2 Sameela 22 - ጌሻ ማፃፋ

ዳዊታ ፆኖ ማዝሙረ

¹ ጎዳይ ሳኦላ ኩሸፐነ እያ ሞርከታ ኡባ ኩሸፐ አሽዳ ጋላስ ዳዊቲ ጎዳስ ሀ ማዝሙርያ የፅስ።

² ጎዳይ ታ ዛላ፤ ታዉ ሚፃ፤ እ ታና አሸይሳ።

³ ታ ፆሳይ ታኒ ባቃታዳ አትያ ዛላ፤ እ ታ ጎንዳልያ፤ እ ታ አቶተ ዎልቃ። እ ታኒ ባቃታዳ አትያ በሲ፤ ነ ታና ማካላንቾታ ኩሸፐ አሻሳ።

⁴ ጋላት በሲያ ጎዳ ታኒ ፄጋና፤ ታኒ ታ ሞርከታፐ አታና።

⁵ ሀይቆ ዙለይ ታና ተቅስ፤ ዮ ድኦይ ታና ዳጋንስ።

⁶ ስኦለ ዎዶሮይ ታና ቃቻና ሀኔስ፤ ሀይቆይ ፅሄዳ ታና ኦይክስ።

⁷ ታና መቶይ ኡንኤን ጎዳ ፄጋስ፤ ታና ማዳና መላ ታ ፆሳኮ ዋሳስ። እ ባ ኬን ታ ቃላ ስእስ፤ ታ ዋስዳ ዋሶይ እያ ሀይን ዎስ።

⁸ ፆሳይ ሀንቀትዳ ግሾ፥ ቢት ቃፅስ፤ ቡቀትስ፤ ሳሎታ ፃጶይ ኮኮርስ፤ ቃፅስ

⁹ እያ ሲያፐ ጩያይ ከይስ፤ እያ ዶናፐ ታማ ላጮይነ ፁግያ ቦንቆይ ከይስ።

¹⁰ ሳሉዋ ጳልቅድ ዱገ ዎስ፤ እያ ቶሁዋፐ ጋርሳራ ሳካና ም ደኤስ።

¹¹ ክሩበታን ኡትድ ፓልስ፤ ጫርኮ ቀፍያ ቦላ ኡትድ ብስ።

¹² ባና ማን ተቅስ፤ እያ ዱንካነይ እራራ ስከትዳ ሻራ።

¹³ እያ ስንን ደእያ ፖኡዋፐ ታማ ቦንቆይ ከዬስ።

¹⁴ ጎዳይ ሳሎፐ ጉምስ፤ ኡባፈ ቃ ፆሳይ ባ ቃላ ስስስ።

¹⁵ ባ ዶንግያ ዱክድ፥ ባ ሞርከታ ላልስ፤ ዎልአን ፖኦ ኪትድ፥ ኤንታ የደስ።

¹⁶ ጎዳይ ሴርዳ ዎደነ ሀንቀትድ ፔኑቅዳ ዎደ፥ አባ ግዶን ቢታይ በንትስ፤ ሳኣ ባሶይካ ቆንጭስ።

¹⁷ ጎዳይ ቦላፈ ኩሸ የድድ፥ ታና ኦይክስ፤ ጪሞ ሃፈ ታና ከስስ።

¹⁸ እ ታና ታ ዎልቃማ ሞርከታፐ፥ ታ ዎልቃፈ ቦላ ግድዳ ታና እፀይሳታፐ አሽስ።

¹⁹ ታ መቱዋ ጋላስ ኤንቲ ታ ቦላ ደንድዶሶና፤ ሽን ጎዳይ ታና ዘምፕሰይሳ።

²⁰ እ ታና ዳልጋ በሲ ከስስ፤ ታናን ኡፋይትዳ ግሾ ታና አሽስ።

²¹ ታ ፅሎተዳ ጎዳይ ታዉ ቃንፅስ፤ ታ ኩሸ ጌሻተዳ ታዉ ዛርስ።

²² አይስ ጊኮ ታኒ ጎዳ ኦግያ ካላስ፤ ቃስ ታ ፆሳ አጋዳ ኢታ ኦብከ።

²³ ታኒ እያ ህግያ ኡባ ናጋስ፤ እያ ዎጋ ፖላናይሳ አጋብከ።

²⁴ ታኒ እያ ስንን ሱረ ደአስ፤ ታና ናጋራፐ ናጋስ።

