2 Taarike 2 - ጌሻ ማፃፋ

ፆሳ ኬ ኬፃናዉ ጊገተ

¹ ሶሎሞነይ ጎዳ ሱንስ ኬነ ባዉ ጋ ኬፃናዉ ሀልችስ።

² ሶሎሞነይ ቶሆስ ላፑን ታሙ ሙኩሉ አሳነ ገዘ ቢታን ሹቹ ቆአናዉ ሆስፑን ታሙ ሙኩሉ አሳ ዶርስ። ቃስ ኤንታ ዎችያ ሄ ሙኩሉነ ኡሱፑን ፄቱ አሳታ ኤንታ ቦላ ሹምስ።

³ ሶሎሞነይ ፅሮሳ ካዋ ክራማስ ኪታ ኪትድ፥ “ታ አዋይ ዳዊቲ ባ ጋ ኬፃና መላ ኔኒ ዝጋ የድዳይሳዳ ታዉካ የዳ።

⁴ ሄኮ፥ ሀእ ታ ጎዳ፥ ታ ፆሳ ሱንስ ኬ ኬፃናዉ ሀናይስ። ታ ያን ሳዎ ቶንኩ ግያ እፃነ ጩይሳናዉ፥ ኡባ ዎደ ጎዳ ስንን ኡይ ዎናዉነ ዎንታነ ኦማርስ፥ ሳምባታ ጋላሳን፥ አጌን ፄርያ ዎደነ ጎዳ ኑ ፆሳ ባኣለ ጋላሳታን ፁሳ ያርሾ ያርሻናዉ፥ ፆሳ ኬ ዱማያና። እስራኤለ አሳይ መርናዉ ኦና መላ ኪተትዳ ኦሶት ሀይሳታ።

⁵ “ኑ ፆሳይ ሀራ ፆሳታ ኡባፈ ግታ ግድያ ግሾ፥ ታ ኬፃናዉ ሀንያ ፆሳ ኬይ ግታ።

⁶ ሽን እያዉ ኬ ኬፃናዉ ዳንዳኤይ ኦኔ? ሳሎፐ ቃ ሳሎይ እያዉ ግደና! ያትን፥ ታ እያ ስንን እፃነ ጩይሳናዉነ ታ እያዉ ኬ ኬፃናዉ ኦኔ?

⁷ “ህዛ አሌቆ ኦሶ፥ ዎርቃ፥ ብራ፥ ናሰነ ብራታ ሴርስያ ኦሱዋነ ዞኦ ማኡዋ፥ ኦቻ ቴራ ዳንያ ማኡዋነ ካሎሰ ማኡዋ ጊግስያ ኤራተ ደእያ አሰ ታዉ የዳ። ታ አዋይ ዳዊቲ ይሁዳንነ የሩሳላመን ደእያ ኩሸ ሂላንቾታ ዶር ዎስ፤ እ ኤንታራ እስፈ ኦና።

⁸ ልባኖሰን ደእያ ነ አሳት ም ዋት ቃንፅያኮ ኤረይሳ ታ ኤራይስ። ሄሳ ግሾ፥ ኔኒ ታዉ ልባኖሰፐ ዝጋ፥ ፂዳነ ፃይ ም የዳ። ታ አሳት ነ አሳታራ ግድድ፥

⁹ ዳሮ ም ጊግሳና። ታኒ ኬፅያ ፆሳ ኬይ ግታነ ማላልስያባ።

¹⁰ ም ቃንፅያ ነ አይለታ ታኒ ላታሙ ሙኩሉ ኩንታለ ግስተነ ላታሙ ሙኩሉ ኩንታለ ባንጋ፥ ኦይዱ ፄቱ ሙኩሉ ልትሮ ዎይነነ ኦይዱ ፄቱ ሙኩሉ ልትሮ ሻማሆ ዛይተ እማና” ያግስ።

¹¹ ፅሮሳ ካዎይ ክራም ሶሎሞነኮ ዳብዳበ የድሸ፥ “ጎዳይ ባ አሳ ዶስያ ግሾ፥ እ ነና ኤንታ ቦላ ካዎስ።”

¹² ክራም ጉጅድ፥ “ፆሳ ኬነ ባዉ ጋ ኬፃና መላ ጭንጫ፥ አኬካነ ሂላ ናኣ ካዋ ዳዊታስ እምዳ፥ ሳሎ ሳኣ መዳ ጎዳይ፥ እስራኤለ ፆሳይ ጋላተቶ።

¹³ “ታኒ ክራም-አብ ጌተትያ ሂላንቾነ አኬካ አድያ ነዉ የዳስ።

¹⁴ እያ አይያ ዳነ ኮቸ፤ እያ አዋይ ፅሮሳ ቢታ አሳ። እ ዎርቃ፥ ብራ፥ ናሰ ብራታ፥ ብራታ፥ ሹቹነ ም ኦያ አስ፤ ኦቻ ቴራ ዳንያ ማኦ፥ ካሎሰ ማኦ፥ ዞኦ ማኦነ ሊኖ ማኦ ጊግስያ ኦሶ ኤሬስ። እ ዱማ ዱማ አሌቆታ ከስድ፥ ኦደይሳዳ ኡባ ኦናዉ ዳንዳኤስ። እ ኩሸ ሂላን ሎህዳ ነ አሳራነ ካሰ ነ አዋ፥ ዳዊታስ ኦዳ አሳራ እያ ኦስሳ።

¹⁵ ህዛ ነ ታ ጎዳይ እማና ግዳ ግስትያነ ባንጋ፥ ዛይትያነ ዎይንያ የዳ።

¹⁶ ኔኒ ልባኖሰፐ ኮይዳ ም ኑ ቃንፅድ ቃችድ፥ አባ ቦላራ ቶከትድ፥ ኔኮ ዮጰ ባናዳ ኦና። ያፐ ኔኒ የሩሳላመ ጋካናዉ ኤፍሳና” ያግስ።

¹⁷ እያ አዋይ ዳዊቲ ካሰ ታይብዳይሳዳ፥ ሶሎሞነይ እስራኤለ ቢታን ደእያ ካረ ቢታ አሳ ኡባ ታይብስ። ኤንቲ ፄታነ እሻታማነ ሄ ሙኩሉነ ኡሱፑን ፄታ ግድዶሶና።

¹⁸ ሶሎሞነይ ሄ አሳፐ ላፑን ታሙ ሙኩሉ አሳ ቶሆስ፥ ሆስፑን ታሙ ሙኩሉ አሳ ገዘ ቢታን ሹቻ ቆአናዉ ዶርስ፤ ኤንታ ዎቻናው ሄ ሙኩሉነ ኡሱፑን ፄቱ አሳ ሹምስ።