2 Sameela 9 - ጌሻ ማፃፋ

ዳዊታነ መምፕቦስተ

¹ ዳዊቲ፥ “ዮናታና ግሾ ታኒ እያዉ ኬሀተ ኦናዉ ሳኦላ ኬፈ አትዳ አስ ደእሻ?” ያግድ ኦይችስ።

² ሄ ዎደ ሲባ ጌተትያ እስ አይለይ ሳኦላ ሶን ደኤስ። እ ዳዊታ ስን ያና መላ ፄግን፥ ካዎይ፥ “ኔኒ ሲቤ?” ያግድ ኦይችስ። ሲብ፥ “ኤ፥ ታኒ ነ አይልያ ሲባ” ያግስ።

³ ካዎይ፥ “ፆሳ ኬሀተ ታኒ በሳና መላ ሳኦላ ኬፈ አትዳ አስ ባዌ?” ያግስ። ሲብ፥ “ናምኡ ቶሆይ ስልዳ ዮናታና ናይታፐ እሶይ ሀኖ ጋካናዉ ፓፃ ደኤስ” ያግስ።

⁴ ካዎይ፥ “እ አዉን ደኢ?” ያግስ። ሲብ፥ “ሎዶባራ ጌተትያ በሳን አምኤላ ናኣ ማክራ ሶን ደኤስ” ያግስ።

⁵ ካዎይ ዳዊቲ ሎዶባራፐ አምኤላ ናኣ ማክራ ሶፐ መምፕቦስተ ኤህስስ።

⁶ ሳኦላ ናኣ ዮናታና ናአይ መምፕቦስተይ ዳዊታኮ ይድ፥ ዳዊታ ስንን ዝግድ ቦንችስ። ዳዊቲ፥ “መምፕቦስተ” ያግድ ፄግስ። እ፥ “አበ ታ ጎዳዉ፥ ታ ነ አይልያ” ያግስ።

⁷ ዳዊቲ፥ “ያዮፋ፤ ነ አዋ ዮናታና ግሾ ታኒ ነዉ ኬሀና። ነ አዋ አዋ ሳኦላ ጋድያ ኡባ ታኒ ነዉ ዛራና፤ ቃስ ኔኒ ኡባ ዎደ ታ ጋይታፐ ማና” ያግስ።

⁸ መምፕቦስተይ ዝግድ፥ “ሀይቅዳ ካና ዳንያ ታና ኔኒ ዉዳዳ ፄላናዉ ነ አይለይ ታኒ ኦኔ?” ያግስ።

⁹ ካዎይ ሳኦላ አይልያ ሲባ ፄግድ፥ “ሳኦላባነ እያ ሶ አሳባ ግድዳባ ኡባ ታኒ ነ ጎዳ ናኣ ናኣስ እማስ።

¹⁰ ነ ጎዳ ናኣ ናአይ ማና መላ ኔኒ፥ ነ ናይትነ ነ አይለት እያ ጋድያ ጎይድ፥ ካፅዳ ካ እያዉ ኤህተ። ግዶሽን፥ ነ ጎዳ ናኣ ናአይ መምፕቦስተይ ኡባ ዎደ ታ ጋይታፐ ማና” ያግስ። ሲባስ ታማነ እቻሹ አደ ናይትነ ላታሙ አይለት ደኦሶና።

¹¹ ሲብ፥ “ኔኒ ታ ጎዳይ፥ ካዎይ ነ አይልያ ኪትዳ ኡባ ታኒ ነ አይለይ ኦና” ያግስ። ሄሳ ግሾ፥ መምፕቦስተይ ካዋ ናይታፐ እሱዋ መላ ካዎ ጋይታፐ ሜስ።

¹² መምፕቦስተስ ምካ ጌተትያ ጉ ናእ ደኤስ። ሲባ ሶን ደእያ አሳ ኡባይ መምፕቦስተስ አይለ ግድዶሶና።

¹³ ናምኡ ቶሆት ስልዳ መምፕቦስተይ ኡባ ዎደ ካዋ ጋይታፐ ምሸ የሩሳላመን ደእስ።