2 Taarike 6 - ጌሻ ማፃፋ

ሶሎሞነ ሃሳያ

¹ ሶሎሞነይ፥ “አቤት ጎዳዉ፥ ‘ታ ማ ሻራን ዳና’ ያጋዳሳ።

² ሽን ታኒ ኔኒ ያን መርናዉ ዳና ሎኦ ኬ ነዉ ኬፃስ” ያግስ።

³ እስራኤለ ሺቆይ ያን ኤቅዳሽን፥ ካዎይ ኤንታኮ ስሚድ፥ ኤንታ ሀይሳዳ ያግድ አንጅስ፤

⁴ “ጎዳይ እስራኤለ ፆሳይ ጋላተቶ! ታ አዋ ዳዊታስ ባ ዶናን ኦድዳ ኡፋይሳ ቃላ ባ ኩሸን ፖልስ። ሄ እ ኦድዳ ኡፋይሳይ፥

⁵ ‘ታኒ ታ አሳ እስራኤለ ግብፀፈ ከሳዳ ኤህዳ ዎደፐ ዶምን፥ ታ ሱንይ እያን ፄገታና መላ ታዉ ኬ ኬፃናዉ እስራኤለ ኮቻታ ግዶን አይ ካታማካ ዶራብከ፤ ዎይኮ እ ታ አሳ እስራኤለ ካለና መላ ኦናካ ዶራብከ።

⁶ ሽን ሀእ ታ ሱንይ የሩሳላመን ፄገታና መላ ታኒ የሩሳላመ ዶራስ፤ ቃስ ታ አሳ እስራኤለ ካለና መላ ዳዊታ ዶራስ።’

⁷ “ታ አዋይ ዳዊቲ ጎዳ እስራኤለ ፆሳ ሱንስ ኬ ኬፃናዉ ባ ዎዛናን ቆፕስ።

⁸ ሽን ጎዳይ ታ አዋ ዳዊታኮ፥ ‘ኔኒ ታ ሱንስ ኬ ኬፃናዉ ነ ዎዛናን ቆፕዳ ግሾ ሎኦ ኦዳሳ።

⁹ ግዶሽን፥ ታዉ ኬ ኬፃናይ ነና ግዳካ፤ ታ ሱንስ ኬ ኬፃናይ ነ ጉልባታፐ ከያና ነ ናኣ።’

¹⁰ “ጎዳይ ባ ግዳ ኡፋይሳ ቃላ ፖልስ። ጎዳይ ካሰ እምዳ ኡፋይሳዳ ታኒ ታ አዋ ዳዊታ በሳን ካዎታዳ እስራኤለ ካዎተ አራታን ኡታስ። ቃስ ጎዳ እስራኤለ ፆሳ ሱንስ ኬ ኬፃስ።

¹¹ ጎዳይ እስራኤለራ ጫቅዳ ጫቆይ ፃፈትዳ ሎቸ ሹቻት ደእያ ታቦትያ እያ ግዶን ዎስ” ያግስ።

ሶሎሞነ ዎሳ

^12-13 ሶሎሞነይ አዱሳተይ እቻሹ ዋ፥ ጎምፓይ እቻሹ ዋነ ቃተይ ሄ ዋ ግድዳ ማድራከ ናሰ ብራታፐ ኦድ ዳባባ ግዶን ዎስ። ሶሎሞነይ ጎዳ ያርሾ በሳ ስንን፥ እስራኤለ ማባራይ ደእያ በሳን ኤቅድ፥ ባ ኩሽያ ምጭድ እስራኤለ ሺቁዋ ስንን ጉልባትስ።

¹⁴ እ ሀይሳዳ ያግድ ዎስስ፦ “አቤት ጎዳዉ፥ እስራኤለ ፆሳዉ፥ ሳሎን ዎይኮ ሳአን ነ መላ ፆሲ ባዋ። ኔኒ ነ ኡፋይሳ ቃላ ናጋሳ፤ ባንታ ኩመ ዎዛናፐ ነ ስንን ሄመትዳ ነ አይለታ መርና ሲቁዋን ዶሳዳሳ።

¹⁵ ነ አይልያ፥ ታ አዋ ዳዊታስ ኔኒ ኦና ጋዳ ኦድዳ ቃላ ናጋዳሳ። ኔኒ ካሰ ነ ዶናን ኦድዳይሳ ነ ኩሸን ሀች ፖላዳሳ።

¹⁶ አቤት ጎዳዉ፥ እስራኤለ ፆሳዉ ኔኒ ነ አይልያ፥ ታ አዋ ዳዊታስ፥ ‘ኔኒ ታ ስንን ሄመትዳይሳዳ ነ ናይትካ ታ ህግያን ሄመታናዉ ባንታ ኦግያ ናግኮ፥ እስራኤለ አራታን ኡትያ አሰ ያካ’ ያግዳ ቃላ ፖላ።

