2 Sameela 7 - ጌሻ ማፃፋ

ፆሳይ ዳዊታስ ገልዳ ቃላ

¹ ካዎይ ባ ጋን ዎፑ ግድ ኡትዳፐነ ጎዳይ እያ ዩሹዋን ደእያ እያ ሞርከታፐ ሸምፕስዳፐ ጉየ፥

² ናብያ ናታናኮ፥ “ታኒ ዝጋፐ ኬፀትዳ ኬን ደአይስ፥ ሽን ፆሳ ታቦተይ ዱንካነን ደኤስ” ያግስ።

³ ናታን፥ “ኦናዉ ነ ዎዛናን ቆፕዳባ ኡባ ኦ፤ ጎዳይ ኔራ ደኤስ” ያግስ።

⁴ ሽን ሄ ቃማ ጎዳ ቃላይ ናታናኮ ይድ፥

⁵ “ባዳ ታ አይልያ ዳዊታ ሀይሳዳ ያጋ፤ ‘ታኒ ዳና ኬ ኬፃናይ ነና ግዳካ።

⁶ ታኒ እስራኤለታ ግብፀ ቢታፈ ከስዳ ዎደፐ ዶማዳ ሀች ጋካናዉ ኬን ደአብከ፤ ታኒ ዱንካነን ያነ ሃነ ዩያሸ ደአስ።

⁷ ታኒ እስራኤለ አሳራ ዩይዳ በሳ ኡባን ታ አስ እስራኤለ ሄማና መላ ታኒ ሹምዳ፥ “ታዉ ዝጋ ምን አይስ ኬ ኬፃብኪ?” ጋዳ ኦይቻብከ’ ያግስ።

⁸ “ህዛ፥ ታ አይልያ ዳዊታስ ኦዳ፤ ‘ኡባፈ ዎልቃማ ጎዳይ ኔኮ ሀይሳዳ ያጌስ፤ ታኒ ነና ሄን በሳፈ፥ ዶርሰ ሄምያ ሶፐ ደንዳ ታ አሳ እስራኤለ ካለና መላ ኦስ።

⁹ ኔኒ ብዳ በሳ ኡባን ታኒ ኔራ ግዳስ፤ ነ ሞርከታ ኡባ ነ ስንፈ ይሳስ። ሀእ ዛራዳ ታኒ ሀ ሳአን ኤረትዳ ግታ አሳታዳ ነ ሱን ግታያና።

¹⁰ ታኒ ታ አሳ እስራኤለስ በሰ እማዳ፥ ኤንታ ሄ በሳን ቶካና። ኤንቲ ባንታ በሳን ዳና፤ ናምአን ዳጋሞኮና። ካሰ ዳይናታ ዎደፐ ዶምድ ሀንዳይሳዳ ህዛፐ ጉየ ኤንታ ኢታ አስ ሃረና።

