2 Taarike 8 - ጌሻ ማፃፋ

ሶሎሞነይ ኦዳ ሀራ ኦሶታ

¹ ሶሎሞነይ ፆሳ ኬነ ባዉ ጋ ኬፅዳ ላታማን ላይ ዉርሰን፥

² ካዎይ ክራም እምዳ ካታማታ ሶሎሞነይ ዛር ኬፅድ እስራኤለ አሳ ሄ ካታማታን ዎስ።

³ ሶሎሞነይ ሀማታነ ሱባ ጌተትያ ቢታ ብድ ኦይክስ።

⁴ ያትድ መላ ቢታን ደእያ ታድሞራ ካታማነ ሻሎ ምንጅያ ካታማታ ሀማታ ቢታን ኬፅስ።

⁵ ሄሳዳካ፥ ሶሎሞነይ ቆሞ ቤት-ሆሮናነ ጋርሳ ቤት-ሆሮና ጌተትያ ካታማታ ዛሪድ ኬፅስ። ሄ ካታማት ድርስ፥ ፐንገይነ ኮበይ ደእያ ድረትድ ኡትዳ ካታማታ።

⁶ ባላታ ካታማ፥ ቡቁራ ምንጅያ ካታማታ ኡባ፥ ባ ፓራታነ ፓራ ጋረታ ዎያ ካታማታ ኡባነ እ ኬፃናዉ አሞትዳ ኡባ የሩሳላመን፥ ልባኖሰንነ ባ ሃርያ ቢታ ኡባን ኬፅስ።

⁷ እስራኤለ ግዶናሽን ሀራ ቢታ አሳታፐ አትዳ ህተታ፥ አሞረታ፥ ፓርዘታ፥ ህወታነ ያቡሰታ፥

⁸ እስራኤለ አሳይ ዉርስድ ይሶና አግዳ አሳ ዎልቃ ኦሶ ኦና መላ ሶሎሞነይ ዶርስ፤ ሀች ጋካናዉ ኤንቲ ኦሶና።

⁹ ሽን ሶሎሞነይ እስራኤለ አሳፐ ኦናካ አይለ ኦድ ኦስስቤና። ኤንቲ እያ ኦላንቾታ፥ ቶራ ሞጮናታ፥ ፓራ ጋረ ላገይሳታ ሀላቃታነ ፓራ አሳታ ግድድ ኦዶሶና።

¹⁰ ኤንታ ግዶፈ ናምኡ ፄታነ እሻታሙ አሳት ካዋ ሶሎሞነ ኦሱዋ አዋተን ኦስሶሶና።

¹¹ ሶሎሞነይ፥ “ጎዳ ታቦተይ ገልዳ በሳይ ጌሽ ግድያ ግሾ፥ ታ ማችያ፥ ፋሮና ናእያ፥ እስራኤለ ካዋ ዳዊታ ጋን ዳናዉ በሱኩ” ያግድ፥ ግብፀ ካዋ ናእዉ ዳዊታ ካታማፐ ደንድ እዉ ኬፀትዳ ኬን ዎስ።

¹² ሶሎሞነይ ሄ ዎደ ፆሳ ኬ ስንን ጎዳስ ኬፅዳ ያርሾ በሳን ፁሳ ያርሾ ጎዳስ ያርሽስ።

¹³ ሙሰ ህገይ ኪተይሳዳ ጋላስ ጋላስ ፁሳ ያርሾ ያርሼስ። ሶሎሞነይ ሳምባታ ጋላሳን፥ አጌና ፄሮንነ ላይን ሄ ቶሆ ቦንቸትያ ባለታን፥ ሄስካ ኡይ ባለን፥ ሳምንታ ባለንነ ሻቃራ ባለን ጎዳስ ያርሾ ያርሼስ።

¹⁴ እያ አዋይ ዳዊቲ ካሰ ኪትዳይሳዳ ካህነታ ኤንታ ኦሶን ኦሶን ሻክድ ሹምስ፤ ጋላስ ጋላስ ማዝሙረን ሳባና መላነ ካህነታ ማዳና መላ ሌወታ ሻክድ ሹምስ። ፆሳ አስ ግድዳ ዳዊቲ ኪትዳይሳዳ ፐንገ ናግያ አሳታ እስ እስ ፐንግያ ናጋና መላ ሹምስ።

¹⁵ ሄሳዳካ፥ ካሰ ዳዊቲ ቡቁራ ምንጅያ በሳነ ሀራ አላለታባ ካህነታነ ሌወታ ኪትዳይሳዳ እሶይካ አቶና ኡባይ ፖለትስ።

¹⁶ ሶሎሞነይ ቆፕዳ ኦሶ ኡባይ ኦሰትድ ዉርስ፤ ፆሳ ኬይ ባሰትዳ ዎድያፐ ዶምድ ፖለታና ጋካናዉ ኦሶ ኡባይ ሎኦ ኦሰትስ።

¹⁷ ሄ ዎደ ካዎይ ሶሎሞነይ ኤዶመ ቢታን ዞኦ አባ ዶናን ደእያ ኤፅዮን-ጋብራነ ኤሎታ ብስ።

¹⁸ ካዎይ ክራም ማርካበታነ ማርካብያ ላጎን ሎህዳ አሳታ ሶሎሞነስ የድስ። ኤንቲ ሶሎሞነ አሳታራ እስፈ ኦፍራ ቢታ ብድ ያፐ 15,000 ክሎ ግራመ ዎርቃ ካዋ ሶሎሞነስ ኤህዶሶና።