2 Sameela 4 - ጌሻ ማፃፋ

እያቡስተ ሀይቁዋ

¹ ሳኦላ ናአይ እያቡስተይ አበኔር ከብሮናን ሀይቅዳይሳ ስእዳ ዎደ እያ ዎዛናይ ትልእስ፤ እስራኤለ አሳ ኡባይካ ዳጋምስ።

² ሳኦላ ናኣ እያቡስተስ ኦላ ካለያ ናምኡ ሀላቃት ደኦሶና፤ እሱዋ ሱንይ ባአና፤ ሀንኮይ ቃስ ራካባ። ኤንቲ ብንያመ ኮቸ ግድዳ ባኣሮተ አድያ እርሞና ናይታ። ባኣሮተይ ብንያመ ባጋዳ ታይበቴስ።

³ ባኣሮታን ደእዳ ኮይሮ አሳት ግታይማ ቢታ ባቃትድ፥ ሀች ጋካናዉ በተ አሳዳ ያን ደእዶሶና።

⁴ ሳኦላ ናኣ ዮናታናስ ናምኡ ቶሆይ ስልዳ ናእ ደኤስ፤ ሳኦላነ ዮናታና ሀይቁዋ ዎረይ እዝራኤለፐ ስኤትያ ዎደ እ እቻሹ ላይ ናአ። ሄ ናኣ ድችያራ እያ ኤካዳ ባቃትሽን ናአይ ኩንድን እያ ቶሆይ ስልስ፤ ሄ ናኣ ሱንይ መምፕቦስተ።

⁵ ባኣሮተ አድያ እርሞና ናይት ረካብነ ባኣን እያቡስተ ሶ ብድ ሴታ ጋላስ ጋክዶሶና። ኤንቲ ጋክያ ዎደ እ ሸምፓናዉ አልጋ ቦላ ዝንእስ።

⁶ ኤንቲ ግስተ ኮይያ አሳዳ ሀንድ ሶ ገልድ፥ እያ ኡሉዋን ጫድዶሶና። ረካብነ እያ እሻ ባኣን ለፓራ ከይድ ብዶሶና።

⁷ እያቡስተይ ቆልአን አርሳን ዝንእዳይሳ ደምድ፥ እያዉ ኡሉዋን ጫድድ ዎዶሶና፤ እያ ሁጵያ ቃንፅ ኤክድ፥ አራባ ጋ ኤፍያ ኦግያ ኦይክድ፥ ቃማራ ብዶሶና።

⁸ እያቡስተ ሁጵያ ከብሮናን ደእያ ዳዊታስ ኤህዶሶና። ካዋ፥ “ነና ዎናዉ ኮይያ ነ ሞርክያ ሳኦላ ናኣ እያቡስተ ሁጵያ ሀይሳ በአ። ሳኦላ ቦላነ እያ ናይታ ቦላ ካዋ ኑ ጎዳ ግሾ ፆሳይ ሀች ሀሎ ከይስ” ያግዶሶና።

⁹ ሽን ባኣሮተ አድያ እርሞና ናይታ ረካባነ እያ እሻ ባአና ዳዊቲ ሀይሳዳ ያግስ፤ “መቶ ኡባፈ ታና አሽዳ ደኦ ጎዳይ ኤርያ መላ።

¹⁰ ታዉ ምሽራቾ ኦድያ አሳዳ፥ ‘ሳኦል ሀይቅስ’ ያግድ ታዉ ኦድን፥ ታኒ እያ ፅቅላጋን ኦይካዳ ዎስ፤ ታኒ እያ ምሽራቹዋስ እምዳ ዎይቶይ ሀይሳ።

¹¹ ባ ሶን ባ አርሳን ዝንእዳ ፅሎ አድያ ዎዳ ኢታ አሳታስ እያ ሃሉዋ ከየይስ አይ መላ ኢታንደሻ! እያ ሱ ታኒ ህንተ ኩሸፐ አቻና፤ ህንተና ታኒ ቢታ ቦላፈ ይሳና!” ያግስ።

¹² ረካባነ ባአና ዎና መላ ዳዊቲ ባ ኦላንቾታ ኪትን፥ ኦላንቾት ኤንታ ዎዶሶና። ኤንታ ኩሽያነ ቶሁዋ ቃንፅድ፥ ከብሮናን ኦላ ሃ ማታን ካቅዶሶና። እያቡስተ ሁጵያ ኤፍድ፥ አበኔራ ዱፎን ከብሮናን ሞግዶሶና።