2 Sameela 2 - ጌሻ ማፃፋ

ዳዊቲ ይሁዳ ቦላ ካዎትስ

¹ ሄሳፈ ጉየ፥ ዳዊቲ፥ “ይሁዳ ካታማታፐ እሱዋ ቦ?” ያግድ ጎዳ ኦይችስ። ጎዳይ፥ “ኤ፥ ባ” ያግስ። ዳዊቲ፥ “አዉ ቦ” ያግድ ኦይችስ። ጎዳይ፥ “ከብሮና ባ” ያግድ ዛርስ።

² ዳዊቲ ባ ናምኡ ማቸታ፥ እዝራኤለ አክናሆማነ ካሰ ናባላ ማችዉ ቃርመሎሳ አብግያ ኤክድ ከብሮና ካታማ ብስ።

³ ዳዊቲ ባራ ደእያ አሳታነ ኤንታ ሶ አሳ ኡባ ኤህን፥ ከብሮናንነ እያ ሄራን ደእያ ካታማታን ደእዶሶና።

⁴ ይሁዳ አሳት ከብሮና ካታማ ይድ፥ ዳዊታ ትይድ ይሁዳ ቦላ ካዎዶሶና። ዳዊቲ ያበሳ ጋላዳ አሳይ ሳኦላ ሞግዳይሳ ስእዳ ዎደ፥

⁵ እ አሰ ኪትድ፥ “ህንተ ህንተ ጎዳ ሳኦላ ሞግዳ ግሾ ሄ ኬሀተስ ጎዳይ ህንተና አንጆ።

⁶ ጎዳይ ሲቁዋነ ቱማተ ህንተዉ ቆንጭሶ፤ ታንካ ሀ ኬሀተ ግሾ ህንተዉ ሎኦ ኩሸ ዛራና።

⁷ ህዛ ምንተ፤ ፃልተ፤ ህንተ ጎዳይ ሳኦል ሀይቅስ። ይሁዳ አሳይ ታና ትይድ፥ ባንታ ቦላ ካዎዶሶና” ያግስ።

ናምኡ ኬታ ግዶን ደእያ ኦላ

⁸ ሳኦላ ቶራ ሞጮናይ ኔራ ናአይ አበኔር ሳኦላ ናኣ እያቡስተ ኤክድ፥ ማህናይማ ጌተትያ በሳ ኤፍስ።

⁹ እያ ጋላዳን፥ አሴራን፥ እዝራኤላን፥ ኤፍሬማን፥ ብንያመንነ እስራኤለ ቢታ ኡባን ካዎስ።

¹⁰ ሳኦላ ናአይ፥ እያቡስተይ እስራኤለ ቦላ ካዎትያ ዎደ እያዉ ኦይታሙ ላይ፤ እ ናምኡ ላይ ካዎትስ። ግዶሽን፥ ይሁዳ አሳይ ዳዊታ ካልዶሶና።

¹¹ ዳዊቲ ከብሮናን ይሁዳ ቦላ ላፑን ላይነ ባጋ ካዎትስ።

¹² ኔራ ናአይ አበኔርነ ሳኦላ ናአይ እያቡስተ አሳይ ማህናይማፐ ጋባኦና ብዶሶና።

¹³ ፃሩያ ናአይ እዮኣብነ ዳዊታ አሳይ ጋባኦና ኦላ ሃ ማታን ኤንታራ ጋሄትዶሶና። እስ ጩጋይ ኦላ ሃፈ ሄፍንን ኡትን፥ እስ ጩጋይ ሀፍንን ኡትስ።

¹⁴ አበኔር እዮኣባኮ፥ “አነ ህንተፈነ ኑፐ ፓንት ደንድድ፥ ኑ ስንን ኦለቶ” ያግስ። እዮኣብ፥ “ኤሮ፥ ደንድድ ኦለቶ” ያግስ።

¹⁵ ሄሳ ግሾ፥ ብንያመፐ ሳኦላ ናኣ እያቡስተስ ታማነ ናምኡ አሳት ከይድ፥ ዳዊታስ ኤቅዳ ታማነ ናምኡ አሳታራ ኦላ ጋሄትዶሶና።

¹⁶ እሶይ እሶይ ባ ሞርክያ ሁጵያ ኦይክድ፥ ማሻን ምየን ጫድስ፤ ሄሳዳ ሀንድ ላታማነ ኦይዳይ ሀይቅዶሶና። ሄሳ ግሾ ጋባኦናን ደእያ ሄ በሳይ ማሻ ቢታ ጌተትስ።

