2 Taarike 18 - ጌሻ ማፃፋ

ምክያስ አካባስ ኦድዳ ትንብተ

¹ እዮሳፈፅ ዳሮ ዱረተነ ቦንቾ ደምዳፐ ጉየ አካባራ ቦሎትስ።

² ጉ ላይፈ ጉየ እዮሳፈፅ አካባ በአናዉ ሳማረ ብስ። አካብ እያዉነ እያራ ደእያ አሳስ ዳሮ ዶርስነ ቦሩ ሹክስ። ያትድ እዮሳፈፃ ጋላዳን ደእያ ራሞታ ኦላናዉ ባራ ባና መላ ማቅስ።

³ እስራኤለ ካዎይ አካብ ይሁዳ ካዋ እዮሳፈፃኮ፥ “ጋላዳን ደእያ ራሞታ ኦላናዉ ታራ ባኔ?” ያግድ ኦይችስ። እዮሳፈፅ፥ “ኤ፥ ታ ኔራ ባና፤ ታ ኦላንቾት ነ ኦላንቾታ፤ ኑ ኔራ ባና” ያግስ።

⁴ እዮሳፈፅ እስራኤለ ካዋኮ፥ “ግዶሽን፥ ነ ኮይሮታዳ ጎዳ ኦይቻ” ያግስ።

⁵ እስራኤለ ካዎይ ኦይዱ ፄቱ ናበታ ሺሽድ፥ “ታ ጋላዳን ደእያ ራሞታ ኦላናዉ ቦየ ቦፖ?” ያግድ ኦይችስ። ኤንቲ፥ “ባ፤ ፆሳይ ነ ኩሸን አድ እማና” ያግዶሶና።

⁶ ሽን እዮሳፈፅ፥ “ኑ ጎዳ ኦይቻናዉ ዳንዳእያ ሀራ ናበይ ሀይሳን ባዌ?” ያግስ።

⁷ እስራኤለ ካዎይ እዮሳፈፃኮ፥ “ኑ እያ ባጋራ ጎዳ ኦይቻናዉ ዳንዳእያ ሀራ ናበይ ይምላ ናአይ ምክያስ ደኤስ። ሽን እ ኡባ ዎደ ታዉ ኢታባ ኦዴስፐ አትሽን፥ ሎኦባ ኦድ ኤሮና ግሾ ታ እያ ዶስከ” ያግስ። እዮሳፈፅ፥ “ካዎይ ሀይሳዳ ጋናዉ በሰና” ያግስ።

⁸ እስራኤለ ካዎይ ባ ሞርናታፐ እሱዋ ፄግድ፥ “ይምላ ናኣ ምክያሳ ኤለ ኤካዳ ያ” ያግስ።

⁹ እስራኤለ ካዎይነ ይሁዳ ካዎይ እዮሳፈፅ ካዎ ማኦ ማእድ፥ ሳማረ ካታማ ገልያ ፐንገን ባንታ አራታን ኡትን ናበት ኡባይ ኤንታ ስንን ትንብተ ኦዶሶና።

¹⁰ ኤንታፈ እሶይ፥ ክንአና ናአይ ሰደቅያስ ብራታፐ ካጨታ ጊግስድ አካባኮ፥ “ጎዳይ፥ ‘ሶረት ያና ጋካናዉ ነ ኤንታ ሀ ካጨታን ቃይጫና’ ያጌስ” ያግስ።

¹¹ ሀራ ናበት ኡባይ፥ “ጎዳይ ራሞታ ነ ኩሸን አድ እማና ግሾ ባ፤ ኦላዳ ፆና” ያግዶሶና።

¹² ምክያሳ ፄጋናዉ ኪተትድ ብዳ ኡራይ፥ “ሄኮ፥ ሀራ ናበት ኡባይ እስ ዶና ግድድ ካዎይ ፆናናይሳ ኦድዶሶና። ነ ኦዳይካ ኤንታ ኦዳ መላ ግዶ፤ ሎኦባ ኦዳ” ያግስ።

¹³ ሽን ምክያስ፥ “ደኦ ጎዳይ ኤርያ መላ፥ ፆሳይ ታዉ ቆንጭስዳባ ኦዳና” ያግስ።

¹⁴ ምክያስ ካዋኮ ይዳ ዎደ ካዎይ፥ “ምክያሳ ኑኒ ጋላዳን ደእያ ራሞታ ኦላናዉ ቢኖየ ቦፕኖ?” ያግድ ኦይችስ። ምክያስ ካዋኮ፥ “ኤንቲ ነ ኩሸን አድ እመታና ግሾ ባዳ ኦላ” ያግስ።

¹⁵ ካዎይ፥ “ጎዳ ሱንን ቱማ ኦዳ፤ ሀራባ ታዉ ኦዶና መላ ታኒ ነና አፑን ቶሆ ጫቅሶ” ያግስ።

¹⁶ ምክያስ፥ “ታ እስራኤለ ኦላንቾት ኡባይ ሄንንቾይ ባይና ዶርሳዳ ደርያ ቦላ ላለትዳይሳ በአስ። ጎዳይ፥ ‘ሀይሳታ ካለያ አስ ባዋ፤ ኤንቲ ኡባይ ባንታ ሶ ሶ ሳሮ ቦ’ ያጌስ” ያግስ።

