2 Taarike 13 - ጌሻ ማፃፋ

ይሁዳ ካዋ አብያ

¹ ካዎይ እዮርባም ካዎትዳ ታማነ ሆስፑን ላይን አብይ ይሁዳን ካዎትስ።

² አብይ የሩሳላመን ሄ ላይ ካዎትስ። እያ አየ ሱንይ ምካዮ፤ እያ ግብአ አድያ ኡርኤላ ናአ። አብይነ እዮርባም ኦለትሸ ደእዶሶና።

³ አብይ ዶረትዳ ኦይዱ ፄቱ ሙኩሉ ምኖ ኦላንቾታ ኤክድ ኦላስ ከይስ። እዮርባም ዶረትዳ ሆስፑን ፄቱ ሙኩሉ ምኖ ኦላንቾታ ኤክድ አብያራ ኦለታናዉ ከይስ።

⁴ ሄሳፈ ጉየ፥ አብይ ደረይ ዳርያ ኤፍሬማ ቢታን ደእያ ፃማራይማ ደርያ ሁጰን ኤቅድ፥ ሀይሳዳ ያግስ፤ “ነኖ፥ እዮርባማ፥ ህንተኖ፥ እስራኤለ አሳዉ፥ ኡባይ ታ ግያባ ስእተ!

⁵ ጎዳይ እስራኤለ ፆሳይ ዳዊታነ እያ ኮቻይ እስራኤለ ቦላ መርናዉ ካዎታና መላ ዳዊታራ ማፅነን ጫቅዳይሳ ኤረከትዬ?

⁶ ግዶሽን፥ ዳዊታ ናኣ ሶሎሞነ አይለይ፥ ናባፃ ናአይ እዮርባም ደንድድ ባ ጎዳ ቦላ ማካልስ።

⁷ ሮብኣም ዮጋ፥ ኤር ባይናይሳነ ኤንታራ ኤቀታናዉ ዳንዳኦና ዎደ ፓና ላፋ አሳት እዮርባማኮ ሺቅድ ሶሎሞነ ናኣ ሮብኣማ ቦላ ደንድዶሶና።

⁸ “ጎዳይ ዳዊታ ኮቻስ እምዳ ካዎተራ ህንተ ኤቀታናዉ ቆፔታ። ህንተ ሄሳ ቆፕዳይ ህንተ ዳሮ ግድያ ግሾነ ፆሳታ ግዳና መላ እዮርባም ዎርቃፈ መዳ ማራት ህንተራ ደእያ ግሾሳ።

⁹ ጎዳስ ኦያ አሮና ኮቸ ግድዳ ኦያ ካህነታነ ሌወታ ህንተ የደደታ። ሀራ ቢታ አሳይ ኦይሳዳ ህንተዉ ሀራ ካህነታ ሹምደታ። ባና ዱማያናዉ እስ ዎፋኖነ ላፑን ማራዘ ኤክድ ያ ኦናካ ዎርዶ ፆሳታስ ካህነ ኦድ ሹማታ።

¹⁰ “ግዶሽን፥ ኑስ ጎዳይ ኑ ፆሳ፤ ኑኒ እያ አግቦኮ። ካህነ ግድድ ኦያ አሮና ኮቻት ኑስ ደኦሶና፤ ሌወት ኤንታ ማዶሶና።

¹¹ ኤንቲ ኡባ ጋላስ ዎንታነ ኦማርስ ጎዳስ ፁሳ ያርሾ ያርሾሶናነ ሳውያ እፃነ ጩይሶሶና። ጎዳ ስንን ዎያ ኡይ ጌሻ ፃርጴዛ ቦላ ዎሶና። ኦማርስ ኦማርስ ፆምፐ ዎያ ኮጫ ቦላ ታማ ኦይሶና። ኑኒ ጎዳ ኑ ፆሳ ኪታ ናጎስ፤ ሽን ህንተ እያ አግደታ።

¹² ፆሳይ ኑራ ደኤስ፤ እ ኑና ካለስ። ኦላ ሞይዘ ፑንያ እያ ካህነት ኑራ ደኦሶና፤ ኑኒ ህንተራ ኦላ ዶማናዉ ሞይዘ ፑናና። እስራኤለ አሳዉ፥ ጎዳራ ህንተ አዋታ ፆሳራ ኦለቶፍተ! ህንተ እያ ፆናናዉ ዳንዳኤከታ” ያግስ።

¹³ ሄ ዎደ እዮርባም ባ ኦላንቾታፐ እስ ጩጋ ኤንታፈ ጉየራ ዙግድ ናጋና መላ የድስ። አትዳ እስራኤለ ኦላንቾት ይሁዳ ኦላንቾታ ስንን ደእያ ዎደ ዙግድ ናግያ ኦላንቾት ኤንታፈ ጉየራ ደኦሶና።

¹⁴ ይሁዳ ኦላንቾት ጉየ ስሚድ ፄልያ ዎደ ኤንታ ኦላናዉ ይዳይሳት ጉየራነ ስንራ ደኤይሳ በእዳ ዎደ ጎዳኮ ዋስዶሶና፤ ካህነት ሞይዘ ፑንዶሶና።

¹⁵ ይሁዳ ኦላንቾት ኦላ ዋሶ ዋስዳ ዎደ ጎዳይ እዮርባማነ እስራኤለ አሳ ኡባ አብያ ስንንነ ይሁዳ ስንን ፆንስ።

¹⁶ እስራኤለ ኦላንቾት ይሁዳ ኦላንቾታ ስንፈ ባቃትን ፆሳይ ኤንታ ይሁዳ ኦላንቾታ ኩሸን አድ እሚስ።

¹⁷ አብይነ እያ ኦላንቾት ኤንታ ዲፍ ኦድ ዉርስዶሶና። ሄ ኦላን 500,000 ዶረትዳ እስራኤለ ኦላንቾት ሀይቅዶሶና።

¹⁸ እስራኤለ አሳይ ሄ ዎደ ፆነትዶሶና፤ ይሁዳ አሳይ ጎዳን ባንታ አዋታ ፆሳን አማነትዳ ግሾ ኤንታ ፆንዶሶና።

¹⁹ አብይ እዮርባማ የደድ እያፐ ቤተለ፥ ይሻናነ ኤፍሮና ኤንታ ጉታታራ ኦይክስ።

²⁰ አብይ ደእዳ ላይን እዮርባም ስሚድ ምንቤና። ጎዳይ እዮርባማ ሾጭን ሀይቅስ።

²¹ ግዶሽን፥ አብይ ምን ምን ብስ። አብይ ታማነ ኦይዱ ማቾ ኤክድ ላታማነ ናምኡ አደ ናይታነ ታማነ ኡሱፑን ማጫ ናይታ የልስ።

²² አትዳ አብይ ታርከይ፥ እ ኦዳባይነ እ ኦድዳባይ ናብያ እዶ ታርከ ማፃፋን ፃፈትስ።