2 Taarike 34 - ጌሻ ማፃፋ

ይሁዳ ካዋ እዮስያሳ

¹ እዮስያስ ካዎትያ ዎደ እያዉ ላይ ሆስፑና፤ እ የሩሳላመን ሀስታማነ እስ ላይ ካዎትስ።

² እዮስያስ ጎዳ ስንን ሱረባ ኦስ፤ ኡሻች ሀድርስ ጎና ባ ማይዛ ዳዊታ ኦገን ሄመትስ።

³ እ ካዎትዳ ሆስፑን ላይን ቡሮ ዮጋ ደእሸ ባ ማይዛ ዳዊታ ፆሳ ኮይስ። እ ካዎትዳ ታማነ ናምአን ላይን ይሁዳንነ የሩሳላመን ደእያ ቃ ጎይኖ በሳታ፥ አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦዳ ምስለታ ይስስ።

⁴ እያ ኪታን፥ ባኣለ ያርሾ በሳታ ላልዶሶና፤ ኤንታፈ ቦላራ ደእያ እፃነ ጩይስያ ሚሸታ ትንችዶሶና። አሼራ ኤቃ ምስለታ፥ ማስድ ጊግስዳ ኤቃታነ ሴርስድ ኦዳ ምስለታ ጋጭድ ለ ከስዶሶና፤ ሄ ልያ ኤንታ ጎይንያ አሳታ ዱፎን ላልዶሶና።

⁵ እዮስያስ ኤንታ ካህነታ መቀ ሄ ያርሾ በሳታ ቦላ ፁግስ፤ ያትድ፥ ይሁዳነ የሩሳላመ ጌሽስ።

⁶ ምናሰ፥ ኤፍሬማነ ስሞና ቢታፈ ብድ ንፍታለመ ቢታ ጋካናዉ ደእያ ካታማታነ ላለትዳ በሳታ ኡባ ሄሳዳ ኦድ ጌሽስ።

⁷ እዮስያስ ያርሾ በሳታ ላልስ፤ አሼራ ኤቃ ምስለታነ ሀራ ኤቃ ምስለታ ትንቸረስ፤ እስራኤለን ደእያ እፃነ ጩይስያ በሳታ ቃንፀረስ። ሄሳፈ ጉየ፥ እዮስያስ የሩሳላመ ስምስ።

⁸ እዮስያስ ካዎትዳ ታማነ ሆስፑን ላይን ቢታነ ፆሳ ኬ ጌሽዳፐ ጉየ፥ ፆሳ ኬ ኦራና መላ አፃላ ናኣ ሳፋና፥ የሩሳላመ ካታማ ሃርያ ማእሰያነ እዮአካዛ ናኣ ዋና ፃፍያ እዮአክና ኪትስ።

⁹ ኤንቲ ካህነ ሀላቃ ካልቅያሳኮ ብዶሶና። ፐንገ ናግያ ሌወት ምናሰፐ፥ ኤፍሬማፐ፥ አትዳ እስራኤለ አሳ ኡባፈ ይሁዳፐ፥ ብንያመፐነ የሩሳላመን ደእያ አሳፐ ካሰ ሺሽድ ፆሳ ኬ ኤህዳ ሚሽያ ካልቀስ እምዶሶና።

¹⁰ ኤንቲ ፆሳ ኬ ኦራያ ሀላቃታስ እምን ኤንቲ ፆሳ ኬ ኦራናዳነ ዛሪድ ኬፃና መላ ኦሳንቾታስ እምዶሶና።

¹¹ ይሁዳ ካዎት ላልዳ ፆሳ ኬ ሎይናዉ ምነ ማሰትዳ ሹቹ ሻማና መላ አናፀታስነ ግምበይሳታስ ሚሸ እምዶሶና።

¹² አሳይ አማነትድ ኦሱዋ ፖልዶሶና። ኤንታ ቦላ ሹመትዳ ኦይዱ ሌወት፥ ማራራ ያራፐ ያሃታነ አብድዩ፥ ቃሃታ ያራፐ ማሱላማነ ዛካርያሳ። የ ሚሸ ካእ ኤርያ ሌወት ኡባይ፥

¹³ ዎልቃ ኦሶ ኦያ አሳታ ቦላነ ዱማ ዱማ ኦሶ ኦይሳታ ቦላ ሹመትዶሶና። ቃስ ሀራ ሌወት ፃፈ፥ ሀላቃነ ፐንገ ናገይሳታ ግድዶሶና።

