2 Sameela 20 - ጌሻ ማፃፋ

ሳበእ ዳዊታ ቦላ ደንድስ

¹ ብንያመ ኮቸ ግድዳ ብክራ ናአይ ሳበአ ጌተትያ መቶ መያ አደይ ያን ደኤስ። ሄ አደይ ሞይዘ ፑንድ፥ “ኑስ ዳዊታራ ግሾይ ባዋ! እሰየ ናኣራ ኑስ ላት ባዋ! እስራኤለ አሳዉ፥ ኡባይ ህንተ ሶ ሶ ገልተ!” ያግስ።

² እስራኤለ አሳ ኡባይ ዳዊታ አግድ፥ ብክራ ናኣ ሳበኤራራ ብዶሶና። ሽን ይሁዳ አሳይ ዮርዳኖሰፐ የሩሳላመ ጋካናዉ አጎና ባንታ ካዋ ካልዶሶና።

³ ዳዊቲ የሩሳላመን ደእያ ባ ጋ ስምዳ ዎደ፥ ካዎ ጋ ናጋና መላ አሽዳ ታሙ ላገታ ኤፍድ እስ ኬን ናግስድ ዎስ። ኤንታዉ ኮሽያባ እሚስ፥ ሽን ኤንታራ አቅቤና። ኤንቲ ሄ ኬን ናገትድ፥ ሀይቃና ጋካናዉ አምኦ ግድድ ደእዶሶና።

⁴ ካዎይ አማሳኮ፥ “ይሁዳ አሳ ኡባ ሄ ጋላሳን ታዉ ፄጋዳ ሺሻ፤ ነካ ኤንታራ ሺቃ” ያግስ።

⁵ አማስ ይሁዳ አሳ ፄጋናዉ ብስ፤ ሽን ካዎይ ግዳ ጋላሳን ስማናዉ ዳንዳእቤና።

⁶ ዳዊቲ አብሳኮ፥ “ሀእ ብክራ ናኣ ሳበእ አበሰሎመፐ አድ ኑና ቆሀና። ነ ጎዳ ኦላንቾታ ኤካዳ ኔኒ እያ ጌዶ ካላ። ሄስ ሀኖና እፅኮ እ ግምበትዳ ካታማታ ደምድ ኑፐ ከስ ኤካና” ያግስ።

⁷ እዮኣባ አሳይ፥ ካዋ ናገይሳትነ ምኖ ኦላንቾት ኡባይ አብሳራ ብክራ ናኣ ሳበአ ጌዶ ካላናዉ የሩሳላመፐ ከይድ ብዶሶና።

⁸ ኤንቲ ብድ ጋባኦናን ደእያ ዎጋ ዛላ ጋክያ ዎደ አማስ ኤንታራ ጋሄታናዉ ይስ። እዮኣብ ኦላ ማኡዋ ማእ ኡትስ፤ ባ ፄሳን ማሻ ዳንጭስ። እ ታንግሽን እያ ማሻይ ሾሁዋፐ ከስ ኤክድ ዎስ።

⁹ እዮኣብ፥ “ታ እሻዉ፥ ነ ሳሮ ደአይ?” ያግድ፥ አማሳ ዬራናዉ ባ ኡሻቻ ኩሽያን እያ ቡቻ ኦይክስ።

¹⁰ ሽን አማስ እዮኣባ ሀድርሳ ኩሽያን ደእያ ማሻ በእቦና ግሾ፥ እያፐ ናገትቤና። እዮኣብ እያ ኡሉዋን ጫድድ ማራጭያ ቢታን ዛዝስ። አማስ እስ ጫቻን ሀይቅዳ ግሾ ዛር ጫድቤና። እዮኣብነ እያ እሻ አብስ ብክራ ናኣ ሳበአ ጌዶ ካልዶሶና።

¹¹ እዮኣባ አሳፐ እሶይ አማሳ አሀ ማታን ኤቅድ፥ “እዮኣባ ዶሰይነ ዳዊታባ ግድያ ኦንካ እዮኣባ ካሎ” ያግስ።

¹² አማስ ሱን ኢትድ ኦግያስ ግዶን ኩንድድ ዝንእስ። ኦላንቾት ኡባይ ይድ፥ ሄ በሳን ኤቅዳይሳ ሄ አደይ በእድ፥ አማሳ አሀ ኦግያፐ ሾቃን ጎች ከስድ፥ እያ ቦላ ማኦ የግስ።

