2 Taarike 22 - ጌሻ ማፃፋ

ይሁዳ ካዋ አካዝያሳ

¹ አራበታራ ይዳ ፓንጋት፥ እዮራማ ባይራ ናይታ ኡባ ዎዳ ግሾ የሩሳላመ አሳይ እዮራማ ናኣ፥ ኡባፈ ካሉዋ፥ አካዝያሳ እያ በሳን ካዎዶሶና። ሄሳ ግሾ፥ እዮራማ ናአይ አካዝያስ ኤንታ ቦላ ካዎ ግድስ።

² አካዝያስ ካዎትያ ዎደ እያዉ ላይ ላታማነ ናምአ። እ የሩሳላመን እስ ላይ ካዎትስ፤ እያ አይያ ጎቶላ፥ ዛንብራ ናኣ ናአ።

³ አካዝያስ ኢታተን ባናዳ እያ አይያ ዞርዳ ግሾ እ አካባ ሶ አሳ ኦግያን ሄመትስ።

⁴ እያ አዋይ ሀይቅዳፐ ጉየ አካባ ሶ አሳይ እያ ዞርያ ግሾ ያና ጋካናዉ አካባ ሶ አሳዳ እካ ጎዳ ስንን ኢታባ ኦስ።

⁵ አካዝያስ አካባ ሶ አሳ ዞርያ ካልድ፥ አካባ ናኣ፥ እስራኤለ ካዋ እዮራማራ እስፈ ሶረ ካዋ አዛሄላ ኦላናዉ ጋላዳን ደእያ ራሞታ ብስ። ያን ሶረ አሳት እዮራማ ጫድዶሶና።

⁶ እዮራም፥ ሶረ ካዋ አዛሄላራ ኦለትዳ ኦላን ጫደትዳ ግሾ ፓፃናዉ እዝራኤለ ብስ። እዮራማ ናአይ፥ ይሁዳ ካዎይ፥ አካዝያስ፥ ጫደትዳ አካባ ናኣ እዮራማ፥ ኦይቻናዉ እዝራኤለ ብስ።

⁷ አካዝያስ እዮራማ ኦይቻናዉ ብዳ ቡሳ፥ ፆሳይ አካዝያሳስ ሀይቆ ጋሶ ኦስ። አካዝያስ እዮራማ ሶ ጋክዳ ዎደ አካባ ኮቻ ይሳና መላ ጎዳይ ዶርዳ፥ ናምሳ ናኣ እዩ፥ ሞካናዉ ናምአይ ከይዶሶና።

⁸ እዩይ አካባ ኮቻ ቦላ ፕርዳ ፖልያ ዎደ ይሁዳ ሀላቃታነ አካዝያሳ ማድያ እያ ዳቦታ ናይታ ደምድ ዎስ።

⁹ እዩይ አካዝያሳ ኮይሽን ሳማረን ቆሰትድ ደእያ በሳፈ እዩ አሳት ደምድ እያኮ ኤህድ ዎዶሶና። “ባ ኩመ ዎዛናን ጎዳ ኮይዳ እዮሳፈፃ ናአ” ያግድ ሞግዶሶና። ሄሳ ግሾ፥ አካዝያሳ ሶ አሳፐ ካዎታናዉ ዳንዳእያ አስ ኦንካ አትቤና።

ጎቶሎነ እዮኣሳ

¹⁰ አካዝያሳ አይያ ጎቶላ ባ ናአይ ሀይቅዳይሳ ስእዳ ዎደ ደንዳዳ ይሁዳ ካዋ ኮቸ ኡባ ይሳሱ።

¹¹ ሽን ካዋ እዮራማ ናእያ ዮሳቤታ ሀይቃናዉ ደእያ ካዎ ናይታ ግዶፈ አካዝያሳ ናኣ እዮኣሳ ካይሳዳ ኤካሱ። እያነ እያ ድችያሮ ቆልአን ቆሳሱ። ሄሳዳ ኦዳ ጎቶላ ዎናዳ ካዋ እዮራማ ናእያ አካዝያሳ ምችያ ካህንያ ዮዳሄ ማችያ ዮሳቤታ እያ ቆሳሱ።

¹² ጎቶላ ሃርያ ዎደ ኡባን ናአይ ኤንታ ማታን ፆሳ ኬን ኡሱፑን ላይ ቆሰትድ ደእስ።