2 Sameela 3 - ጌሻ ማፃፋ

¹ ሳኦላ ሶ አሳይነ ዳዊታ አሳይ ዳሮ ዎደ ኦለትዶሶና፤ ዳዊቲ ኦላን ምን ምን ብያ ዎደ ሳኦላ አሳይ ዳቡር ዳቡር ብስ።

² ከብሮናን ዳዊታስ ናይት የለትዶሶና፤ እዝራኤለ አክናሆማ የልዳ ባይራ ናአይ አምኖና፤

³ ቃርመሎሳ አብግያ ካሰ ናባላ ማችያ የልዳ ክልኣብ ናምአን ናአ። ጋሹራ ካዋ ታልማያ ናእያ ማእካ የልዳ አበሰሎመይ ሄን ናአ።

⁴ ኦይዳንይ ሃግታ ናኣ አዶና፤ እቻሻንይ አብፃላ ናኣ ሳፋፃ።

⁵ ኡሱፑንይ ዳዊታ ማቸ ኤግል ናኣ ይትራኣማ፤ ሀ ናይት ኡባይ ከብሮናን የለትዶሶና።

አበኔር ዳዊታራ ጫቅስ

⁶ ሳኦላ ሶ አሳራነ ዳዊታ ሶ አሳራ ኦለትያ ዎደ አበኔር ሳኦላ አሳ ቦላ ምን ምን ብስ።

⁷ ሳኦላስ እዮሄላ ናአ ግድዳ እርፅፎ ጌተትያ እስ ላገያ ደአዉሱ፤ እያቡስተይ አበኔራኮ፥ “ታ አዋ ላገራ አይስ አቃዲ?” ያግድ ኦይችስ።

⁸ አበኔር እያ ኦዳን ዳሮ ይሎትድ፥ “ታና ኔኒ ይሁዳኮ ስምዳ ጋታ ካና ጋድዬ? ታኒ ነ አዋ ሳኦላስ፥ እያ እሻታስነ እያ ዳቦታስ አማነታዳ ደአስ፤ ነናካ ዳዊታስ አዳ እማብከ። ሽን ሀእ ኔኒ ታና ሀ ማጫሰ ግሾ ሞታሳ!

⁹ ፆሳይ ዳዊታስ ኦና ግድ ጫቅዳ ቃላ ታኒ ፖሎና እፅኮ፥ ፆሲ ታና ፕርዶ።

¹⁰ ሳኦላ ኮቻፈ ካዎተ ዎስስድ፥ ዳነፐ በርሳበ ጋካናዉ እስራኤለ ቦላነ ይሁዳ ቦላ፥ ዳዊታ አራታ ምንናዉ ጎዳይ ጫቅስ” ያግስ።

¹¹ እያቡስተይ አበኔራስ ያይዳ ግሾ ሀራ ቃላ ፖግቤና።

¹² አበኔር ዳዊታኮ፥ “ቢታይ ኦሴ? ኔኒ ታራ ጫቃ፤ እስራኤለ አሳ ኡባይ ኔኮ ስማና መላ ታ ነና ማዳና” ያግድ አሰ ኪትስ።

¹³ ዳዊቲ፥ “ሎኦ! ታ ኔራ ጫቃና። ሽን ታኒ ነና እስባ ኦይቻይስ፤ ኔኒ ታና በአናዉ ያ ዎደ ሳኦላ ናእዉ መልኮሎ ኤኮና ዮፓ” ያግስ።

¹⁴ ሄሳፈ ጉየ፥ ዳዊቲ ሳኦላ ናአ እያቡስተኮ፥ “ፄቱ ፍልስፄመታ ቃራታዳ ኮይታ ኦዳ እምዳ ታ ማችዉ መልኮሎ ታዉ እማ” ያግድ አሰ ኪትስ።

¹⁵ እያቡስተይ አሰ ኪትድ እ አዝና ላዉሻ ናአ ፓልፅኤላፐ ከስ ኤክስ።

¹⁶ እ አዝናይ ብራቅማ ካታማ ጋካናዉ ዬክሸ እ ጌዶ ካልስ። አበኔር እያኮ፥ “ጉየ ሶ ባ” ያግን አደይ ጉየ ስሚድ ብስ።

¹⁷ አበኔር እስራኤለ ጭማታኮ ብድ፥ “ዳዊቲ ህንተ ቦላ ካዎታና መላ ዳሮ ዎደ አሞትደታ።

¹⁸ ሀእ ፖልተ! ጎዳይ፥ ‘ታ አሳ እስራኤለ፥ ፍልስፄመታ ኩሸፐነ ኤንታ ሞርከታ ኡባ ኩሸፐ ታ አይልያ ዳዊታ ባጋራ አሻና’ ግዳይሳ ሀሳይተ” ያግስ።

¹⁹ አበኔር ብንያመ ኮቻታስ ሄሳ ኦድስ። እስራኤለ አሳይነ ብንያመ አሳ ኡባይ ኦናዉ ኮይዳ ኡባ ዳዊታስ ኦዳናዉ አበኔር ከብሮና ብስ።

²⁰ አበኔር ባራ ላታሙ አስ ኤክድ፥ ከብሮና ብን፥ ዳዊቲ እያዉነ እያ አሳስ ግብራ ጊግስስ።

²¹ አበኔር ዳዊታኮ፥ “ኤንቲ ኔራ ጫቃና መላነ ነ ዎዛናይ አሞትያ ኡባ ነ ሃራና መላ ታ ባዳ እስራኤለ አሳ ካዋስ ታ ጎዳስ ሺሻና” ያግስ። ያግን ዳዊቲ አበኔራ ሞይዝድ ሳሮ የድስ።

