2 Taarike 12 - ጌሻ ማፃፋ

ሽሻቅ የሩሳላመ ቦላ ደንድስ

¹ ሮብኣማ ካዎተይ ምንድ ኤቅዳ ዎደ እነ እስራኤለ አሳ ኡባይ ጎዳ ህግያ አጋግዶሶና።

² ኤንቲ ጎዳስ አማነቶና እፅዳ ግሾ ሮብኣም ካዎትዳ እቻሻን ላይን ግብፀ ካዎይ ሽሻቅ የሩሳላመ ቦላ ደንድስ።

³ እያዉ እስ ሙኩሉነ ናምኡ ፄቱ ፓራ ጋረት፥ ኡሱፑን ታሙ ሙኩሉ ፓራ አሳትነ ታይቦይ ባይና ሊበ፥ ሱካነ ቶጰ ኦላንቾት ደኦሶና።

⁴ ካዎይ ሽሻቅ ግምበትዳ ይሁዳ ካታማታ ኦይክድ የሩሳላመ ጋካናዉ ይስ።

⁵ ሄሳፈ ጉየ፥ ናበይ ሻማየይ ሮብኣማነ ሽሻቃ ያይድ የሩሳላመን ሺቅድ ደእያ ይሁዳ ሀላቃታኮ ይድ፥ “ጎዳይ፥ ‘ህንተ ታና አግዳ ግሾ፥ ታ ህንተና ሽሻቃ ኩሸን የጋስ’ ” ያግስ።

⁶ እስራኤለ ሀላቃትነ ካዎይ ሮብኣም፥ ባንታና ካዉሽድ፥ “ጎዳይ ፅሎ” ያግዶሶና።

⁷ ኤንቲ ባንታና ካዉሽዳይሳ ጎዳይ በእዳ ዎደ ሻማያኮ ሀይሳዳ ያግስ፤ “ኤንቲ ባንታና ካዉሽዳ ግሾ ታ ኤንታ ይስከ፤ ታ ኤንታ አሻና። ታ ሀንቆይ ሽሻቃ ባጋራ የሩሳላመ ቦላ ጉከና።

⁸ ግዶሽን፥ ታዉ ሃረተይሳንነ ሀራ ካዎታስ ሃረተይሳን ደእያ ዱማተ ኤንቲ ኤራና መላ ሽሻቃስ ሃረታና” ያግስ።

⁹ ግብፀ ካዎይ ሽሻቅ የሩሳላመ ኦልድ፥ ፆሳ ኬንነ ካዎ ጋን ደእያ ሻሎ ኡባ ኤክስ። ሶሎሞነይ ዎርቃፈ ኦስስዳ ጎንዳለታ ቦንቅስ።

¹⁰ እ ኤፍዳ ዎርቃ ጎንዳለታ ግሾ ካዎይ ሮብኣም ናሰ ብራታፐ ሀራ ጎንዳለታ ኦስስድ ካዎ ጋ ፐንገ ናገይሳታ ሀላቃታ ኩሸን ዎስ።

¹¹ ካዎይ ፆሳ ኬ ገልያ ዎደ ኡባን ፐንግያ ናገይሳት ሄ ጎንዳለታ ኦይክድ እያ ካሎሶና። ካዎይ ስምኮ ኤንቲ ዛሪድ ናገይሳታ ኬን ዎሶና።

¹² ሮብኣም ባና ካዉሽዳ ግሾ እ ዮና መላ ጎዳ ሀንቆይ እያፐ ስምስ። ይሁዳ ቢታ ኡባን ቃስ ሳእ እንጀትስ።

¹³ ካዎይ ሮብኣም ባና ምንድ የሩሳላመን ካዎትስ፤ ሮብኣም ካዎትዳ ዎደ እያዉ ላይ ኦይታማነ እስኖ። ጎዳይ ባ ሱንይ ያን ፄገታና መላ እስራኤለ ቢታ ኡባን ዶርዳ፥ የሩሳላመን ታማነ ላፑን ላይ ካዎትስ። ሮብኣማ አይያ አሞነ ማጫስ ናእሞ።

¹⁴ ሮብኣም ጎዳ ዎዛናፐ ጎይናናዉ ኮይቦና ግሾ ኢታባ ኦስ።

¹⁵ ሮብኣም ባ ካዎተ ዎድያን ኦዳባይ ኮይሮፐ ዉርሰ ጋካናዉነ እያ የለታ ማራይ፥ ናብያ ሻማያ ታርከ ማፃፋንነ ቆንጨ በእያ እዶ ታርከ ማፃፋን ፃፈትስ ግደኔ? ሮብኣም ነ እዮርባም ኡባ ዎደ ኦለትሸ ደእዶሶና።

¹⁶ ሮብኣም ሀይቅድ ባ ማይዛታ ጋክስ፤ እ ዳዊታ ካታማን ሞገትስ። እያ በሳን እያ ናአይ አብይ ካዎትስ።