2 Taarike 11 - ጌሻ ማፃፋ

¹ ሮብኣም የሩሳላመ ካታማ ጋክዳ ዎደ እስራኤለ ቢታ አሳራ ኦለትድ ካዎተ ባዉ ዛራና መላ ይሁዳፐነ ብንያመ ኮቻፈ ዶረትዳ 180,000 ኦላንቾታ ሺሽስ።

² ሽን ጎዳ ቃላይ ፆሳ አስ ግድዳ ሻማያኮ ይስ።

³ “ሶሎሞነ ናኣ፥ ይሁዳ ካዋ ሮብኣማ፥ ይሁዳንነ ብንያመን ደእያ እስራኤለ አሳ ኡባ ሀይሳዳ ያጋ፤

⁴ ‘ህንተ እሻ ግድዳ እስራኤለታራ ኦለታናዉ ቦፕተ። ሄሳ ታኒ ኦዳ ግሾ ህንተ ኡባይ ህንተ ሶ ሶ ስምተ’ ያጌስ” ያጋ። ኤንቲ ጎዳ ቃላ ስእድ እዮርባማ ኦላናዉ በይሳ አግድ ስምዶሶና።

ሮብኣማ ሚፃታ

⁵ ሮብኣም የሩሳላመን ኡትድ ሀይሳፈ ካልድ ፃፈትዳ ይሁዳነ ብንያመ ካታማታን ሚፃታ ኬፅስ።

⁶ ሄ ካታማት ቤተለመ፥ ኤፃማ፥ ተቁሄ፥

⁷ ቤት-ፁራ፥ ሶኮ፥ አዱላማ፥

⁸ ጌተ፥ ማሬሳ፥ ዚፋ፥

⁹ አዶራይማ፥ ላክሶ፥ አዜቃ፥

¹⁰ ፆርአ፥ ኤሎናነ ከብሮና።

¹¹ ሮብኣም ካታማታ ምንድ ኤንታዉ ሀላቃታ ሹምስ፤ ካ፥ ዛይተነ ዎይነ ኡሻ ያን ዎስ።

¹² ሄ ኬፀትዳ ካታማታ ኡባን ጎንዳለነ ቶራ ዎስ፤ ያትድ ኤንታ ዳሮ ምንስ። ሄሳዳ ኦድ ይሁዳነ ብንያመ ሃርስ።

¹³ እስራኤለ ኡባን ደእያ ካህነትነ ሌወት ኡባይ ባንታ ደእያ በሳፈ ሮብኣማኮ ይዶሶና።

¹⁴ ሌወት ባንታ ሄን ቢታነ ባንታ ሻሉዋ አግድ ይሁዳነ የሩሳላመ ይዶሶና። ኤንቲ ካህነ ግድድ ጎዳስ ኦና መላ እዮርባምነ እያ ናይት ድግዶሶና።

¹⁵ እዮርባም ቃ ጎይኖ በሳንነ እ ኤስዳ ዴሸነ ማራ ምስለታስ ኦያ ሀራ ካህነታ ሹምስ።

¹⁶ እስራኤለ ፆሳ ባንታ ዎዛናፐ ጎይናናዉ ኮይዳይሳት ጎዳስ ባንታ አዋታ ፆሳስ ያርሾ ያርሻናዉ ኩመ እስራኤለፐ ሌወታ ካልድ የሩሳላመ ይዶሶና።

¹⁷ ኤንታ ዩሳይ ይሁዳ ካዎተ ምንስ፤ ኤንቲ ሄ ላይ ኩመ ሶሎሞነ ናኣ ሮብኣማ ማድዶሶና። ኤንቲ ካዋ ዳዊታ ኦግያነ ካዋ ሶሎሞነ ኦግያ ካልድ፥ ሄ ላይ ሳሮ ደእዶሶና።

ሮብኣማ ሶ አሳ

¹⁸ ሮብኣም ማህላቶ ጌተትያ ማቾ ኤክስ። ማህላት አዋይ ዳዊታ ናኣ ያርሞታ፤ እ አይያ እሰየ ናኣ ኤልያባ ናእዉ አብካሎ።

¹⁹ ማህላታ ኦሮብኣመስ የኡሳ፥ ሳማረነ ዛሃማ ጌተትያ አደ ናይታ የላሱ።

²⁰ ሄሳፈ ጉየ፥ አበሰሎመ ናእዉ ማእኮ ኤክስ፤ ማእካ አብያ፥ አታያ፥ ዚዛነ ሳሎምታ ጌተትያ አደ ናይታ የላሱ።

²¹ ሮብኣም ባ ማቸታፐ ባ ላገታፐ አድ አበሰሎመ ናእዉ ማእኮ ዶስስ። እያዉ ታማነ ሆስፑን ማቸትነ ኡሱፑን ታሙ ላገት ደኦሶና። እ ላታማነ ሆስፑን አደ ናይታነ ኡሱፑን ታሙ ማጫ ናይታ የልስ።

²² ሮብኣም ማእክ ናኣ አብያ ባ በሳን ካዎያናዉ ቆፕዳ ግሾ እያ እሻታ ቦላ እያ ሀላቃ ኦድ ሹምስ።

²³ ሮብኣም ጭንጭድ ባ አደ ናይታ ይሁዳን፥ ብንያመ ቢታንነ ግምበትዳ ካታማታን ሻክ ሻክ ሹምስ፤ ኤንታዉ ዳሮ ካነ ዳሮ ማቾ ደምስ።