እዮኣብ አበኔራ ዎስ

²² ሄ ዎደ ዳዊታ አሳይነ እዮኣብ ኦላፐ ዳሮባ ድእድ ስምዶሶና። ሽን ዳዊቲ እያ ሳሮ ባ ግድ የድዳ ግሾ፥ አበኔር ከብሮናን ዳዊታራ ዴና።

²³ እዮኣብነ እያራ ደእያ ኦላንቾት ጋክያ ዎደ አሳይ፥ “ኔራ ናኣ አበኔር ካዋ ዳዊታኮ ይን፥ ካዎይ እያ የድን ሳሮ ብስ” ያግድ ኦድዶሶና።

²⁴ ሄሳ ግሾ፥ እዮኣብ ካዋኮ ብድ፥ “ሄስ ዋንድ ሀንዴ? አበኔር ኔኮ ይን፥ አይስ የዳዲ? ሄኮ እ ብክችስ!

²⁵ ኔራ ናአይ አበኔር ነና ጭማናዉ፥ ኔኒ ገልያሶነ ከያሶ በአናዉነ ኔኒ ኦያ ኡባ ኤራናዉ ይስ” ያግስ።

²⁶ እዮኣብ ዳዊታ ስንፈ ከይድ፥ አበኔራ ጌዶ ኪታ የድን፥ ኤንቲ እያ ሲራ ኦላ ሃ ማታፐ ጉየ ዛርዶሶና፤ ሽን ዳዊቲ ሄሳ ኤረና።

²⁷ አበኔር ከብሮና ስሚድ ይዳ ዎደ እዮኣብ እያራ ዱማ ኦደታናዉ ኮይዳ ዳንስድ ድርሳ ፐንግያኮ ደእያ ክፍልያነ እያ ኤፍስ። ባ እሻ አሳሄላ ሱ ዛራናዉ አበኔራ ኡሎን ጫድን አበኔር ሄ በሳን ሀይቅስ።

²⁸ ዳዊቲ ጉየፐ ሄሳ ስእዳ ዎደ፥ “ታንነ ታ ካዎተይ ኔራ ናኣ አበኔራ ሱ ግሾ ጎዳ ስንን መርናዉ ኦይሸቶኮ።

²⁹ እያ ሱይ እዮኣባነ እያ አዋ ሶ አሳ አቾ፤ ማዱን ደእያ አስ ዎይኮ ጎጋ ሀርገይ ደእያ አስ ዎይኮ ዎበ አስ ዎይኮ ማሻን ሀይቅያ አስ ዎይኮ ኮሻትያ አስ እዮኣባ ኮቻን ዮፖ” ያግስ።

³⁰ ጋባኦናን ከይዳ ኦላን ባንታ እሻ አሳሄላ አበኔር ዎዳ ግሾ፥ እዮኣብነ እያ እሻ አብስ አበኔራ ዎዶሶና።

³¹ ዳዊቲ እዮኣባነ እያራ ደእያ አሳ፥ “ህንተ ማኡዋ ዳክተ፤ ባና ቆልተ፤ አበኔራ ሀላ ስንን ዬክተ” ያግስ። ካዎ ዳዊቲ ሀላ ካልድ ዱፎ ብስ።

³² አበኔር ከብሮናን ሞገትስ፤ ካዎይ ባ ቃላ ቁ ኦድ ዱፎን ዬክስ፤ አሳ ኡባይ ዬክዶሶና።

³³ ካዎይ አበኔራስ፥ “አበኔር ኤያ አሳዳ ሀይቃናዉ በሲ?

³⁴ ነ ኩሸይ ቃሸትቤና፤ ነ ቶሆይ ሳንላታን ኦይከትቤና። አስ ኢታ አሳ ኩሸን ሀይቀይሳዳ ሀይቅስ” ያግድ ዘሌልስ። አሳ ኡባይ አበኔራስ ዛሪድ ዬክዶሶና።

³⁵ ሄ ጋላስ ዳዊቲ ካ ማና መላ አሳይ እያ ሾቢዶሶና። ሽን ዳዊቲ፥ “አዋ አይፈይ ደእሽን፥ ካ ዎይኮ ሀራባ ባርኮ ፆሲ ታና ፕርዶ” ያግድ ጫቅስ።

³⁶ ካዎይ ኦዳባ አሳ ኡባይ በእድ ኡፋይትዶሶና፤ ቱማካ ካዎይ ኦዳባ ኡባይ አሳ ኡፋይስስ።

³⁷ ሄሳ ግሾ፥ ሄ ጋላስ ዳዊታ አሳይነ እስራኤለ አሳ ኡባይ ካዎይ ኔራ ናኣ አበኔራ ዎስቦናይሳ ኤርዶሶና።

³⁸ ካዎይ ባ አይለታኮ፥ “እስራኤለ ቢታን ግታ አስነ ሀላቅ ሀይቅዳይሳ ህንተ አኬከከቲ?

³⁹ ታኒ ፆሳይ ትይዳ ካዎ ግድኮካ፥ ታኒ ዳቡራንቾ፤ ሀይሳቲ ፃሩያ ናይት ታ ቦላ ምንዶሶና፤ ኢታ ኦዳይሳታስ ጎዳይ ኤንታ ኦሱዋዳ ዛሮ” ያግስ።