2 Taarike 20 - ጌሻ ማፃፋ

ሞአበነ አሞነ ፆነተ

¹ ሄሳፈ ጉየ፥ ሞአበትነ አሞነት ማኡናት እዮሳፈፃ ቦላ ደንድዶሶና።

² ጉ አሳት እዮሳፈፃኮ ይድ፥ “ማፅነ አባፈ ሄፍንን ደእያ ኤዶመፐ ዳሮ ኦላንቾት ነና ኦላናዉ ይዶሶና። ኤንቲ ሀሳሶን-ታማራን ደኦሶና” ያግድ ኦድዶሶና። (ሀሳሶን-ታማር ኤንጋዳስ ሀራ ሱን።)

³ እዮሳፈፅ ያይዳ ግሾ ጎዳ ኦይቻናዉ ቆፋ ቃችስ፤ ይሁዳ ቢታ ኡባን ፆማ አዋጅስ።

⁴ ይሁዳ አሳ ኡባይ ጎዳፐ ማዶ ኮያናዉ ሺቅዶሶና፤ ኤንቲ ጎዳፐ ማዶ ኮያናዉ ይሁዳ ካታማ ኡባፈ ይዶሶና።

⁵ እዮሳፈፅ፥ ይሁዳነ የሩሳላመ ሺቁዋ ግዶን፥ ፆሳ ኬን ደእያ ኦራ ዳባባ ስንን ኤቅስ።

⁶ ባ ቃላ ቁ ኦድ፥ “አቤት ጎዳዉ፥ ኑ አዋታ ፆሳዉ፥ ሳሎን ደእያ ፆሳይ ነና ግድኪ? ሳአን ደእያ ካዎተታ ኡባ ሃረይ ነና። ግታተነ ዎልቅ ነ ኩሸን ደእያ ግሾ ኔራ ኤቀታናዉ ዳንዳኤይ ባዋ።

⁷ አቤት ኑ ፆሳዉ፥ ካሰ ሀ ቢታን ደእያ አሳ፥ እስራኤለ ስንፈ የደዳ ነ ላግያ አብራሃመ ዘረስ መርናዉ እምዳይ ነና ግድኪ?

⁸ ኤንቲ ሀ ቢታን ደእዶሶና፤ ያን ነ ሱንስ ኬ ኬፅድ፥

⁹ ‘ኑ ቦላ ኢታ መቶይ ዎይኮ ኦል ዎይኮ ጋዶይ ዎይኮ ኮሽ ጋክኮ፥ ነ ሱንይ ደእያ ነ ኬ ስንንነ ነ ስንን ኤቅድ፥ ኑ መቱዋን ኔኮ ዋሳና። ነ ኑ ዋሱዋ ስአዳ ኑና አሻና’ ያግዶሶና።

¹⁰ “ሄኮ፥ ሀእካ፥ እስራኤለ አሳይ ግብፀፈ ከይዳ ዎደ፥ ኤንታ ቢታ ኦሎና መላ ኦዳ ኤንታ ይሶና መላ ድግዳ አሞነት፥ ሞአበትነ ሳይረት ሀ ቢታን ደኦሶና።

¹¹ ኑ ኦዶባስ ኤንቲ ኑስ ዛርዳባ በአ። ነ ኑስ እምዳ ላታ ቢታፈ ኤንቲ ኑና የደናዉ ይዶሶና።

¹² አቤት ኑ ፆሳዉ፥ ነ ኤንታ ፕርድኪ? ኑና ኦላናዉ ይዳ ሀ ዳሮ ኦላንቾታራ ኦለታናዉ ኑስ ዎልቅ ባዋ። ኑኒ ኦናባ ኤሮኮ፤ ሽን ኑ አይፈት ነና ፄሎሶና” ያግስ።

