2 Taarike 14 - ጌሻ ማፃፋ

ይሁዳ ካዋ አሳ

¹ አብይ ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አስ ካዎትስ። እ ካዎትዳ ዎደ ቢታይ ታሙ ላይ ዎፑ ግድ ደእስ።

² አስ ጎዳ ባ ፆሳ ስንን ሎኦባነ ሱረባ ኦስ።

³ አስ አላጋ ፆሳታስ ያርሽያ በሳታነ ቃ ጎይኖ በሳታ ይስስ። ጎይናናዉ ሹቻፈ ኦሰትዳ ቱሳታ መንረስ። አሼራ ጌተትያ ፆሳ ምስለታ ቃንፀረድ የግስ።

⁴ ይሁዳ አሳይ ጎዳ ባንታ አዋታ ፆሳ ኮያና መላ፥ እያ ህግያነ እያ ዎጋ ናጋና መላ አስ ኪትስ።

⁵ ቃ ጎይኖ በሳታነ እፃነ ጩይስያ በሳታ ይሁዳ ካታማታፐ ይስዳ ግሾ እያ ካዎተ ላይን ቢታይ ዎፑ ግድ ደእስ።

⁶ ካዎይ አስ ይሁዳ ካታማታስ ሚፃታ ኬፅስ። ጎዳይ እያ ሸምፕስዳ ግሾ ቢታይ ሸምፕስ፤ እያ ላይን እያራ ኦንካ ኦለትቤና።

⁷ አስ ይሁዳ አሳኮ፥ “አነ ኑኒ ሀ ካታማታ ኤሶስ፤ ኤንታ ዩሾን ሚፃታ ኬፆስ፤ አዱሳ ሻኮ፥ ፐንገታነ ጎርደታ ጊግሶስ። ኑኒ ጎዳ ኑ ፆሳ ኮይዳ ግሾ ቢታይ ሀእካ ኑባ። ኑኒ እያ ኮይዳ፤ እ ኑስ ኡባ ባጋራ ሸምፖ እሚስ” ያግስ። ሄሳ ግሾ፥ ኤንቲ ካታማታ ኬፅድ ፖልዶሶና።

⁸ አሳስ ይሁዳ ኮቻፈ ዎጋ ጎንዳለታነ ቶራታ ዳንጭዳ ሄ ፄቱ ሙኩሉ ኦላንቾት ደኦሶና። ብንያመ ኮቻፈ ጉ ጎንዳለታ ዳንጭዳነ ዶንገን ዱከይሳት ናምኡ ፄታነ ሆስፑን ታሙ ሙኩሉ ኦላንቾት ደኦሶና። ሄሳት ኡባይ ምኖ ኦላንቾታ።

⁹ ዛራሀ ጌተትያ እስ ቶጰ አደይ እስ ምሎነ ኦላንቾታነ ሄ ፄቱ ፓራ ጋረታ ኤክድ ይሁዳ ኦላናዉ ይድ ማርሳ ጋክስ።

¹⁰ አስ እያራ ኦለታናዉ ከይድ ባ ኦላንቾታ ማርሳ ማታን ደእያ ፃፋታ ዛንጋራን ሳልፕስስ።

¹¹ አስ ጎዳ ባ ፆሳ ሀይሳዳ ያግድ ዎስስ፤ “አቤት ጎዳዉ፥ ዎልቅ ባይና ኦላንቾታ ዎልቃማ ኦላንቾታፐ አሸይ ነ መል ባዋ። አቤት ጎዳዉ፥ ኑ ፆሳዉ፥ ኑኒ ነናን አማነትድ፥ ሀ ዎልቃማ ኦላንቾታራ ኦለታናዉ ነ ሱንን ይዳ ግሾ ነ ኑና ማዳ። አቤት ጎዳዉ፥ ነ ኑ ፆሳ፤ ነና አስ ፆነና” ያግስ።

¹² ጎዳይ ቶጰ ኦላንቾታ አሳ ስንንነ ይሁዳ ኦላንቾታ ስንን ሾጭን ቶጰ ኦላንቾት ባቃትዶሶና።

¹³ አስነ እያራ ደእያ አሳይ ኤንታ ገራራ ጋካናዉ የደዶሶና። ቶጰ ኦላንቾታፐ ዳሮይ ሀይቅዳ ግሾ ኤንቲ ስሚድ ምናናዉነ ኦለታናዉ ዳንዳእቦኮና። ሄሳዳ ሀንድ፥ ቶጰ ኦላንቾት ጎዳንነ እያ ኦላንቾታን ፆነትዶሶና። ካዋ አሳ ኦላንቾት ዳሮ ድኦ ድእዶሶና።

¹⁴ ሄ ሄራን ደእያ አሳይ ጎዳይ ኦዳባ በእድ ዳሮ ዳጋምስ። አሳ ኦላንቾት ገራራ ዩሹዋን ደእያ ካታማታ ኡባ ቦንቅድ ይስዶሶና።

¹⁵ ቃስ መሄ ሞታ ኦልድ፥ ዳሮ ዶርሳነ ግማለታ ድእድ፥ የሩሳላመ ስምዶሶና።