2 Taarike 5 - ጌሻ ማፃፋ

¹ ሶሎሞነይ ፆሳ ኬ ኦሶ ኡባ ፖልዳፐ ጉየ እያ አዋይ ዳዊቲ ጎዳስ ዱማይድ ዎዳ ብራ፥ ዎርቃነ ሀራ ሚሸታ ኡባ ኤህድ፥ ፆሳ ኬ ቡቁራ ምንጅያ በሳን ዎስ።

ታቦተይ ፆሳ ኬ ገልስ

² ሄሳፈ ጉየ፥ ካዎይ ሶሎሞነይ ጎዳ ቃላ ጫቆ ታቦትያ ዳዊታ ካታማ ግድዳ ፅዮነፐ ኤሀና መላ እስራኤለ ጭማታ፥ እስራኤለ ኮቻታነ ሶ አሳ ሀላቃታ የሩሳላመ ሺሽስ።

³ እስራኤለ አሳ ኡባይ ላፑን አጌናን፥ ሻቃራ ባለይ ቦንቸትያ ዎደ ካዋኮ ሺቅዶሶና።

⁴ እስራኤለ ጭማት ኡባይ ጋክን፥ ሌወት ታቦትያ ደንዶሶና።

⁵ ሌወትነ ካህነት ታቦትያ፥ ዱንካንያነ እያ ግዶን ደእያ ጌሻ ሚሸታ ኡባ ቶክድ ኤህዶሶና።

⁶ ካዎይ ሶሎሞነይነ እያራ ደእያ እስራኤለ ማባራ ኡባይ ታቦትያ ስንን ሺቅድ፥ ታይባናዉ ዳንዳኤቶና ዳሮ ዶርሰነ መሄ ያርሽዶሶና።

⁷ ካህነት ጫቆ ታቦተይ ፆሳ ኬ ኡባፈ ጌሻ በሳ ኤህድ፥ ክሩበታ ምስለታ ቀፈታፐ ጋርሳራ ዎዶሶና።

⁸ ምጨትድ ኡትዳ ክሩበታ ቀፈት ታቦትያነ ታቦትያ ቶክያ ካሶታ ካምዶሶና።

⁹ ካሶት ዳሮ አዱሰ ግድያ ግሾ፥ ኤንታ ፄራይ ኡባፈ ጌሻ በሳ ስንን ደእያ ጌሻ በሳን ኤቅዳ አስ በአናዉ ዳንዳኤስ፤ ሽን ጌሻ በሳፈ ካረራ በንተና። ኤንቲ ሀች ጋካናዉ ሄ በሳን ደኦሶና።

¹⁰ እስራኤለ አሳይ ግብፀ ቢታፈ ከይዳ ዎደ ጎዳይ ኤንታራ ጫቅዳ ኮሬባ ዙማን ሙሰይ ዎዳ ናምኡ ሎቸ ሹቻታፐ አትሽን፥ ታቦትያ ግዶን ሀራባይ ባዋ።

¹¹ ሄ በሳን ደእያ ካህነት ኡባይ ባንታ ኦያ በሳን በሳን ሻከቶና ደእሸ ባንታና ጎዳስ ዱማይዶሶና።

¹² ማዝሙረ ዛማርያ ሌወት ኡባይ፥ አሳፍ፥ ሄማንነ ኤዶታፐ፥ ኤንታ ናይትነ ኤንታ ዳቦት ሊኖ ጌተትያ ማኦ ማእዶሶና። ሄ ማኡዋ ማእድ፥ ዳላ፥ ዲነ ማስንቆ ኦይክድ፥ ያርሾ በሳፈ ዶሎሀ ባጋራ ኤቅዶሶና።

¹³ ፄታነ ላታሙ ካህነት ሞይዘ ፑናናዉ ኤንታራ ኤቅዶሶና። ኤንቲ ኡባይ ሞይዘ ፑንሸ፥ ዳላ ቃሸ፥ ዲ ዲፅሸነ ሀራ ሚሸታ ካእሸ፥ “ጎዳይ ኬሀ! እያ ሲቆይ መርናሳ” ያግድ ጎዳ ሳቦሶና።

¹⁴ ጎዳ ቦንቾይ ፆሳ ኬ ኩምዳ ግሾ፥ ሻራ ጋሶን ካህነት ባንታ ኦሱዋ ኦናዉ ዳንዳእቦኮና።