¹⁷ ሄ ጋላስ ዎልቃማ ኦላ ኦለትድ፥ ዳዊታ አሳይ አበኔራነ እስራኤለ አሳ ፆንስ።

¹⁸ ፃሩያ ናይት ሄይ እዮኣብ፥ አብስነ አሳሄል ሄ በሳን ደኦሶና፤ አሳሄል ዎሽኤዳ ኤሶን ዎፅድ፥

¹⁹ አሳሄል አበኔራ ኡሻች ዎይኮ ሀድርስ ጎና የደስ።

²⁰ አበኔር ጉየ ስሚድ፥ “አሳሄላ፥ ነኔ?” ያግድ ኦይችስ። አሳሄል፥ “ኤ ታና” ያግስ።

²¹ አበኔር፥ “ኡሻች ዎይኮ ሀድርስ ስማዳ፥ አሳታፐ እሱዋ ኦይካዳ እያ ኦላ ሚሽያ ኤካ” ያግስ። ሽን አሳሄል እያ የደይሳ አጎና እፅስ።

²² ቃስካ አበኔር፥ “ታኒ ነና ሳአራ ጋዳ ኦይና ደእሽን፥ ታና የደይሳ አጋ! ነና ዎዳ ታኒ ነ እሻ እዮኣባ ሶምኡዋ ዋታዳ ፄላኔ?” ያግድ ዋስስ።

²³ ሽን አሳሄል እያ የደይሳ አጎና እፅስ። ሄሳ ግሾ፥ አበኔር ቶራ ጉየ የድድ፥ አሳሄላ ኡሉዋ ጫድን ቶራይ ዞኮራ ካንድ ከይስ። አሳሄል ሄ በሳን ኩንድድ ሀይቅስ፤ አሳሄል ሀይቅዳ በሳ ጋክዳ አሳ ኡባይ ያን ኤቅስ።

²⁴ ሽን እዮኣብነ አብስ አበኔራ ጎድዶሶና፤ አው ዉልያ ዎደ ጋባኦና መላ ቢታኮ ኤፍያ ኦግያን ጋዳፐ ስን ባጋራ ደእያ አማ ዙማኮ ጋክዶሶና።

²⁵ ብንያመ አሳይ አበኔራኮ ሺቅዶሶና፤ እስ ጩጋ መድ እስ ዙማ ቦላ ኤቅዶሶና።

²⁶ አበኔር እዮኣባ ፄግድ፥ “መርናዉ ኦለትሸ ዳነዬ? ሀይሳ ዉርሰይ ጫሞ ግዳናይሳ ኔኒ ኤርኪ? ነ አሳይ፥ ባንታ እሻታ ጎደይሳ አጋና መላ አይስ ኦድኪ?” ያግስ።

²⁷ እዮኣብ፥ “ደኦ ፆሳይ ኤሮ! ኔኒ ኦዶናባ ግድያኮ ታ አሳይ ባ እሻታ ሳእ ዎንታና ጋካናዉ ጎዳ አጎኮና” ያግስ።

²⁸ እዮኣብ ሞይዘ ፑንን አሳ ኡባይ ኤስስ። እስራኤለታ ዛር ጎድቦኮና ዎይኮ ኦልቦኮና።

²⁹ አበኔርነ እያ አሳይ ሄ ቃማ ኩመ ሄመትድ አራባ ጋ ጋክዶሶና። ዮርዳኖሰ ሻፋ ፕንድ፥ በትሮና ካንድ ማህናይመ ይዶሶና።

³⁰ እዮኣብ አበኔራ ጎደይሳ አግድ፥ ባ አሳ ኡባ እስ በሲ ሺሽድ ፄልያ ዎደ፥ አሳሄላ ጉጆና ዳዊታ አሳፐ ታማነ ኡዱፉን አስ ፓጭስ።

³¹ ሽን ዳዊታ አሳይ አበኔራራ ደእያ ብንያመ ኮቻታፐ ሄ ፄታነ ኡሱፑን ታሙ አስ ዎዶሶና።

³² አሳሄላ አሀ ኤክድ፥ ቤተለመ ካታማን ደእያ እያ አዋ ዱፎን ሞግዶሶና። እዮኣብነ እያ አሳይ ቃማ ኩመ ሄመትድ ሳእ ዎንትያ ዎደ ከብሮና ጋክዶሶና።