¹³ ይሁዳ አሳ ኡባይ ባንታ ናይታራነ ባንታ ማቸታራ ሺቅድ ጎዳ ስንን ኤቅዶሶና።

¹⁴ ሄ ዎደ ዛካርያሳ ናአይ ያሀዝኤል ሺቁዋ ግዶን ኤቅዳሽን ጎዳ አያናይ እያ ቦላ ዎስ። ዛካርያስ ባናያ ናአ፤ ባናይ ይኤላ ናአ፤ ይኤል ማታና ናአ፤ ማታን ሌወ ኮቸነ አሳፋ ያራ።

¹⁵ ጎዳ አያናይ ያሀዝኤላ ቦላ ዎን፥ “ካዋዉ እዮሳፈፃ፥ ይሁዳንነ የሩሳላመን ደእያ አሳዉ፥ ኡባይ ስእተ! ጎዳይ ህንተና ያጌስ። ‘ሀ ዳሮ ኦላንቾታ ጋሶን ያዮፍተነ ዳጋሞፕተ። ኦላይ ህንተባ ግዶናሽን ፆሳባ።

¹⁶ ዎንቶ ኤንታ ቦላ ከይድ ፂፃ ጌተትያ በሳ ፑደ ከይሽን ይሩኤላ መላ ቢታን ደእያ ዛንጋራ ዉርሰን ህንተ ኤንታ ደማና።

¹⁷ ሀ ኦላ ኦለተይ ህንተና ግደከታ። ይሁዳነ የሩሳላመ አሳዉ፥ ህንተ በሳ በሳ ኦይክድ ምንድ ኤቅተ። ጎዳይ ህንተና አሽያ አሹዋ በእተ። ያዮፍተ፤ ዳጋሞፍተ፤ ዎንቶ ኤንታ ቦላ ከይተ፤ ጎዳይ ህንተራ ግዳና’ ” ያግስ።

¹⁸ እዮሳፈፅ ሶምኦ ሳአ ጋድ ጎይንስ፤ ይሁዳ አሳ ኡባይ የሩሳላመን ደእያ አሳ ኡባይ ጎዳ ስንን ኩንድድ ጎይንዶሶና።

¹⁹ ቃሃታነ ቆረ ኮቻፈ ጉ ሌወት ኤቅድ ባንታ ቃላ ቁ ኦድ፥ ጎዳ እስራኤለ ፆሳ ጋላትዶሶና።

²⁰ ኤንቲ ዎንታ ጉራ ደንድድ ተቁሄ መላ ቢታ ብዶሶና። ኤንቲ ከይዳ ዎደ እዮሳፈፅ ደንድ፥ “ይሁዳንነ የሩሳላመን ደእያ አሳዉ ታኒ ገይሳ ስእተ። ጎዳን፥ ህንተ ፆሳን አማነትተ፤ ህንተ ምናና፤ ናበታ አማንተ ኡባይ ህንተዉ እንጀታና” ያግስ።

²¹ እዮሳፈፅ አሳራ ዞረትዳፐ ጉየ፥ “ጎዳ ጋላትተ፥ እያ ሲቆይ መርናሳ” ያግድ የፅሸነ እያ ጌሻ ቦንቹዋ ሳቢሸ ኦላንቾታ ስንራ ብያ አሳታ ሹምስ።

²² ኤንቲ ማዝሙረ የነ ጋላታ ዶምዳ ዎደ ይሁዳ ኦላናዉ ይዳ አሞነታ ቦላ፥ ሞአበታ ቦላነ ሳይረታ ቦላ ጎዳይ ዳጋማ የድስ።

²³ አሞነትነ ሞአበት ሳይረታ ቦላ ደንድድ፥ ኤንታ ኩመ ይስዶሶና። ኤንቲ ሳይረታ ይስዳፐ ጉየ ባንታ ግዶን እሶይ እሱዋ ይስዶሶና።