¹⁷ አቤት ጎዳዉ፥ እስራኤለ ፆሳዉ፥ ኔኒ ነ አይልያ ዳዊታስ ኦድዳ ነ ኡፋይሳ ቃላይ ፖለቶ።

¹⁸ “ሽን ፆሲ ቱማ፥ አሳራ ሳአን ደእዬ? ሄኮ፥ ሳሎይ፥ ኡባፈ ቃ ሳሎይ ነና ኦይካናዉ ዳንዳኤና። ያትን፥ ሀ ታ ኬፅዳ ኬይ ነዉ አይ መላ ጉፃንደሻ!

¹⁹ ግዶሽን፥ አቤት ጎዳዉ፥ ታ ፆሳዉ፥ ታ ዎሳ፥ ነ አይልያ ዎሳነ ፄሳ ስአ። ታኒ ነ አይለይ ነ ስንን ዎስያ ዎሳነ ዋሱዋ ስአ።

²⁰ ኔኒ፥ ‘ታ ሱንይ ሄ በሳን ፄገታና’ ግዳ ሀ ፆሳ ኬኮ፥ ነ አይፈይ ቃማ ጋላስ ፄሎ። ታኒ ነ አይለይ ሀ ኬኮ ስማዳ ዎስያ ዎሳ ስአ።

²¹ ታኒ ነ አይለይነ ነ አሳይ እስራኤለይ ሀ ነ ኬኮ ስሚድ ዎስያ ዎሳ ስአ። ነ ደእያ በሳን ሳሎን ስአዳ ኑስ አቶ ያጋ።

²² “እስ አስ ባ ሾሩዋ ቆህድ አካይ ግን፥ እያ ጫቀናዉ ሀ ነ ኬ ኤህን፥ እያ ግዶን ደእያ ያርሾ በሳ ስንን እ ጫቅኮ፥

²³ ኔኒ ሳሎን ስአዳ ኦ። ነ አይለታ ግዶን ፕርዳ። ቆህዳ ኡራ ቦላ ፕርዳዳ፥ እ ኦዳባ እያ ቦላ ዛራ፤ ፅሉዋ ፆንሳዳ እያዉ እያ ፅሎተዳ ዛራ።

²⁴ “ነ አሳይ እስራኤለይ ነ ቦላ ናጋራ ኦድ፥ ሞርከን ፆነትድ፥ ኔኮ ስሚድ፥ ነ ሱን ፄግድ፥ ሀ ኬን ነና ዎስኮ፥

²⁵ ነ ሳሎን ስአ። ነ አሳ እስራኤለ ናጋራ አቶ ያጋ፤ ነ ካሰ ኤንታዉነ ኤንታ ማይዛታስ እምዳ ቢታ ኤንታ ዛራ።

²⁶ “ነ አሳይ ነ ቦላ ናጋራ ኦን፥ ሳሎይ ጎርደትኮ፥ እር ቡኮና እፅን፥ ኤንቲ ሀ በሳ ስሚድ፥ ዎስኮ ነ ኤንታ ኡንኤዳ ግሾ፥ ነ ሱን ፄግድ፥ ባንታ ናጋራፐ ስምኮ፥

²⁷ ነ ሳሎን ስአ። ነ አይለታ ናጋራ፥ ነ አሳ እስራኤለ ናጋራ አቶ ያጋ። ኤንቲ ሄመታናዉ በሲያ ሎኦ ኦግያ ኤንታ ታማርሳ፤ ኔኒ ነ አሳስ እምዳ ቢታን እራ ቡክሳ።

²⁸ “ቢታ ቦላ ኮሽ ዎይኮ ቦሽ ዎይኮ ሌገይ ዎይኮ ቦለይ ዎይኮ ጎንዶይ ይስን ዎይኮ ሞርከይ ኤንታ ካታማታ ተቅን ዎይኮ ዮይ ዎይኮ ሀርገይ ይን፥

²⁹ ነ አሳ እስራኤለፐ ኦንካ ዎይኮ ነ አሳ ኡባይ ነና ዎስኮ፥ አይ አስካ ባ ዎዛናን ኡንኤትያባነ አዛንያባ ኤርድ፥ ሀ ፆሳ ኬኮ ስሚድ፥ ባ ኩሽያ ምጭኮ፥

