2 Sameela 8 - ጌሻ ማፃፋ

ዳዊታ ፆኖታ

¹ ሄሳፈ ጉየ፥ ካዎይ ዳዊቲ ፍልስፄመታ ፆንድ ሃርስ፤ ያትድ መተግ-አማ ካታማ ፍልስፄመታ ኩሸፐ ኤክስ።

² ዳዊቲ ቃስ ሞአበታ ፆንስ። እ ኤንታ ቢታን ዝንእስድ ኩሸን ዋስ፤ ኤንታፈ ናምኡ ኩሽያ ዎድ፥ ሄን ኩሽያ ፓፃ አግስ። ያትን ሞአበት ዳዊታስ ሃረትድ ጊርዶሶና።

³ ረሆባ ናአይ፥ ሱባ ካዎይ፥ አድራዛር ኤፍራፂሳ ሻፋ ማታን ደእያ ባ ዛዋ ዛራናዉ ብዳ ዎደ ዳዊቲ እያ ኦልድ ፆንስ።

⁴ ዳዊቲ እያ አሳፐ እስ ሙኩሉነ ላፑን ፄቱ ፓራ አሳታነ ላታሙ ሙኩሉ ቶሆ አሳታ ድእስ። ዳዊቲ ጋረታ ጎቻናዉ ፄቱ ፓራታ አሽድ ሀራ ፓራታ ኡባስ ጋድያ ግልዳይስ።

⁵ ዳማስቆን ደእያ ሶረ ኦላንቾት ሱባ ካዋ አድራዛራ ማዳናዉ ይዳ ዎደ ዳዊቲ ኤንታፈ ላታማነ ናምኡ ሙኩሉ አሳ ዎስ።

⁶ ዳዊቲ ሶረ ካዎተን፥ ዳማስቆን፥ ኦላንቾታስ ሚፃ መስ። ያትን ሶረ አሳይ ዳዊታስ ሃረትድ ጊርዶሶና። ዳዊቲ ብዳ በሳ ኡባን ጎዳይ እያዉ ፆኖ እሚስ።

⁷ አድራዛራ ቶራ ሞጮናት ኦይክያ ዎርቃ ጎንዳልያ ዳዊቲ ኤክድ የሩሳላመ ኤህስ።

⁸ በፃሀነ በሮታ ጌተትያ አድራዛራ ካታማታፐ ካዎይ ዳዊቲ ዳሮ ናሰ ብራታ ኤክስ።

⁹ አድራዛራ ኦላንቾታ ኡባ ዳዊቲ ፆንዳይሳ ሀማታ ካዎይ ቶእ ስእስ።

¹⁰ ዳዊቲ አድራዛራ ኦልድ ፆንዳ ዎደ ሀዳድዘር ቶአራራ ኦለትሸ ጋምእዳ ግሾ እያ ሀሹ ጋናዉነ ሳሮናዉ ባ ናኣ ዮራማ ዳዊታኮ ኪትስ። ዮራም ዎርቃፈ፥ ብራፐነ ናሰ ብራታፐ ኦሰትዳ እሞታታ ዳዊታስ ኤህስ።

¹¹ ካዎይ ዳዊቲ ካሰ ጊርስያ ካዎተታ ኡባፈ ኤክዳ ዎርቃነ ብራ ኦዳይሳዳ ሀ እሞታታካ ጎዳስ ዱማይስ።

¹² እ ፆንዳ ካዎተት ኤዶመ፥ ሞአበ፥ አሞነ፥ ፍልስፄመነ አማለቃ። ሄሳዳካ ረሆባ ናኣ፥ ሱባ ካዋ አድራዛራ ኤክዳ ዲኡዋ ጎዳስ ዱማይስ።

¹³ ማፅነ ዛንጋራን ታማነ ሆስፑን ሙኩሉ ኤዶመ አሳታ ዳዊቲ ዎድ ስምዳፐ ጉየ እያ ሱንይ ከይስ።

¹⁴ ዳዊቲ ኤዶመ ቢታን ኦላንቾታ ሚፃ መስ፤ ሄ ቢታይ ዳዊታስ ሃረትስ። ዳዊቲ ብዳ በሳ ኡባን ጎዳይ እያዉ ፆኖ እሚስ።

ዳዊታ ሞርናታ

¹⁵ ዳዊቲ እስራኤለ ኡባ ቦላ ካዎትስ፤ ባ አሳ ኡባ ፅሎተንነ ሱረ ፕርዳን አይስስ።

¹⁶ ፃሩያ ናአይ እዮኣብ ቶራ ሞጮና ግድሽን፥ አህሉዳ ናአይ እዮሳፈፅ ታርከ ፃፈ።

¹⁷ አህፁባ ናአይ ሳዶቅነ አብያታራ ናአይ አብመለከ ካህነ ግድሽን፥ ሳራይ ቃስ ፃፈ።

¹⁸ ዮዳሄ ናአይ ባናያስ ካዋ ናገይሳታ ሀላቃ ግድሽን፥ ዳዊታ አደ ናይት ካዋ ዞረይሳታ።