2 Taarike 23 - ጌሻ ማፃፋ

¹ ላፑን ላይን ዮዳሄይ ምንድ ማቶ ሀላቃታ ይሮሃማ ናኣ አዛርያሳ፥ ይሆና ናኣ ይስማኤላ፥ ኦቤዳ ናኣ አዛርያሳ፥ አዳያ ናኣ ማእሰያነ ዝክራ ናኣ ኤልሳፋፃ ሺሽድ ኤንታራ ጫቅስ።

² ኤንቲ ይሁዳ ኡባ ብድ ያን ደእያ ሌወታነ እስራኤለ ያራታ ሀላቃታ ኡባ ኤክድ የሩሳላመ ይዶሶና።

³ ሄ ሺቅዳ አሳ ኡባይ ፆሳ ኬን ካዉዋራ ጫቅዶሶና። ዮዳሄይ፥ “ካዋ ናኣ ሀይሳ በእተ! ጎዳይ ካሰ ዳዊታ ኮቻስ ቃላ ገልዳይሳዳ እ ካዎቶ።

⁴ ህንተ ኦናዉ በሲያባይ ሀይሳ፤ ሳምባታ ጋላስ ፆሳ ኬ ገልያ ካህነታፐነ ሌወታፐ ስኮይ ፐንግያ ናግተ።

⁵ ቃስ ስኮይ ካዎ ጋ ናግተ፤ ስኮይ ቃስ ባሶ ፐንግያ ናግተ። አሳ ኡባይ ፆሳ ኬ ዳባባን ሺቆ።

⁶ ኦያ ካህነታፐነ ሌወታፐ አትሽን፥ ኦንካ ፆሳ ኬ ገሎፖ። ኤንቲ ጌሽ ግድያ ግሾ ገሎና፤ ሽን ሀራ አሳ ኡባይ ጎዳ ኪታ ናግሸ ፆሳ ኬፈ ካረራ ደኦ።

⁷ “ሌወት ኦላ ሚሸ ባንታ ኩሸን ኩሸን ኦይክድ ካዋ ግዶይድ እ ከይያ ዎደነ ገልያ ዎደ እያራ ግዶ። ፆሳ ኬ ገልያ ኦንካ ሀይቆ” ያግስ።

⁸ ሌወትነ ይሁዳ አሳ ኡባይ ካህነይ ዮዳሄይ ኪትዳ ኡባ ኦዶሶና። ካህነይ ዮዳሄይ ኦሶፐ ከያናዉ በሲያ ሌወታ ከስድ የድቦና ግሾ፥ እሶይ እሶይ ሳምባታ ጋላስ ኦሶ ገለይሳታነ ኦሶፐ ከይያ ባ አሳ ኤክስ።

⁹ ካህነይ ዮዳሄይ ፆሳ ኬን ደእያ፥ ካዋ ዳዊታ ቶራ፥ ግታነ ጉ ጎንዳለታ ቶራ ሞጮናታስ እሚስ።

¹⁰ ካህነይ ዮዳሄይ አሳ ኡባይ ኦላ ሚሸ ባ ኩሸን ኩሸን ኦይክድ ፆሳ ኬ ዱገሀፐ ፑደሀ ጋካናዉ ያርሾ በሳ ማታንነ ፆሳ ኬ ማታን ካዋ ዩሾን ኤቃናዳ ኦስ።

¹¹ ዮዳሄ ካዋ ናኣ እዮኣሳ ካረ ከስድ፥ እያ ሁጰን ካላቻ ዎስ፤ ካዎታ ህገ ማፃፋ እያዉ እምድ ካዎይስ። ዮዳሄይነ እያ ናይት እዮኣሳ ትይድ፥ “ካዎይ ብራታ ቱሱ ግዶ” ያግዶሶና።

¹² አሳይ የፅሸነ ካዋ ሳቢሸ ኡፋይተይሳ ጎቶላ ስእዳ ዎደ አሳኮ ፆሳ ኬ ባሱ።

¹³ ካዎይ ፐንገን ቱሳ ማታን ኤቅዳይሳ በአሱ። ሀላቃትነ ዛየ ፑነይሳት ካዋ ማታን ደኦሶና፤ ይሁዳ አሳ ኡባይ ኡፋይትሸ ዛየ ፑኖሶና፤ ማዝሙረ የፀይሳት ስን አድ ባንታ የ ሚሸን ጋላቶሶና። ጎቶላ ባ ማኡዋ ፔዳ፥ “ሀይስ ጌላተ! ሀይስ ጌላተ!” ያጋዳ ዋሳሱ።

¹⁴ ካህነይ ዮዳሄይ ቶራ ሞጮናታኮ፥ “ጎቶላ ፆሳ ኬን ዎፕተ፤ እዮ ሳልፕያ ግዶራ አድ ካረ ከስተ፤ እዮ አሻናዉ ኮይያ አስ ደእኮ ዎተ!” ያግስ።

¹⁵ ሄሳ ግሾ፥ ኤንቲ እዮ ኦይክድ ካዎ ጋ ኤፍድ ፓራ ፐንገን እዮ ዎዶሶና።

¹⁶ ካህነይ ዮዳሄይ ባ ሁጰን፥ አሳ ኡባይነ ካዎይ፥ ጎዳ አስ ግዳናዉ ጫቅዶሶና።

¹⁷ ሄ ዎደ አሳ ኡባይ ባኣለ ኤቃ ኬ ብድ፥ ኬ ላልድ፤ ያርሾ በሳታነ ምስለታ ትንቸረዶሶና። ማታና ጌተትያ ባኣላ ካህንያ ያርሾ በሳታ ስንን ዎዶሶና።

¹⁸ ዮዳሄይ ካህነታነ ሌወታ ፆሳ ኬ ኦሱዋስ ሀላቃ ኦድ ሹምስ። ኤንታ ኦሶይ ሙሰ ህግያን ፃፈትዳይሳዳነ ካዎይ ዳዊቲ ኦድዳይሳዳ ያርሾ ያርሻናይሳ። ቃስ ካዎይ ዳዊቲ ኦድዳይሳዳ ማዝሙረ የፅሸ ቦንቻናይሳ።

¹⁹ ህግያን ፃፈትዳይሳዳ ቱና አስ ገሎና መላ ዮዳሄይ ፆሳ ኬ ፐንገን ናገይሳታ ዎስ።

²⁰ ዮዳሄይ ቶራ ሞጮናታ፥ ግታ አሳታ፥ ደርያ ሃረይሳታነ ሄ ቢታ አሳ ኡባ ኤክድ ካዋ ፆሳ ኬፈ ዱገ ኤህስ። ቆሞ ባጋ ፐንገራ ካዎ ጋ ገልድ ካዋ አራታ ቦላ ኡትስዶሶና።

²¹ ይሁዳ አሳ ኡባይ ኡፋይትስ። ጎቶላ ማሻን ሀይቅዳፐ ጉየ ካታማይ ዎፑ ግስ።