¹¹ ታኒ ነና ነ ሞርከታ ኡባፈ ሸምፕሳና። “ ‘ሄሳ ቦላ ጉጅድ ጎዳይ ባ ሁጰን ታኒ ነዉ ኬ ኬፃና ያግድ ኦድስ።

¹² ነ ባረይ ዉርን፥ ሀይቃዳ ነ ማይዛታ ነ ጋክያ ዎደ ነ ጉልባታፐ ከይዳ ናአ ታኒ ደንና፤ እያ ካዎተ ምንና።

¹³ ታ ሱንስ ኬ ኬፃናይ እያ፤ ታኒ እያ አራታ መርናዉ ምን ኤሳና።

¹⁴ ታኒ እያዉ አዋ ግዳና፤ እካ ታዉ ናአ ግዳና። እ ባልያ ዎደ ታኒ እያ አሳ ፃምአን፥ አስ ሾጭያ ልሶን ሴራና።

¹⁵ ሽን ታኒ ነ ስንፈ ድግዳ ሳኦላፐ ታ ኬሀተይ ኤከትዳይሳዳ እያፐ ኩም ኤከተና።

¹⁶ ነ ኮቻትነ ነ ካዎተይ ታ ስንን መርናዉ ዳና፤ ነ አራታይ መርናዉ ምንድ ኤቃና’ ” ያጋ።

¹⁷ ናታን ጎዳይ እያዉ ቆንጨን በስዳ ቃላ ኡባ ዳዊታስ ኦድስ።

ዳዊታ ዎሳ

¹⁸ ሄሳፈ ጉየ፥ ካዎይ ዳዊቲ ግዶ ገልድ ጎዳ ስንን ኡትድ ሀይሳዳ ያግድ ዎስስ። “አቤት ታ ጎዳ ፆሳዉ፥ ሀች ጋካናዉ ኔኒ ሀይሳ ኡባ ኦናዉ ታ ኦኔ? ታ ሶ አሳይካ አይቤ?

¹⁹ አቤት ታ ጎዳዉ፥ ፆሳዉ፥ ሀይስ ነ አይፈ ስንን ጉ ዳንን፥ ስንፈ ነ አይልያ ኮቻታስ ኦናባ ኦዳዳሳ። ታ ጎዳ ፆሳዉ፥ ኔኒ አሳራ ኦደትያ ኦገይ ሀይሴ?

²⁰ “ሀይሳፈ አያባ ታኒ፥ ዳዊቲ አይ ጋናዉ ዳንዳእያና? ታ ጎዳ ፆሳዉ፥ ኔኒ ታና ነ አይልያ ኤራሳ።

²¹ ኔኒ ነ ቃላ ግሾ፥ ነ ዎዛና ቆፋዳ ሀ ግታባ ኦዳ ታና ነ አይልያ በሳዳሳ።

²² “አቤት ታ ጎዳ ፆሳዉ፥ ኔኒ ግታ። ነ መል ባዋ፤ ኑኒ ኑ ሀይን ስእዳይሳዳ ኔፐ አትሽን፥ ሀራ ፆሲ ባዋ።

²³ ነ አሰ ኦናዉ ግብፀፈ ዎዝዳ ነ አሳ እስራኤለ ዳንያ ሀራ ካዎተ ሳአ ቦላ ባዋ። ኔኒ ኤንታዉ ኦዳ ግታነ ማላልስያ ኦሶታ ጋሶን ነ ሱንይ ቢታን ኤረትስ። ኔኒ ነ አሳ ስንፈ ሀራ ካዎተታነ ኤንታ ፆሳታ ጎዳ ከሳዳሳ።

²⁴ ነ አሳ እስራኤለ መርናዉ ነባ ኦዳሳ፤ ምንዳሳ። አቤት ጎዳዉ፥ ነ ኤንታ ፆሳ ግዳዳሳ።

²⁵ “አቤት ታ ጎዳዉ፥ ፆሳዉ፥ ኔኒ ነ አይልያስነ እያ ኬስ ኦና ጋዳ ገልዳ ቃላ መርናዉ ናጋ፤ ነ ቃላ ኦ።

²⁶ ሄሳን ነ ሱንይ መርናዉ ግታ ግዳና። አሳይ ነና፥ ‘ኡባፈ ዎልቃማ ጎዳይ እስራኤለ ፆሳ’ ያጋና። ነ አይልያ ዳዊታ ኮቻትካ ነ ስንን ምንድ ኤቃና።

²⁷ “አቤት ኡባፈ ዎልቃማ ጎዳዉ፥ እስራኤለ ፆሳዉ፥ ኔኒ፥ ‘ነ ኮቻት መርናዉ ካዎታና’ ያጋዳ ታዉ ነ አይልያስ ጫቃዳሳ። ሄሳ ግሾ፥ ታኒ ነ አይለይ ሀ ዎሳ ዎሳናዉ ፃላስ።

²⁸ አቤት ታ ጎዳ ፆሳዉ፥ ኔኒ ፆሰ! ነ ቃላይ ቱማ፤ ኔኒ ሀ ሎኦባታ ኦና ጋዳ ታዉ ነ አይልያስ ኦዳዳሳ።

²⁹ ነ ስንን መርናዉ ዳና መላ ነ አይልያ ኮቻ አንጃ። አቤት ታ ጎዳ ፆሳዉ ነ ግዳይሳዳ ነ አንጅኮ ነ አይልያ ኬይ መርናዉ አንጀታና” ያግድ ዎስስ።