2 Taarike 17 - ጌሻ ማፃፋ

ይሁዳ ካዋ እዮሳፈፃ

¹ አሳ ናአይ እዮሳፈፅ ባ አዋ በሳን ካዎትስ፤ እዮሳፈፅ እስራኤለ ኦላናዉ ባና ጊግስስ።

² ሚፅ ኦሰትዳ ይሁዳ ካታማታን ኦላንቾታ ዎስ፤ ይሁዳ ቢታንነ እያ አዋይ አስ ኦልድ ኦይክዳ ኤፍሬማ ቢታን ኦላንቾታ ዎስ።

³ እዮሳፈፅ፥ እያ አዋይ ዳዊቲ ኮይሮ ሄመትዳ ኦግያን ሄመትዳ ግሾነ ባኣለ ኤቃ ጎይኖና እፅዳ ግሾ ጎዳይ እያ አንጅስ።

⁴ እዮሳፈፅ ባ አዋ ኦገን ሄመትድ ጎዳ ኪታ ፖልስ። እስራኤለ ካዎት ኦዳ ኢታ ኦሶታ ኦቤና።

⁵ ጎዳይ እያ ይሁዳ ካዎተን ምንድ ኤስስ። ይሁዳ አሳ ኡባይ እያዉ እሞታ ኤህዶሶና፤ እ ዳሮ ዱረትስነ ቦንቸትስ።

⁶ እዮሳፈፅ ጎዳስ ኩመ ዎዛናን ኦያ አስ። ቃ ጎይኖ በሳታነ አሼራ ጌተትያ ፆሰ ኤቃ ምስለታ ይሁዳ ቢታፈ ይስስ።

⁷ እዮሳፈፅ ካዎትዳ ሄን ላይን ይሁዳ ካታማታን ታማርሳና መላ ባ ሞርናታ በንሃላ፥ አብድዩ፥ ዛካርያሳ፥ ናትናኤላነ ምክያሳ የድስ።

⁸ ኤንታራ ጉ ሌወታ ሻማያ፥ ናታና፥ ዛባዳ፥ አሳሄላ፥ ሳምራሞታ፥ ዮናታና፥ አዶንያሳ፥ ፆባነ ፆባዶና የድስ፤ ቃስ ኤንታራ ካህነታ ኤልሳማናነ እዮራማ የድስ።

⁹ ኤንቲ ጎዳ ህገ ማፃፋ ኤክድ ይሁዳ ቢታን ደእያ ካታማታ ኡባ ብድ ያን አሳ ታማርስዶሶና።

¹⁰ ይሁዳ ዩሾን ደእያ ካዎተታ ኡባ ጎዳይ ያሽስን፥ ኤንቲ እዮሳፈፃራ ኦለትቦኮና።

¹¹ ፍልስፄመፐ ጉ አሳት እዮሳፈፃስ እሞታነ ብራ ጊራ ኤህዶሶና፤ አራባት እያዉ ላፑን ሙኩሉነ ላፑን ፄቱ ዶርሳ ኡርገታነ ላፑን ሙኩሉነ ላፑን ፄቱ ኮለታ ኤህዶሶና።

¹² እዮሳፈፅ ምን ምን ብስ። ይሁዳን ሚፃታነ ሻሎ ምንጅያ ካታማታ ኬፅስ።

¹³ ይሁዳ ካታማታን ዳሮባ ምንጅስ። የሩሳላመን እያዉ ምኖ ኦላንቾት ደኦሶና።

¹⁴ ኤንቲ ባንታ አዋታ ሶ አሳን አሳን ሀይሳፈ ካልድ ፃፈትዶሶና። ይሁዳ ኮቻፈ ሻላቃይ አድና፤ እያራ ሄ ፄቱ ሙኩሉ ምኖ ኦላንቾት ደኦሶና።

¹⁵ አድና ካልድ ደእያ ሀላቃይ ዮሃና፤ እያራ ናምኡ ፄታነ ሆስፑን ታሙ ሙኩሉ ምኖ ኦላንቾት ደኦሶና።

¹⁶ ጎዳስ ባ ሸነን ባና ዱማይዳ ዝክራ ናአይ አማሳይ እያ ካልድ ደእያ ሄን ሀላቃ፤ እያራ ናምኡ ፄቱ ሙኩሉ ምኖ ኦላንቾት ደኦሶና።

¹⁷ ብንያመ ኮቻፈ ሀላቃይ ምኖ ኦላንቹዋ ኤልያዳ፤ እያራ ዶንገነ ጎንዳለ ኦይክያ ናምኡ ፄቱ ሙኩሉ ኦላንቾት ደኦሶና።

¹⁸ ኤልያዳ ካልድ ደእያ ሀላቃይ ዮዛባታ፤ እያራ ኦላ ባናዉ ዳንጭዳ እስ ፄታነ ሆስፑን ታሙ ሙኩሉ ኦላንቾት ደኦሶና።

¹⁹ ሀይሳቲ ካዋስ የሩሳላመን ኦዳይሳታ፤ ሀይሳቲ ይሁዳን ግምበትዳ ካታማታን ደእያ ካዎይ ዎዳ ኦላንቾታፐ ሀራ።