2 Sameela 24 - ጌሻ ማፃፋ

ዳዊቲ አሳ ታይብስ

¹ ጎዳ ሀንቆይ ቃስካ እስራኤለ ቦላ ኤፅስ፤ ጎዳይ ዳዊታ ኤንታ ቦላ ደንድ፥ “ባዳ እስራኤለነ ይሁዳ አሳ ታይባ” ያግስ።

² ሄሳ ግሾ፥ ካዎይ ቶራ ሞጮናታ እዮኣባነ ባራ ደኤይሳታኮ ሀይሳዳ ያግስ፤ “እስራኤለ ኮቻታ ዳነፐ በርሳበ ጋካናዉ ታኒ ኤራና መላ እስራኤለ አሳ ብድ ታይብተ” ያግስ።

³ ሽን እዮኣብ፥ “ጎዳይ ነ ፆሳይ ሀ ደእያ አሳ ቦላ ፄቱ ኩሸ ጉጆ! ሄሳ ታ ጎዳ፥ ካዋ አይፈይ በኦ! ሽን ታ ጎዳይ፥ ካዎይ አይስ ሄሳ መላባ ኦናዉ ኮዪ?” ያግስ።

⁴ ሽን ካዋ ቃላይ እዮኣባነ ቶራ ሞጮናታ ፆንን፥ ኤንቲ ካዋ ስንፈ ከይድ፥ እስራኤለ አሳ ታይባናዉ ብዶሶና።

⁵ ኤንቲ ዮርዳኖሰ ፕንድ ዱገሀ ባጋን ደእያ፥ ዛንጋራ ግዶን ደእያ አሮኤራ ካታማን ዱንካንዶሶና፤ ያፐ ጋደ ካንድ እያዜራ ጋክዶሶና።

⁶ ያፐ ኤንቲ ጋላዳነ ህተታ ቢታን ደእያ ቃደሳ ብዶሶና፤ ያፐ ቃስ ዳነ ብዶሶና፤ ያራ ስዶና ጋክዶሶና።

⁷ ያፐ ደንድድ፥ ፅሮሳ ሚፃነ ህወታነ ካናነታ ካታማ ኡባ ብዶሶና። ዉርሰን ይሁዳ ነገባን ደእያ በርሳበ ብዶሶና።

⁸ ኤንቲ ቢታ ኡባ ዩይሸ ኡዱፉን አጌናነ ላታሙ ጋላስ ጋምእድ፥ የሩሳላመ ስምዶሶና።

⁹ እዮኣብ አሳ ታይቡዋ ካዋ ኤርስስ፤ እስራኤለን ማሻን ኦለታናዉ ዳንዳእያ ሆስፑን ፄቱ ሙኩሉ ምኖ ኦላንቾት፥ ይሁዳን ቃስ እቻሹ ፄቱ ሙኩሉ ኦላንቾት ደኦሶና።

¹⁰ አሳ ታይብዳፐ ጉየ፥ ዳዊታ ዎዛናይ ህርግን፥ ዳዊቲ፥ “ታኒ ሀ ኦሱዋን ግታ ናጋራ ኦስ። ሽን ሀእ አቤት ጎዳዉ፥ ታኒ ነና ዎሳይስ፤ ታ ናጋራ፥ ነ አይልያ ናጋራ አቶ ጋ። ታኒ ዳሮ ቦዛባ ሀናስ” ያግስ።

¹¹ ዎንተ ጋላስ ዳዊቲ ሂፃፐ ደንድያ ዎደ ዳዊታስ ቆንጨ በእያ፥ ናብያ ጋደኮ ጎዳ ቃል ይስ።

¹² “ባዳ፥ ዳዊታኮ፥ ‘ታኒ ነና ሄባፐ እሱዋ ዶራና መላ በሳይስ፤ ታኒ ነ ቦላ ፖላናዉ ኤንታፈ እሱዋ ዶራ’ ያጌስ ጎዳይ” ያግስ።

¹³ ጋድ ዳዊታኮ ብድ፥ “ሄ ላይ ነ ቢታ ቦላ ኮሻ ኤሆዬ? ዎይኮ ነ ሞርከት ነና የደን፥ ሄ አጌና ኤንታ ስንፈ ባቃታነዬ? ዎይኮ ነ ቢታ ቦላ ሄ ጋላስ ጋዶይ ያናይሳ ዶራይ? አነ ሀእ ቆፓዳ ታኒ ታና ኪትዳይሳስ ዛራናባ ኦዳ” ያግስ።