¹³ አማሳ ኦገፐ ድግዳፐ ጉየ፥ ብክራ ናኣ ሳበአ ጌዶ ካላናዉ ኦላንቾት ኡባይ እዮኣባራ ብዶሶና።

¹⁴ ሳበእ እስራኤለ ኮቻታ ቢታራ ካንድ፥ አቤል-ቤት-ማእካ ካታማ ጋክስ። በራታ ቢታራ ካንሽን፥ አሳ ኡባይ ሺቅድ እያ ካልዶሶና።

¹⁵ እዮኣባራ ደእያ አሳይ ጋክድ፥ ሳበእ ደእያ አቤል-ቤት-ማእካ ካታማ ተቅዶሶና። ኤንቲ ካታማ ግምብያስ ጉየ ባጋራ ቢታ ዶርዶሶና። እዮኣባራ ደእያ አሳይ ግምብያ ላላናዉ ቆፆሶና። ኤንቲ ቆፅሽን፥

¹⁶ ካታማፐ እስ ጭንጫ ማጫስ ኤንታ ፄጋዳ፥ “ስእተ! ስእተ! ብድ፥ እዮኣባ ፄግተ። ታኒ እያዉ ኦዳናባይ ደኤስ” ያጋሱ።

¹⁷ እ ማጫሴኮ ይን፥ እያ፥ “ኔኒ እዮኣቤ?” ያጋዳ ኦይቻሱ። እዮኣብ፥ “ኤ፥ ታና” ያግስ። ማጫስያ፥ “ታኒ ነ አይልያ ግያባ ስአ” ያጋሱ። እዮኣብ፥ “ታኒ ስአይስ” ያግስ።

¹⁸ ማጫስያ፥ “በን ዎደ አሳይ፥ ‘ነ ኦይሻስ አብኤላ ካታማ ባ’ ጊኮ ኦድ ዉሬስ።

¹⁹ እስራኤለ ግዶን ሳሮነ አማንያ አስ ኑና። እስራኤለ ቢታን አዮ ግድዳ ካታምዉ ኔኒ ይሳናዉ ቆፓሳ። ኔኒ ጎዳ ላታ ቢታ አይስ ይሳናዉ ኮያይ?” ያጋሱ።

²⁰ እዮኣብ፥ “ሄስ ታፐ ሃኮ! ካታማ ይሶይ ዎይኮ ላለ ታፐ ሃኮ!

²¹ ኑ ቆፋይ ሄሳ ግደና። ደረይ ዳርያ ኤፍሬማ ቢታን ብክራ ናኣ ሳበአ ጌተትያ አደይ ካዋ ዳዊታ ቦላ ደንድስ። ሄ አድያ ታዉ እምተ፤ ታኒ ካታማ የዳዳ ባና” ያግስ። ማጫስያ፥ “እያ ሁጵያ ግምብያ ቦላራ ነዉ ሆላና” ያጋሱ።

²² ሄሳፈ ጉየ፥ ማጫስያ ባ ጭንጫ ዞርያራ አሳኮ ባሱ። አሳይ ብክራ ናኣ ሳበአ ቆፐ ቃንፅድ ሁጵያ እዮኣባስ ሆልዶሶና። ያትን፥ እዮኣብ ሞይዘ ፑንን አሳ ኡባይ ካታማፐ ከይድ፥ ባ ሶ ሶ ብን፥ እዮኣብ ካዋኮ የሩሳላመ ስምስ።

²³ እዮኣብ እስራኤለ ኦላንቾታ ኡባ ሀላቃ ግድሽን፥ ዮዳሄ ናአይ ባናያስ ዳዊታ ናገይሳታ ሀላቃ።

²⁴ አዶንራም ዎልቃ ኦሶ ኦይሳታ ሀላቃ ግድሽን፥ አህሉዳ ናአይ እዮሳፍፅ ሀንዳባ ፃፈይሳ።

²⁵ ሱስ ዋና ፃፈ ግድሽን፥ ሳዶቅነ አብያታር ካህነ።

²⁶ ቃስ ያእራ አደይ እርክ ዳዊታ ካህነታፔ እሱዋ።