ህገ ማፃፋይ በንትስ

¹⁴ ኤንቲ ፆሳ ኬ ይዳ ሚሽያ ከስያ ዎደ ካህነይ ካልቀይ ጎዳይ ሙሰ ባጋራ እምዳ ህገ ማፃፋ ደምስ።

¹⁵ ካልቀይ ዋና ፃፍያ ሳፋናኮ፥ “ታኒ ፆሳ ኬፈ ህገ ማፃፋ ደማስ” ያግስ። ሄ ማፃፋ ሳፋናስ እሚስ።

¹⁶ ሳፋን ማፃፋ ካዋኮ ኤፍድ፥ “ነ ሹማት ነ ኪታ ኡባ ኦዶሶና።

¹⁷ ፆሳ ኬን ደእያ ሚሽያ ኤክድ፥ ኦሱዋ ካልያ ሀላቃታስነ ኦያ አሳስ እምዶሶና” ያግስ።

¹⁸ ዋና ፃፈይ ሳፋን ካዋኮ፥ “ካህነይ ካልቀይ ታዉ ማፃፋ እሚስ” ያግድ ማፃፋ ካዋ ስንን ናባብስ።

¹⁹ ካዎይ ህገ ቃላ ስእዳ ዎደ አዛንድ ባ ማኡዋ ፔስ።

²⁰ ካዎይ፥ ካልቀ፥ ሳፋና ናኣ አክቃማ፥ ምክያሳ ናኣ አብዶና፥ ዋና ፃፍያ ሳፋናነ ካዎ ሹማ አሳያ ሀይሳዳ ያግድ ኪትስ፤

²¹ “ብድ ታ ግሾነ እስራኤለንነ ይሁዳን አትዳ አሳታ ግሾ ሀ በንትዳ ማፃፋን ፃፈትዳባ ጎዳ ኦይችተ። ሀ ማፃፋን ፃፈትዳ ኡባ ኦናዉ ኑ ማይዛት ጎዳ ቃላ ናግቦና ግሾ ጎዳይ ኑ ቦላ ባ ሀንቁዋ ጉስስ” ያግስ።

²² ካልቀይነ ካዎይ ኪትዳ አሳት ፆሳ ኬን ማኦ ናግያ ሀስራ ናአ፥ ትቁዋ ናአ፥ ሰለማ ማቾ ግድዳ ሁልዳ ጌተትያ ናበኮ ብድ እዮ ኦይችዶሶና። እያ የሩሳላመን ናምአን ካታማን ደአዉሱ።

²³ ሁልዳ ኤንታኮ፥ “ጎዳይ እስራኤለ ፆሳይ፥ ‘ህንተና ታኮ ኪትዳ ኡራስ ሀይሳዳ ያግድ ኦድተ’ ያጋሱ።

²⁴ ጎዳይ ሀይሳዳ ያጌስ፤ ‘ይሁዳ ካዋ ስንን ናባበትዳ ማፃፋን ፃፈትዳ ኢታ ባደ ኡባ ሀ በሳን ደእያ አሳ ቦላ ኤሀና ሀናይስ።

²⁵ ኤንቲ ታና አግድ ሀራ ፆሳታስ እፃነ ጩይስዶሶና፤ ኤንቲ ባንታ ኩሸን ኦዳባን ታና ሀንቀዶሶና። ሄሳ ግሾ፥ ታ ሀንቆይ ሀ በሳን ትገታና፤ ተቀተና።’

²⁶ ጎዳ ኦይቻናዉ ህንተና ኪትዳ ይሁዳ ካዋኮ፥ ‘ጎዳይ እስራኤለ ፆሳይ ኔኒ ስእዳ ቃላባ ሀይሳዳ ያጌስ፤

²⁷ ሀ በሳንነ ሀ በሳን ደእያ አሳ ቦላ ፆሳይ ኦደትዳባ ኔኒ ስእዳ ዎደ ነ ዎዛናይ ቦሸትን፥ ታ ስንን ነናተ ካዉሽዳ ግሾነ ነ ማኡዋ ፔዳ ታ ስንን ዬክዳ ግሾ ታኒ ነ ዎሳ ስአስ።

²⁸ ሄኮ፥ ታ ነና ነ ማይዛታ ጋና፤ ነ ሳሮ ሞገታና። ታ ሀ በሳንነ ሀ በሳን ደእያ አሳ ቦላ ኤሀና ኢታባ ነ አይፈይ በኤና’ ያግተ” ያጋሱ። ኤንቲ ብድ ሀ ቃላ ካዋስ ኦድዶሶና።

²⁹ ሄሳፈ ጉየ፥ ካዎይ እዮስያስ ይሁዳ ጭማታነ የሩሳላመ ጭማታ ኡባ ሺሽስ።

³⁰ ካዎይ ፆሳ ኬ ከይስ፤ ይሁዳ አሳይ፥ የሩሳላመ አሳይ፥ ካህነትነ ሌወት፥ ጉፈ ግታ ጋካናዉ ኡባይ እያራ እስፈ ከይዶሶና። ፆሳ ኬን በንትዳ ጫቆ ማፃፋ ቃላ ኡባ ካዎይ ኤንታዉ ናባብስ።

³¹ ካዎይ ባ በሳን ኤቅድ፥ ጎዳ ኦገን ሄመታናዉነ እያ ህግያ፥ እያ ዎጋነ እያ ኪታ ባ ኩመ ዎዛናንነ ባ ኩመ ሸምፑዋን ናጋናዉ፥ ቃስ ሀ ማፃፋን ፃፈትዳ ጫቁዋ ኦናዉ ጎዳ ስንን ጫቅስ።

³² የሩሳላመንነ ብንያመን ደእያ አሳ ኡባይ ኤቅድ ጫቃና መላ ኦስ፤ የሩሳላመን ደእያ አሳይ ፆሳ፥ ባንታ ማይዛታ ፆሳ ጫቆይ ገይሳዳ ኦዶሶና።

³³ እዮስያስ እስራኤለ ዛዋን ደእያ እፀትዳባ ኡባ ድግስ። እስራኤለን ደእያ ኡባይ ጎዳ፥ ባንታ ፆሳ ጎይናና መላ ኦስ። እዮስያስ ደእዳ ላይ ኡባን ኤንቲ ጎዳ፥ ባንታ ማይዛታ ፆሳ ካሎ አግቦኮና።