እያ ኡሻ ትግያ አሳት ማእያ ማኡዋነ ጎዳ ኬን እ ያርሽያ ፁሳ ያርሹዋ በእዳ ዎደ እ ዎዛናይ ዳሮ ማላለትስ።

⁵ እያ ካዋኮ፥ “ነባነ ነ ጭንጫተ ታኒ ታ ቢታን ደአሸ ስእዳይስ ቱማ።

⁶ ሽን ታ ያዳ ታ አይፈን በአና ጋካናዉ ኤንቲ ታዉ ኦድዳባ አማናብከ። ነ ጭንጫተ ግታተስ ባጋካ ታዉ ኦድቦኮና፤ ታ ስእዳይሳፈ ነ ዳሮ ግታታሳ።

⁷ ኡባ ዎደ ነ ስንን ኤቅድ ነ ጭንጫተ ስእያ ነ አሳትነ ነ ሞርናት አይ መላ አንጀትዶና!

⁸ ነናን ኡፋይትድ፥ ነና ባ ካዎተ አራታን ኡትስዳ ጎዳይ ነ ፆሳይ ጋላተቶ! ነ ፆሳይ እስራኤለ ሲቅዳ ግሾነ መርናዉ ምን ኤሳናዉ ኮይዳ ግሾ ኔኒ ሱረ ፕርዳነ ፅሎተ ኦና መላ እ ነና ኤንታ ቦላ ካዎ ኦስ” ያጋሱ።

⁹ ካውያ ኦይዱ ሙኩሉ ክሎ ግራመ ዎርቃ፥ ዳሮ ሳዎነ አልኦ ሹቹ ካዋ ሶሎሞነስ እማሱ፤ ሳባ ካውያ ካዋ ሶሎሞነስ እምዳ ሽቱዋ መላ ሽቶይ ባዋ።

¹⁰ ቃስ ኦፍራፐ ዎርቃ ኤህዳ ክራማነ ሶሎሞነ አሳት ያፐ ሰንዳለ ምነ አልኦ ሹቹ ኤህዶሶና።

¹¹ ካዎይ ሳንዳለ ም ፆሳ ኬስነ ካዎ ጋስ ደ መናዉ፥ ሄሳዳካ ዛማረታስ ማስንቆነ ዲ ኦናዉ ጎኤትስ። ሄሳ መላ የ ሚሸት ሃይሳፈ ካሴ ይሁዳ ቢታን በንትቤና።

¹² ካዎይ ሶሎሞነይ ሳባ ካውያ ኮይዳባነ ኦይችዳባ ኡባ እዉ እሚስ። እያ፥ እያዉ ኤህዳይሳፈ አድ እዉ እሚስ። ሄሳፈ ጉየ፥ ሳባ ካውያ ባ አዣባራ ደንዳዳ ባ ቢታ ስማሱ።

ሶሎሞነ አቁዋ

¹³ ሶሎሞነይ ላይን ላይን ኤክያ ዎርቃይ ላታማነ ሄ ሙኩሉ ክሎ ግራመ።

¹⁴ ሄስካ ዛልአንቾታፐ ኤክያ ቃራፃ፥ አራበ ቢታ ካዎታፐነ እስራኤለ ቢታን ሃረይሳታፐ ኤክያ ዎርቃነ ብራ ጉጆናሽና።

¹⁵ ካዎይ ሶሎሞነይ እስ እስ ጎንዳለይ ላፑን ክሎ ግራመ ግድያ ናምኡ ፄቱ ዎጋ ጎንዳለታ ዎርቃፈ ኦስስስ።

¹⁶ እሶይ እሶይ ሄ ክሎ ግራመ ግድያ ሄ ፄቱ ጉ ጎንዳለታ ዎርቃፈ ኦስስስ። ካዎይ ሄ ጎንዳለታ “ልባኖሰ ዎራ” ጌተትያ ካዎ ጋን ዎስ።