²⁵ ጎዳይ ታዉ ታ ፅሎተዳነ ታ ጌሻተዳ ዛርስ።

²⁶ ኔኒ ኬሀታስ ኬሀ፤ ሱረታስ ኔኒ ሱረ።

²⁷ ጌሻታስ ኔኒ ጌሽ፤ ሽን ጌላታስ ኔኒ ሞርከ።

²⁸ ባንታና ካዉሸይሳታ አሻሳ፤ ሽን ኦቶራንቾታ ካዉሻሳ።

²⁹ አቤት ጎዳዉ፥ ታ ፆምፐይ ነና፤ ጎዳይ ታ ማ ፖእስስ።

³⁰ ነ ማዱዋን ታ ሞርከታ የዳ ባና፤ ታ ፆሳን ግምበ ድርሳ ጉፓ አና።

³¹ ፆሳ ኦገይ ሱረ፤ ጎዳ ቃላይ ጌሽ፤ እያኮ ባቃትያ ኡባስ እ ጎንዳለ።

³² ጎዳይ አትሽን፥ ሀራ ፆሲ ኦኔ? ኑ ፆሳይ አትሽን፥ ሀራ ዛል ኦኔ?

³³ ፆሳይ ታዉ ምኖ ሚፃ፤ እ ታ ኦግያ ፖሎ ኦስ።

³⁴ እ ታ ቶሁዋ ገንኤ ቶሆዳ ምንስ፤ ታና ቃ በሳን ምንድ ኤሴስ።

³⁵ እ ታ ኩሽያ ኦላስ ሎህሴስ፤ ታ ቀሰይ ናሰ ብራታ ዶንገ ዱኬስ።

³⁶ ታና አሽያ ነ ጎንዳልያ ታዉ እማዳሳ፤ ነ ካትሶይ ታና ግታዬስ።

³⁷ ታ ሄመ ዳልግሳሳ፤ ታ ጋድያ ምንሳ።

³⁸ ታ ሞርከታ የደዳ መንረስ፤ ኤንቲ ዮና ደእሽን ጉየ ስምከ።

³⁹ ኤንቲ ዛሪድ ደንዶና መላ ሾጫስ፤ ታ ቶሁዋፐ ጋርሳን ኩንድዶሶና።

⁴⁰ ኦላስ ታዉ ዎልቃ ዳንጭሳዳሳ፤ ታ ሞርከታ ታዉ ጉልባትሳዳሳ።

⁴¹ ታ ሞርከታ ታ ስንፈ ባቃትሳዳሳ፤ ታና እፀይሳታ ይሳስ።

⁴² ማደ ኮይድ ዋስዶሶና፤ ሽን ኦንካ ኤንታ አሽቤና። ጎዳ ኤንቲ ፄግዶሶና፤ ሽን እ ኤንታዉ ኮይቤና።

⁴³ ታኒ ኤንታ ባናዳ ሊቅሳስ፤ ኦገ ኡርቃዳ ኤንታ የስ።

⁴⁴ ማካላ ታ አሳፐ ታና አሻዳሳ፤ ካዎተታ ቦላ ታና ሹማዳሳ፤ ታ ኤሮና አሳይ ታዉ ሃረትስ።

⁴⁵ አላጋ ደረይ ታና አዳሼስ፤ ታ ዎርያ ስእድ ታዉ ኪተቶሶና።

⁴⁶ ኤንቲ ዎልቃ ይዶሶና፤ ባንታ ሚፃፐ ኮኮርሸ ከይድ ዮሶና።

⁴⁷ ጎዳይ ደኦን ደኤስ! ታ ዛላይ አንጀቶ። ታና አሽያ ዛላይ ቁ ቁ ጎ።

⁴⁸ እ ታ ሃሉዋ ከይያ ፆሳ፤ ካዎተታ ታፐ ጋርሳን ሃርሴስ።

⁴⁹ ታ ሞርከታፐ ታና አሼስ፤ ታ ሞርከታ ቦላ ታና ቁ ቁ ኦሳ፤ ኦዳ መያ አሳፐ ታና አሻሳ።

⁵⁰ አቤት ጎዳዉ ታኒ ካዎተታ ግዶን ነና ጋላታና፤ ነ ሱን የፃና።

⁵¹ ፆሳይ ባ ካዋስ ግታ ፆኖ እሜስ፤ ባ ትይዳ ዳዊታስነ እያ ኮቻስ፥ መርና ሲቁዋ በሴስ።