2 Sameela 5 - ጌሻ ማፃፋ

ዳዊቲ እስራኤለ ቦላ ካዎትስ

¹ እስራኤለ ዛረ ኡባይ ዳዊታኮ ከብሮና ይድ፥ “ኑኒ ነ አሾነ ነ ሱ።

² ካሰ ሳኦል ኑስ ካዎ ግድድ ደእያ ዎደካ እስራኤለ አሳ ኦላስ ካለዳይ ነና። ጎዳይ ነና፥ ‘ኔኒ ታ አሳ እስራኤለ ሄማና፤ ኤንታ ቦላ ካዎታና’ ያግድ ቃላ ገልስ” ያግዶሶና።

³ እስራኤለ ጭማት ኡባይ ካዋ ዳዊታኮ ከብሮና ይዶሶና፤ እ ኤንታራ ከብሮናን ጎዳ ስንን ጫቅስ፤ እስራኤለ ቦላ ካዎታና መላ ዳዊታ ትይዶሶና።

⁴ ዳዊቲ ካዎትያ ዎደ እያዉ ሀስታሙ ላይ፤ እ ኦይታሙ ላይ ካዎትስ።

⁵ ከብሮናን ይሁዳ ቦላ ላፑን ላይነ ኡሱፑን አጌና ካዎትስ፤ የሩሳላመን እስራኤለ ቦላነ ይሁዳ ቦላ ሀስታማነ ሄ ላይ ካዎትስ።

⁶ የሩሳላመን ደእያ ያቡሰ አሳ ኦላናዉ ዳዊቲነ እያ አሳይ ብዶሶና። ያቡሰ አሳይ፥ “ዳዊቲ ሀ ካታማ ገላናዉ ዳንዳኤና” ግድ ቆፕዳ ግሾ ሀር አቶሽን፥ “ቆቀትነ ዎበት ነና ተቃናዉ ዳንዳኦሶና፤ ነ ሀ ካታማ ገላካ” ያግዶሶና።

⁷ ግዶሽን፥ ዳዊቲ ፅዮነን ደእያ ኤንታ ሚፃ ኦይክን፥ እያ ዳዊታ ካታማ ግዳሱ።

⁸ ሄ ጋላስ ዳዊቲ፥ “ያቡሰ አሳ ኦልድ ኦይክያ ኦንካ ዳዊታ ሞርከ ግድዳ ዎበትነ ቆቀት ደእያ በሳ ጋካናዉ ሻፋራ ፑደ ከያናዉ ኮሼስ” ያግስ። ሄሳ ግሾ፥ “ቆቀትነ ዎበት ጋ ገሎኮና” ጌተትስ።

⁹ ዳዊቲ ሄ ሚፃ ኦይክድ፥ ያን ደእስ፤ ሄ ሚፃ ዳዊታ ካታማ ያግድ ሱንስ። ዳዊቲ ሚሎፐ ዶምድ ሄ ካታማ ዩሽድ ግምብስ።

¹⁰ ኡባፈ ዎልቃማ ጎዳይ ፆሳይ እያራ ደእያ ግሾ ዳዊቲ ምን ምን ብስ።

¹¹ ፅሮሳ ካዎይ ክራም ዳዊታስ ካዎ ጋ ኬፃና መላ ዝጋ ም፥ አናፀታነ ሹቹ ማሰይሳታ የድን፥ ኤንቲ እያዉ ኬ ኬፅዶሶና።

¹² ጎዳይ እስራኤለ ቦላ እያ ካዎ ኦድ ምንዳይሳነ ባ አሳ እስራኤለ ግሾ እያ ካዎተ ቁ ኦድ ቦንችዳይሳ ዳዊቲ ኤርስ።

¹³ ዳዊቲ ከብሮናፐ የሩሳላመ ይዳፐ ጉየ፥ ሀራ ላገታነ ማቸታ ጉጅድ ኤክን፥ ሀራ ማጫ ናይትነ አደ ናይት እያዉ የለትዶሶና።

¹⁴ የሩሳላመን እያዉ የለትዳ አደ ናይታ ሱንይ ሳሙአ፥ ሾባባ፥ ናታና፥ ሶሎሞነ፥

¹⁵ ይብሃራ፥ ኤልሹአ፥ ነፈጋ፥ ያፍአ፥

¹⁶ ኤልሻማአ፥ ኤልያዳነ ኤልፋላፃ።

ዳዊቲ ፍልስፄመታ ፆንስ

¹⁷ ዳዊቲ እስራኤለ ቦላ ካዎ ግድድ ትየትዳይሳ ፍልስፄመት ስእዳ ዎደ ኤንቲ ኡባይ ዳዊታ ኮያናዉ ከይዶሶና፤ ሽን ዳዊቲ ሄሳ ስእድ ሚፃን ብድ ገልስ።

¹⁸ ፍልስፄመት ብድ፥ ራፋይመ ዛንጋራን ላለትድ ኡትዶሶና።

¹⁹ ሄሳ ግሾ፥ ዳዊቲ፥ “ታኒ ባዳ ፍልስፄመታ ኦሎ? ኔኒ ኤንታ ታዉ አዳ እማኔ?” ያግድ ጎዳ ኦይችስ። ጎዳይ፥ “ኤ ኦላ፤ ቱማ ታ ኤንታ ነዉ አዳ እማና” ያግስ።

²⁰ ዳዊቲ ባአል-ፓራስመ ጌተትያ በሳ ብድ፥ ያን ኤንታ ፆንስ። እ፥ “ድኦ ሃ መንድ ከየይሳዳ ጎዳይ ታ ሞርከታ ታ ስንን መንረስ” ያግስ። ሄሳ ግሾ፥ ሄ በሳ ሱንይ ባአል-ፓራስመ ጌተትስ።

²¹ ፍልስፄመት ባንታ ኤቃታ ሄ በሳን የግድ ብን፥ ዳዊቲነ እያ አሳይ ሄ ኤቃታ ኤክድ ብዶሶና።

²² ፍልስፄመት ጉየ ብድ፥ ናምአን ራፋይመ ዛንጋራን ላለትድ ኡትዶሶና።

²³ ዳዊቲ ጎዳ ናምአን ኦይችን፥ ጎዳይ፥ “ኤንታ ጉየ ባጋራ ተቃዳ ዎላ ስንን ኤንታ ኦላ፥ ሽን ኤንታዉ ሶምኦን ከዮፓ።

²⁴ ዎላ ም ፄራን ሳልፐ ቃላ ኔኒ ስእያ ዎደ ፍልስፄመ ኦላንቾታ ሾጫናዉ ጎዳይ ኔፐ ስን አዳይሳ ኤራዳ ኤለሳ” ያግስ።

²⁵ ዳዊቲ ጎዳይ ኪትዳይሳዳ ኦስ፤ ጌባፐ ገዘራ ጋካናዉ ፍልስፄመ ኦላንቾታ ዎስ።