³⁰ ነ ደእያ በሳን ሳሎን ስአ። ኤንታ ናጋራ አቶ ያጋ፤ ኤንታዉ ኦ። ኔኒ አሳ ዎዛና ኤረይሳዳ አሳ ኡባስ እያ ኦሱዋዳ ኦሱዋዳ እማ። አሳ ኡባ ዎዛና ኤረይ ነ ፃላላ።

³¹ ሄስካ ነ ኑ ማይዛታስ እምዳ ቢታን ባንታ ደኦ ላይ ኡባን ነዉ ያያና መላነ ነ ኦግያን ሄመታና መላሳ።

³² “እስራኤለ ግዶና ሀራ ቢታ አስ ነ ግታ ሱን ግሾነ ኔኒ ነ አሳስ ኦዳ ማላልስያ ኦሶታ ግሾ ሃሆ ቢታፈ ይድ፥ ሀ ፆሳ ኬኮ ስሚድ ዎስኮ፥

³³ ነ ደእያ በሳን ሳሎን ስአ። ሀራ ቢታ አሳይ ኦይችያባ ኡባ ኦ። ሀ አላምያን ደእያ አሳ ኡባይ ነ ሱን ኤራናዳነ ነ አሰ ግድዳ እስራኤለዳ ነዉ ያያናዳ ታ ኬፅዳ ሀ ኬይ ነ ጎይነትያ በሲ ግደይሳ ኤንቲ ኤራናዳ ሀራ ቢታ አሳይ ነና ዎስያባ ኡባ ኦ።

³⁴ “ኤንቲ ባንታ ሞርከታ ኦላና መላ ነ ኪትያ ዎደ ነ ዶርዳ ሀ ካታማኮነ ታ ነ ሱን ግሾ ኬፅዳ ሀ ኬኮ ስሚድ ነና ዎስኮ፥

³⁵ ኤንታ ዎሳነ ኤንታ ኦይሻ ሳሎን ስአ፤ ኤንታ ኦይሻ ዛራ።

³⁶ “ናጋራ ኦና አስ ባይና ግሾ ነ አሰ ግድዳ እስራኤለይ ናጋራ ኦድ ነና ቆህኮ ኔኒ ሸነታዳ ሞርከታስ አ እምን ሞርከት ኤንታ ድእድ ሃሆ ዎይኮ ማታ ቢታ ኤንታ ኤፍን፥

³⁷ ኤንቲ ሄ ድኤትዳ ቢታን ደእሸ ባንታ ዎዛናን ናጋራፐ ስምኮ፥ ‘ኑኒ ናጋራ ኦዳ፤ ኑኒ ቆህዳ፤ ኑኒ ኢታባ ሀንዳ’ ያግድ ነና ዎስኮ፥

³⁸ ባንታና ድእድ ኤፍዳ ሞርከታ ቢታን ደእሸ ኤንቲ ባንታ ኩመ ዎዛናንነ ኩመ ቆፋን ኔኮ ስምኮ፥ ኔኒ ኤንታ ማይዛታስ እምዳ ቢታኮ፥ ኔኒ ዶርዳ ካታማኮነ ታኒ ነ ሱን ግሾ ኬፅዳ ኬኮ ስሚድ ነና ዎስኮ፥

³⁹ ኤንታ ዎሳነ ኦይሻ ነ ደእያ በሳን ሳሎን ስአ፤ ኤንታዉ ፕርዳ፤ ኤንታ ናጋራ አቶ” ያጋ።

⁴⁰ “አቤት ታ ፆሳዉ፥ ሀ በሳን ዎስያ ዎሳ ነ አይፈይ ፄሎ፤ ነ ሀይይ ስኦ።

⁴¹ “አቤት ጎዳዉ፥ ፆሳዉ፥ ደንዳ፤ ዎልቃማ ነ ታቦትያራ ነ ሸምፖ በሳ ገላ። አቤት ጎዳዉ፥ ፆሳዉ፥ ነ ካህነት አቶተ ኤኮ፤ ነ ጌሻ አሳት ነ ኬሀተን ኡፋይቶ።

⁴² አቤት ጎዳዉ፥ ፆሳዉ፥ ኔኒ ትይዳ ካዋ አጎፋ፤ ነ አይልያ ዳዊታስ ነ ጫቅዳ መርና ሲቁዋ ቆፓ” ያግስ።