2 Sameela 6 - ጌሻ ማፃፋ

ታቦተይ የሩሳላመ ስምስ

¹ እስራኤለ ግዶፈ ዶረትዳ ሀስታሙ ሙኩሉ አሳታ ዳዊቲ ዛሪድ ሺሽስ።

² ዳዊቲነ እያ አሳ ኡባይ ይሁዳ ባላ ካታማፐ ደንድድ፥ ክሩበታፐ ግዶን ባ ካዎተ አራታ ቦላ ኡትዳ ኡባፈ ዎልቃማ ጎዳ ሱንን ፄገትዳ ፆሳ ታቦትያ ኤሀናዉ ብዶሶና።

³ ኤንቲ ፆሳ ታቦትያ ኦራ ጋረን ዎድ፥ ደረ ሁጰን ደእያ አምናዳበ ሶፐ ኤህዶሶና። አምናዳበ ናይት ኦዝነ አህዮይ ኦራ ጋርያ ካለሶና።

⁴ ደረ ሁጰን ደእያ አምናዳበ ሶፐ ፆሳ ታቦትያ ኤህያ ዎደ አህዮይ ታቦትያፐ ስንራ ሄመቴስ።

⁵ ዳዊቲነ እስራኤለ አሳ ኡባይ ዲን፥ ማስንቆን፥ ካራቦን ዳላንነ ሻሾተን ካእሸ ባንታ ኩመ ዎልቃን ጎዳ ስንን ኡፋይትድ ቦንቾሶና።

⁶ ናኮን ካ ቡክያ ዉዱማ ጋክያ ዎደ ቦራት በትን፥ ኦዝ ባ ኩሽያ የድድ፥ ፆሳ ታቦትያ ኦይክስ።

⁷ ኦዝ ታቦትያ ቦችዳ ግሾ ጎዳ ሀንቆይ እያ ቦላ ኤፅስ። ፆሳይ እያ ሾጭን ሄ በሳን ፆሳ ታቦትያ ማታን ሀይቅስ።

⁸ ጎዳ ሀንቆይ ኦዛ ሾጭዳ ግሾ ዳዊቲ አዛንስ። ሄ በሳይ ሀች ጋካናዉ ኦዝ ሾጨትዳ በሳ ጌተቴስ።

⁹ ሄ ጋላስ ዳዊቲ ጎዳ ያይዳ ግሾ “ጎዳ ታቦተይ ታኮ ዋንድ ያኔ?” ያግስ።

¹⁰ ሄሳ ግሾ፥ እ ጎዳ ታቦትያ ባራ ዳዊታ ካታማ ኤሀናዉ ኮይቤና። ሄሳ አግድ ጋተ አድያ አብዳራ ሶ ኤፍስ።

¹¹ ጎዳ ታቦተይ አብዳራ ሶን ሄ አጌና ጋምእስ፤ ጎዳይ አብዳራነ እያ ሶ አሳ ኡባ አንጅስ።

¹² ፆሳ ታቦትያ ግሾ ጎዳይ አብዳራ ሶ አሳነ እያዉ ደእያ ኡባ አንጅዳይሳ ካዎይ ዳዊቲ ስእስ። ሄሳ ግሾ፥ ዳዊቲ አብዳራ ሶ ብድ፥ ፆሳ ታቦትያ ዳዊታ ካታማ ኡፋይሳን ኤህስ።

¹³ ዳዊቲ ጎዳ ታቦትያ ቶክዳ አሳት ኡሱፑና ታንጎ ታንግዳ ዎደ ኤንታ ኤስድ፥ እስ ኮርማነ እስ አንቃራ ማር ያርሽስ።

¹⁴ ዳዊቲ ሊኖፐ ኦሰትዳ ኤፉደ ማእድ፥ ባዉ ደእያ ዎልቃ ኡባን ጎዳ ስንን ዱርስ።

¹⁵ ዳዊቲነ እስራኤለ አሳ ኡባይ ኡፋይሳን እልልሸነ ሞይዘ ፑንሸ ጎዳ ታቦትያ ዳዊታ ካታማ ኤህዶሶና።

¹⁶ ጎዳ ታቦተይ ዳዊታ ካታማ ገልያ ዎደ ሳኦላ ናእያ መልኮላ ማስኮተራ ፄላዳ፥ ካዎይ ዳዊቲ ጎዳ ስንን ጉፕሽንነ ዱርሽን በአዳ ባ ዎዛናን ካሱ።

¹⁷ ዳዊቲ ጎዳ ታቦትያ ዎናዉ ቶልዳ ዱንካንያ ግዶን ታቦትያ ዎን፥ ዳዊቲ ፁሳ ያርሾነ እስፈተ ያርሾ ጎዳስ ያርሽስ።

¹⁸ ዳዊቲ ፁሳ ያርሾነ እስፈተ ያርሾ ያርሽዳፐ ጉየ ኡባፈ ዎልቃማ ጎዳ ሱንን አሳ አንጅስ።

¹⁹ እስራኤለ አሳ ኡባስ፥ ማጫስ አደስ ሁጰን ሁጰን እስ እስ ኡይ፥ እስ እስ ቃንፆ አሾነ እስ እስ ዎይነ ኑካ ግሽስ። ሄሳፈ ጉየ አሳ ኡባይ ባ ሶ ሶ ስምስ።

²⁰ ዳዊቲ ባ ሶ አሳ አንጃናዉ ሶ ስምዳ ዎደ ሳኦላ ናእያ መልኮላ እያ ሞካናዉ ከያዳ፥ “ፓና አሳት ካሎ ሄመተይሳዳ ሀች እስራኤለ ካዎይ ባ ማጫ አይለታ ስንን ካሎትድ አይ መላ ቦንቸትደ!” ያጋሱ።

²¹ ዳዊቲ፥ “ነ አዋፐነ እያ ሶ አሳፐ አድ ባ አሳ እስራኤለ ካለና መላ ታና ዶርዳ ጎዳ ስንን ዱራስ። ታኒ ጎዳ ቦንቾስ ዱርሳ አግከ።

²² ታኒ ሀይሳፈ አዳ ቡሮ ታና ቶቻና፤ ታናተ ዝቅ ኦና። ሽን ኔኒ ግዳ ማጫ አይለታ ስንን ታ ቦንቸታና” ያግስ።

²³ ሳኦላ ናእያ መልኮላ ሀይቃና ጋካናዉ ናአ የላቡኩ።