2 Taarike 7 - ጌሻ ማፃፋ

ፆሳ ኬ አንጅሱዋ

¹ ሶሎሞነይ ዎሳ ፖልዳ ዎደ ሳሎፐ ታም ዎድ ፁሳ ያርሹዋነ ሀራ ያርሹዋ ምስ። ጎዳ ቦንቾይ ፆሳ ኬ ኩምስ።

² ጎዳ ቦንቾይ ፆሳ ኬ ኩምዳ ግሾ ካህነት ፆሳ ኬ ገላናዉ ዳንዳእቦኮና።

³ እስራኤለ አሳ ኡባይ ታም ሳሎፐ ዎሽንነ ጎዳ ቦንቾይ ፆሳ ኬ ኩምሽን በእዳ ዎደ ባንታ ሶምኡዋ ሳአ ጋድ ጎይንዶሶና። “ጎዳይ ኬሀ! እያ ሲቆይ መርናሳ” ያግድ ጎዳ ጋላትዶሶና።

⁴ ካዎይነ አሳ ኡባይ ጎዳ ስንን ያርሾ ያርሽዶሶና።

⁵ ካዎይ ሶሎሞነይ ላታማነ ናምኡ ሙኩሉ ኮርማታነ ፄታነ ላታሙ ሙኩሉ ዶርሳታ ያርሽስ። ሄሳዳ ኦድ፥ ካዎይነ አሳ ኡባይ ፆሳ ኬ ጎዳስ ዱማይዶሶና።

⁶ ካህነት ባንታዉ ጊግዳ በሳን ኤቅን፥ ሌወት ካዎይ ዳዊቲ ጎዳ ሳባናዉ ካሰ ኦዳ ማዝሙረ የፅያ ሚሸታ ኦይክድ ኤንታ ስንን ኤቅድ፥ “እያ ሲቆይ መርናሳ” ያግድ የፅሸ ጎዳ ጋላትዶሶና። ካህነት ሌወታ ስንን ኤቅድ ሞይዘ ፑንን እስራኤለ አሳ ኡባይ ኤቅስ።

⁷ ሶሎሞነይ ፆሳ ኬ ስንን ደእያ ግዶ ዳባባ ዱማይስ። ሄ በሳን ፁሳ ያርሾነ እስፈተ ያርሹዋፈ ሞዋ ያርሽስ። እ ሄሳ ኦዳይ፥ ጎዳ ስንን ደእያ ናሰ ብራታፐ ኦሰትዳ ያርሾ በሳይ፥ ፁሳ ያርሹዋ፥ ካ ያርሹዋነ እስፈተ ያርሹዋፈ ሞዋ ያርሻናዉ ጉፅዳ ግሾሳ።

⁸ ሄ ዎደ ሶሎሞነይነ እስራኤለ አሳ ኡባይ ላፑን ጋላስ ባኣለ ቦንችዶሶና። እስራኤለ አሳይ ሀማታፐ ብድ ግብፀ ሻፋ ጋካናዉ ደእያ ዳሮ አሳይ ሄ በሳን ሺቅዶሶና።

⁹ አሳይ ያርሾ በሳ አንጅስያ ባኣለ ላፑን ጋላስ ቃስ ሻቃራ ባኣለ ሀራ ላፑን ጋላስ ቦንችዶሶና። ሆስፑን ጋላስ ዉርሰ ሺቆ ሺቅዶሶና።

¹⁰ ሶሎሞነይ ላፑን አጌናን፥ ላታማነ ሄን ጋላሳን አሳ ሞይዝስ። አሳይ፥ ጎዳይ ዳዊታስ፥ ሶሎሞነስነ ባ አሳ እስራኤለስ ኦዳ ኬሀተን ኡፋይትሸ ባ ሶ ሶ ብዶሶና።

ፆሳይ ሶሎሞነስ ቆንጭስ

¹¹ ሶሎሞነይ ፆሳ ኬነ ካዎ ጋ ኬፅድ ዉርስስ። ሶሎሞነይ ፆሳ ኬንነ ባ ጋን ኦናዉ ባ ዎዛናን ቆፕዳባ ኡባ ፖልስ።

¹² ጎዳይ ሶሎሞነስ ቃማ ቆንጭድ፥ “ታኒ ነ ዎሳ ስአስ፤ ታኒ ሀ ፆሳ ኬ ያርሾ በሲ ግዳና መላ ዶራስ።

¹³ እር ቡኮና መላ ታ ሳሉዋ ጎርድያ ዎደ ዎይኮ ካ ማና መላ ቦለ ኪትያ ዎደ ዎይኮ ታ አሳ ቦላ ጋዶ የድያ ዎደ

¹⁴ ታ ሱንን ፄገትዳ ታ አሳይ ባንታ አሳተ ካዉሽድ ዎስኮ፥ ታና ኮይኮ፥ ባንታ ኢታ ኦግያፐ ስምኮ፥ ታ ሳሎን ኤንታ ዎሳ ስአና፤ ኤንታ ናጋራ አቶ ጋና፤ ኤንታ ቢታ ፓና።

¹⁵ ሀእ ሀ በሳን ዎሰትያ ዎሳ ታ አይፈይ ፄላና፤ ታ ሀይይ ስአና።

¹⁶ ሀእ ታ ሱንይ መርናዉ እያን ዳና መላ ሀ ኬ ዶራስነ ጌሻስ። ታ አይፈይነ ታ ዎዛናይ ኡባ ዎደ ሀ ኬን ዳና።

¹⁷ “ነ አዋይ ዳዊቲ ኦዳይሳዳ ኔኒ ታ ስንን ሄመትኮ፥ ታ ኪታ ኡባ ኦኮ፥ ታ ዎጋነ ታ ህግያ ናግኮ፥

¹⁸ ታኒ ነ አዋ ዳዊታራ፥ ‘ነ ኮቻፈ እስራኤለ ቦላ ካዎ ግድያ አስ ያካ’ ያጋዳ ጫቅዳይሳዳ ነ አራታ ምንዳ ኤሳና።

¹⁹ “ሽን ህንተ ታና አግድ ታ ህንተዉ እምዳ ዎጋነ ህግያ አግኮ፥ ሀራ ፆሳታ ጎይንኮነ ኤንታዉ ኦኮ፥

²⁰ ታኒ ካሰ ህንተዉ እምዳ ቢታፈ ህንተና ቆላና፤ ታ ሱንስ ዱማይዳ ሀ ኬካ አጋጋና። ታ ሀ ኬ ካዎተ ኡባ ግዶን ሚቻስነ ቀልቅሰስ ኦና።

²¹ ሀ ፆሳ ኬይ ዳሮ ማላልስያባ ግድኮካ፥ እያ ማታራ አያ ኡባይ ማላለትድ፥ ‘ጎዳይ ሀ ቢታነ ሀ ፆሳ ኬ አይስ ሀይሳዳ ኦዴ?’ ” ያጋና።

²² አሳይ ዛሪድ፥ “ሀይሳ ኡባ ኤንታ ቦላ ኤህዳይ፥ ኤንታና ግብፀፈ ከስዳ ኤንታ ማይዛታ ፆሳ አግድ ሀራ ፆሳታ ካልዳ ግሾነ ኤንታ ጎይንዳ ግሾሳ” ያጋና።