¹⁷ እስራኤለ ካዎይ እዮሳፈፃኮ፥ “እ ታዉ ኢታፐ አትሽን፥ ሎኦ ኦድ ኤረና ጋዳ ታኒ ነዉ ኦዳብክና?” ያግስ።

¹⁸ ምክያስ ጉጅድ ሀይሳዳ ያግስ፤ “ሀእ፥ ጎዳይ ግያባ ስአ! ጎዳይ ባ አራታን ኡትን ሳሎ ኦላንቾት እያ ኡሻቻ ባጋንነ እያ ሀድርሳ ባጋን ኤቅዳይሳታ በአስ።

¹⁹ ጎዳይ፥ ‘እስራኤለ ካዎይ አካብ ጋላዳን ደእያ ራሞታ ብድ ያን ሀይቃናዳ እያ ባለናይ ኦኔ?’ ” ያግስ። እሶይ፥ “ሀይሳዳ ግያ ዎደ ሀንኮይ ሄሳዳ” ግስ።

²⁰ ዉርሰን እስ አያን ከይድ ጎዳ ስንን ኤቅድ፥ “ታኒ እያ ባለና” ያግስ። ጎዳይ፥ “ዋታዳ ባለኔ?” ያግስ።

²¹ አያናይ፥ “ታ ባዳ፥ እያ ናበታ ኡባ ዶናን ዎርዶ አያና ግዳና” ያግስ። ጎዳይ፥ “ኤ፥ ነ እያ ባለና፤ ነዉ ሀናና፤ ባዳ ባለ” ያግስ።

²² ምክያስ፥ “ሄኮ፥ ጎዳይ ነና ይሳናዉ ቆፕዳ ግሾ ነ ናበታ ዶናን ዎርዶ አያና ዎስ” ያግስ።

²³ ክንአና ናአይ ሰደቅያስ ሺቅድ፥ ምክያሳ ባቅድ፥ “ጎዳ አያናይ ታና አግድ ነዉ ኦዳናዉ አዉራ አዴ?” ያግስ።

²⁴ ምክያስ፥ “ሄኮ፥ ነ ቆሰታናዉ ቆልአ ገልያ ዎደ ሄሳ ደማና” ያግስ።

²⁵ እስራኤለ ካዎይ ባ ኦላንቾታፐ እሱዋ ፄግድ፥ “ምክያሳ ኦይካ ኤፋዳ ካታማ ሃርያ አሞነስነ ታ ናኣ እዮኣሳስ እማ።

²⁶ ካዎይ ኤንታኮ፥ ‘ሀ አድያ ቃሾ ኬን የግተ፤ ታ ሳሮ ስማና ጋካናዉ ጉ ኡይፈነ ሃፈ አትሽን፥ ሀራባ አይባካ እያዉ እሞፕተ’ ” ያግድ ኪትስ።

²⁷ ምክያስ፥ “ቱማ፥ ነ ሳሮ ስማናባ ግድኮ፥ ጎዳይ ታዉ ኦድቤና። ቃስ፥ አሳዉ፥ ታ ኦድያባ አኬክተ” ያግስ።

አካባ ሀይቁዋ

²⁸ ሄሳፈ ጉየ፥ እስራኤለ ካዎይነ ይሁዳ ካዎይ እዮሳፈፅ ጋላዳን ደእያ ራሞታ ብዶሶና።

²⁹ እስራኤለ ካዎይ እዮሳፈፃኮ፥ “ታኒ ታ ማኡዋ ላማዳ ሀራ አስ ዳናዳ ኦላ ገላና፤ ሽን ኔኒ ነ ካዎ ማኡዋ ማአ” ያግስ። እስራኤለ ካዎይ ባ ማኡዋ ላምድ ሀራ አስ ዳንድ ኦላ ገልስ።

³⁰ ሶረ ካዎይ ባ ፓራ ጋረታ ኪትያ አሳታኮ፥ “ግታ ግድን ጉ፥ ሀራ ኦደራካ ኦለቶፍተ፤ እስራኤለ ካዋ ፃላላ ኮይድ ዎተ” ያግድ ኪትስ።

³¹ ፓራ ጋረታ ኪተይሳት እዮሳፈፃ በእዳ ዎደ፥ “ሀይስ እስራኤለ ካዋ” ያግድ እያራ ኦለታናዉ ስምዶሶና። እዮሳፈፅ ዋስን ጎዳይ እያ ማድድ ኤንታ ኩሸፐ አሽስ።

³² ፓራ ጋረታ ኪተይሳት እ እስራኤለ ካዋ ግዶናይሳ በእድ እያ ጎደይሳ አጋግዶሶና።

³³ እስ ኡራይ ጮ ባ ዶንግያ ዱክያ ዎደ እስራኤለ ካዋ ኦላ ማኦይ ጋሄትያ ሀሽያን ጫድስ። ካዎይ ባ ጋርያ ላግያ አድያኮ፥ “ጋርያ ጉየ ዛራዳ ታና ኦላ ግዶፈ ከሳ፤ ታኒ ኢታ ጫቸ ጫደታስ” ያግስ።

³⁴ ኦላይ ጎብያ ዎደ እስራኤለ ካዎይ አካብ ባ ፓራ ጋርያ ግዶን ዘምፕድ፥ ኦማርስ ጋካናዉ ሶረታ ስንን ጋምእስ። አው ዉልያ ዎደ እ ሀይቅስ።