¹⁴ ዳዊቲ ጋደኮ፥ “ታኒ ዳሮ ኡንኤታስ። ጎዳ ማሮታይ ግታ ግድያ ግሾ፥ ኑኒ እያ ኩሸን ኩንዳና፤ ታና አሳ ኩሸን የጎፎ” ያግስ።

¹⁵ ሄሳ ግሾ፥ ዎንታፈ ብድ እ ግዳ ጋላሳይ ጋካናዉ ጎዳይ እስራኤለ ቢታን ጋዶ ኪትስ። እስራኤለ ቢታን ዳነፐ ብድ በርሳበ ጋካናዉ ላፑን ታሙ ሙኩሉ አስ ሀይቅስ።

¹⁶ የሩሳላመ ይሳናዉ ኪታንቾይ ባ ኩሽያ ምጭዳ ዎደ አሳ ቦላ ጋክዳ ጋዶይ ጎዳ አዛንዳ ግሾ፥ አሳ ሾጭያ ኪታንቹዋኮ፥ “ግዳና! ነ ኩሽያ ዛራ” ያግስ። ጎዳ ኪታንቾይ ሄ ዎደ ያቡሰ አድያ ኦርና ዉዱማን ደኤስ።

¹⁷ አሳ ሾጭያ ኪታንቹዋ ዳዊቲ በእዳ ዎደ ጎዳኮ፥ “ናጋራ ኦዳይ ታና፤ ታ ባላስ! ሀ ዶርሳት አይ ኦዶና? ሀያና፥ ታናነ ታ አዋ ሶ አሳ ነ ሴራና መላ ታኒ ዎሳይስ” ያግስ።

ዳዊቲ ያርሾ በሲ ጊግስስ

¹⁸ ሄ ጋላስ ጋድ ዳዊታኮ ይድ፥ “ባዳ፥ ያቡሰ አድያ ኦርና ዉዱማን ጎዳስ ያርሾ በሲ ጊግሳ” ያግስ።

¹⁹ ዳዊቲ፥ ጎዳይ ጋደ ባጋራ ኪትዳይሳዳ ኦናዉ ፑደ ብስ።

²⁰ ኦርን ዱገ ፄልያ ዎደ፥ ካዎይነ እያ አሳት ባኮ የይሳ በእስ። እ ጋፃ ከይድ፥ ጉፋንድ ካዋስ ዝግስ።

²¹ ኦርን፥ “ታ ጎዳይ ካዎይ ባ አይልያኮ፥ አይስ ይዴ?” ያግስ። ዳዊቲ፥ “አሳ ቦላፈ ጋዶይ ስማና መላ ታኒ ጎዳስ ያርሾ በሲ ጊግሳናዉ ነ ዉዱማ ሻማናዉ ያስ” ያግስ።

²² ኦርን፥ “ታ ጎዳይ፥ ካዎይ ባ ኮይዳባ ኤክድ ያርሾ! ፁሳ ያርሾስ ቦራት ደኦሶና፤ ኤሶ ምስ ቃስ ካ ቡክያ ሚሸይነ ቦራ ቃምባር ደኤስ።

²³ ካዋዉ፥ ሀይሳ ኡባ ኦርን ካዋስ እምስ” ያግስ። ጉጅድ ኦርን፥ “ጎዳይ ነ ፆሳይ ነ ያርሹዋ ኤኮ” ያግስ።

²⁴ ሽን ካዎይ፥ “አካይ፥ ታኒ ታ ሚሸን ሻማና። ታ ጎዳ፥ ፆሳስ ፁሳ ያርሾ ጋተይ ባይና ያርሽከ” ያግስ። ሄሳ ግሾ፥ ካዎይ ዉዱማነ ቦራታ ኦርናፈ እሻታሙ ብራ ሳንትመን ሻምስ።

²⁵ ዳዊቲ ሄ በሳን ያርሾ በሲ ጊግስድ ፁሳ ያርሾነ እስፈተ ያርሾ ጎዳስ ያርሽስ። ጎዳይ ቢታ ግሾ ዎሰትዳ ዎሳ ስእድ፥ ጋዱዋ እስራኤለፐ ድግስ።