²⁴ ይሁዳ አሳይ መላ ቢታን ደእያ ኦላንቾታ በአናዉ ይዳ ዎደ ባንታ ሞርከት ደእያ በሳ በእዶሶና። ኤንታ አሀይ ቢታን ዝንእዳይሳ ደምዶሶና፤ ኤንታፈ እስ አስካ ከስ ኤክቤና።

²⁵ ሄሳፈ ጉየ፥ እዮሳፈፅነ እያ አሳይ ድኦ ኤካናዉ ብድ ሽንቀ፥ ኦላ ሚሸ፥ ማኦታነ ሀራ አልኦ ሚሸታ ደምዶሶና። ሽን ድኦ ኡባ ኤፋናዉ ዳንዳእቦኮና፤ ድእዳባይ ዳሮ ግድዳ ግሾ ሺሻናዉ ሄ ጋላስ ኤክስ።

²⁶ ኤንቲ ኦይዳን ጋላሳን ባራካ ዛንጋራን ሺቅድ ጎዳ ጋላትዶሶና። ሄሳ ግሾ ሄ በሳ “አንጆ ዛንጋራ” ያግድ ሱንዶሶና።

²⁷ ሄሳፈ ጉየ፥ ይሁዳ አሳይነ የሩሳላመ አሳ ኡባይ እዮሳፈፅ ካለን፥ ኡፋይሳን የሩሳላመ ስምዶሶና።

²⁸ ኤንቲ የሩሳላመ ጋክድ ዲራ፥ ማስንቆራነ ዛየራ ፆሳ ኬ ገልዶሶና።

²⁹ እስራኤለ ሞርከታ ጎዳይ ኦልዳይሳ ቢታን ደእያ ካዎተት ኡባይ ስእዳ ዎደ ያይዶሶና።

³⁰ ያትድ ፆሳይ እዮሳፈፃስ ኡባ ባጋራ ሸምፖ እምዳ ግሾ እያ ካዎተይ ሳሮተ ደምስ።

እዮሳፈፃ ዉርሰ

³¹ እዮሳፈፅ ይሁዳን ካዎትያ ዎደ እያ ላይ ሀስታማነ እቻሻ፤ እ የሩሳላመን ላታማነ እቻሹ ላይ ካዎትስ። እያ አይያ ሽልሀ ናእዉ አዙቦ።

³² እዮሳፈፅ ባ አዋ አሳ ኦግያን ሄመትስ፤ እ ሄ ኦግያፐ ሀድርስ ኡሻች ግቤና፤ ጎዳ ስንን ሱረባ ኦስ።

³³ ግዶሽን፥ ቃ ጎይኖ በሳታ ይስቤና፤ አሳይ ቡሮ ባ ኩመ ዎዛናን ባንታ አዋታ ፆሳኮ ስምቤና።

³⁴ እዮሳፈፅ ኦዳባይ ኮይሮፐ ዉርሰ ጋካናዉ እስራኤለ ካዎታ ታርከ ማፃፋን፥ ሀናና ናኣ እዩ ታርከ ማፃፋን ፃፈትስ።

³⁵ እስ ዎደ ይሁዳ ካዎይ እዮሳፈፅ ኢታባ ኦዳ እስራኤለ ካዋ አካዝያሳራ እስፈተ ኦስ።

³⁶ ናምአይ ዛልኤ ማርካበ መናዉ ዞረትዶሶና፤ ኤፅዮን-ጋብራን ማርካበታ መዶሶና።

³⁷ ግዶሽን ማሬሳ አደይ ዶዳ ናአይ አላዛር፥ “ኔኒ አካዝያሳራ እስፈተ መዳ ግሾ ነ ኦዳባ ጎዳይ ይሳና” ያግድ እዮሳፈፃ ቦላ ትንብተ ኦድስ። ሄሳ ግሾ፥ ማርካበት መቅዶሶና፤ ኤንቲ ዛልኤ ኦሱዋ ኦናዉ ዳንዳእቦኮና።