2 Taarike 1 - ጌሻ ማፃፋ

ሶሎሞነይ ጭንጫተስ ዎስስ

¹ ጎዳይ እያ ፆሳይ እያራ ደእያ ግሾነ እያ ዳሮ ግታይዳ ግሾ ዳዊታ ናአይ ካዎይ ሶሎሞነይ ባ ካዎተ ምንስ።

² ሶሎሞነይ እስራኤለ ኡባ፥ ሻላቃታ፥ ማቶ ሀላቃታ፥ ዳናታ፥ እስራኤለ አሳ ካለያ ኡባነ ሶ አሳ ሀላቃታ ፄግድ ሺሽስ።

³ ሄሳፈ ጉየ፥ ሶሎሞነይነ ሺቅዳ አሳ ኡባይ ጋባኦናን ደእያ ቃ ጎይኖ በሳ ብዶሶና። ጎዳ አይለይ ሙሰይ መላ ቢታን ኦዳ ዱንካነይ ያን ደኤስ።

⁴ ካሰ ዳዊቲ ታቦትያስ የሩሳላመን ዱንካነ ቶክድ፥ ቅርያት-ይኣርመፐ እ ጊግስድ ዎዳ በሳ ኤህስ።

⁵ ሁራ ናኣ ኡረ ናአይ ባፃልኤል ናሰ ብራታፐ ኦዳ ያርሾ በሳይ፥ ጋባኦናን ጎዳ ዱንካንያ ስንን ደኤስ። ሶሎሞነይነ ሺቅዳ አሳይ ጎዳስ ያን ጎይንዶሶና።

⁶ ሶሎሞነይ ዱንካንያ ስንን ደእያ ናሰ ብራታፐ ኦሰትዳ ያርሾ በሳኮ፥ ጎዳ ስን ብድ፥ እስ ሙኩሉ ፁሳ ያርሾ ያርሽስ።

⁷ ሄ ጋላስ ቃማ ፆሳይ ሶሎሞነስ ቆንጭድ፥ “ታ ነዉ አይ እማና መላ ኮያይ?” ያግስ።

⁸ ሶሎሞነይ፥ “ነ ታ አዋ ዳዊታ ግታ ሲቆን ዶሳዳሳ፤ ታና እያ በሳን ካዎዳሳ።

⁹ አቤት ጎዳዉ፥ ፆሳዉ፥ ነ ታ አዋ ዳዊታስ ካሰ ግዳ ቃላይ ፖለቶ። ነ ታና ሳአን ደእያ ባናዳ ዳርዳ አሳ ቦላ ካዎዳ ግሾ፥

¹⁰ ታ ሀ አሳ ካለና መላ ታዉ ጭንጫተነ አኬካ እማ። ሄስ ሀኖና እፅኮ፥ ሀ ግታ አሳ ኦን አይሳናዉ ዳንዳኢ?” ያግስ።

¹¹ ፆሳይ ሶሎሞነኮ፥ “ነ ዱረተ ዎይኮ ሻሎ ደማናዉ ዎይኮ ቦንቸታናዉ ዎይኮ ነ ሞርከት ሀይቃና መላ ዎይኮ ነ ላይይ አዱቃና መላ ኦይቾናሽን ታ ነና ካዎዳ ታ አሳ አይሳናዉ ጭንጫተነ አኬካ ኦይችዳ ግሾ፥

¹² ነዉ ጭንጫተነ አኬካ እማና። ቃስ ኔፐ ካሰ ደእዳ ካዎታስ ዎይኮ ኔፐ ጉየ ደንዳና ካዎታስ ባይና ዱረተ፥ ሻሎነ ቦንቾ ነዉ እማና” ያግስ።

¹³ ሶሎሞነይ ዱንካነይ ጋባኦናን ደእያ፥ ቃ ጎይኖ በሳፈ ስሚድ፥ የሩሳላመ ብድ እስራኤለ ቦላ ካዎትስ።

¹⁴ ሶሎሞነይ ፓራ ጋረታነ ፓራታ ሺሽስ። እያዉ እስ ሙኩሉነ ኦይዱ ፄቱ ፓራ ጋረትነ ታማነ ናምኡ ሙኩሉ ፓራት ደኦሶና። እ ኤንታ ፓራ ጋረታ ካታማታንነ ባራ የሩሳላመን ዎስ።

¹⁵ ካዎይ ዎርቃይነ ብራይ የሩሳላመን ሹቻዳ ዶረታናዳ፥ ጋን ቦቢ ድጭያ መላ ዝጋ ም ዳራና መላ ኦስ።

¹⁶ ሶሎሞነ ፓራት ግብፀፈነ ቃወ ቢታፈ ይዶሶና። ካዋ ዛልአንቾት ኤንታ ቃወፐ ሚሸን ሻምድ ኤሆሶና።

¹⁷ ኤንቲ እስ እስ ፓራ ጋርያ ኡሱፑን ፄቱ ብራ ሳንትመን፥ እስ እስ ፓራ እስ ፄታነ እሻታሙ ብራ ሳንትመን ግብፀፈ ሻምድ፥ ህተታ ካዎታ ኡባስነ ሶረ ካዎታስ ባይዞሶና።