¹⁷ ካዎይ ዳንጋርሳ ዛለፐ እስ ግታ አራታ ኦስስድ ዋላህ ባይና ዎርቃን ላንፅስ።

¹⁸ አራታይ ደእያ በሳ ከያናዉ የያ ኡሱፑን ደት ደኦሶና። አራታራ ኦይከትድ ኡትዳ ዎርቃፈ ኦሰትዳ ቶሆ የያ በሲ ደኤስ። አራታስ ናምኡ ባጋራ ኩሸ ሸምፕስያ ዘምፖት ደኦሶና፤ ሄ ዘምፖታ ማታራ ያ ባጋንነ ሀ ባጋን ኤቅዳ እስ እስ ጋሞ ምስለይ ደኤስ።

¹⁹ ሄ አራታይ ደእያ በሳ ከይያ ኡሱፑን ደታ ቦላ ያ ባጋራነ ሀ ባጋራ ኤቅዳ ታማነ ናምኡ ጋሞ ምስለት ደኦሶና። ሄሳ መላ አራት ሀራ ካዎተን አዉንካ ኦሰትቤና።

²⁰ ካዎይ ሶሎሞነይ ኡሹ ኡያ ሚሸ ኡባይ ዎርቃፈ ኦሰትስ፤ “ልባኖሰ ዎራ” ጌተትያ ካዎ ጋን ደእያ ሚሸ ኡባይ ዋላህ ባይና ዎርቃፈ ኦሰትስ። ሶሎሞነ ዎደ ብር ዳርዳ ግሾ ታይቦን ገለና።

²¹ ካዋስ ክራማ አሳት ላግያ ዛልኤ ማርካበታ ደኦሶና። ሄ ማርካበት ዎርቃነ ብራ፥ ዳንጋርሳ ዛለ፥ ቃረታነ ገለሾታ ጫንድ ሄ ላይፈ እስ ቶሆ ኤሆሶና።

²² ካዎይ ሶሎሞነይ ዱረተንነ ጭንጫተን ሳአን ደእያ ካዎታ ኡባፈ አስ።

²³ ሳአን ደእያ ካዎት ኡባይ ፆሳይ እያ ዎዛናን ዎዳ ጭንጫተ ስአናዉ ኮዮሶና።

²⁴ ላይን ላይን እያኮ ያ ኡባይ እያዉ ዎርቃነ ብራ፥ ማኦታ፥ ኦላ ሚሸ፥ ሽቶ፥ ፓራነ ባቁሎታ እሞታ ኤሆሶና።

²⁵ ሶሎሞነ ፓራታስነ ጋረታስ ኦይዱ ሙኩሉ ዛዳሎት ደኤስ፤ ታማነ ናምኡ ሙኩሉ ፓራ አሳት ደኦሶና። ሶሎሞነይ ሄሳታ ዱማ ዱማ ካታማታንነ የሩሳላመን ዎስ።

²⁶ ሶሎሞነይ ኤፍራፂሳ ሻፋፐ ዶምድ፥ ፍልስፄመ ቢታነ ግብፀ ዛዋ ጋካናዉ ደእያ ካዎታ ኡባ ሃርስ።

²⁷ ካዎይ የሩሳላመን ብር ሹቻዳ ኬለታናዳ ዝጋ ም ይሁዳ ዙማታ ፃጶን ድጭያ ቦባዳ ዳራና መላ ኦስ።

²⁸ ሶሎሞነይ ፓራታ ግብፀፈነ ሀራ ቢታ ኡባፈ ኤህሴስ።

ሶሎሞነ ሀይቁዋ

²⁹ ኮይሮፐ ዉርሰ ጋካናዉ ሶሎሞነ ታርከይ ናብያ ናታና ታርከ ማፃፋን፥ ሴሎ አድያ ናብያ አክያ ማፃፋንነ ናባፃ ናኣ እዮርባማ ዎደ ጋካናዉ ደእያ ናብያ እዶ ቆንጨ ማፃፋን ፃፈትስ ግደኔ?

³⁰ ሶሎሞነይ እስራኤለ ቦላ የሩሳላመን ኦይታሙ ላይ ካዎትስ።

³¹ ሄሳፈ ጉየ፥ ሶሎሞነይ ሀይቅድ ባ ማይዛታን ጋሄትስ፤ ባ አዋ ዳዊታ ካታማን ሞገትስ። እያ ናአይ ሮብኣም እያ በሳን ካዎትስ።