2 Sameela 19 - ጌሻ ማፃፋ

¹ ካዎይ፥ “ባ ናኣ አበሰሎመስ ዬከስነ ዘሌለስ” ያግድ እዮኣባስ ኦድዶሶና።

² ካዎይ ባ ናኣስ ዬከይሳ ስእዳ ግሾ፥ ሄ ጋላስ ኤንቲ ኡባይ ፆንዳ ፆኖይ ዬሆን ላመትስ።

³ ኦላፐ ባቃትድ ዬላን ጉየ ስምዳ ኦላንቾዳ ሄ ጋላስ አሳይ ዶና ፖጎና ካታማ ገልዶሶና።

⁴ ካዎይ ጉሉንትድ፥ ባ ቃላ ቁ ኦድ፥ “ዪ፥ ታ ናአዉ አበሰሎመ! ዪ፥ ታ ናአዉ! አበሰሎመ ዪ!” ያግድ ዘሌልስ።

⁵ ሄሳፈ ጉየ፥ እዮኣብ ካዋ ሶ ብድ፥ “ነና፥ ነ አደ ናይታ፥ ነ ማጫ ናይታ፥ ነ ማቸታነ ነ ላገታ አሽዳ ነ አሳ ኡባ ሀች ኔኒ ካዉሻዳሳ።

⁶ ነና እፀይሳታ ኔኒ ዶሳሳ፤ ነና ዶሰይሳታ ኔኒ እፃሳ። ነ ኦላንቾትነ ኤንታ ሀላቃት ነዉ አይኮካ ግዶናይሳ ኔኒ ሀች ቆንጭሳዳሳ። ኑኒ ኡባይ ሀይቅን፥ አበሰሎመይ ሀች ፓፃ አትዳኮ ኔኒ ኡፋይታናይሳ ታ በአስ።

⁷ ሀእ ደንዳ! ካረ ከያዳ ነ አሳ ምን። ታ ጎዳ ሱንን ጫቃይስ፤ ኔኒ ከዮና እፅኮ፥ ሀች ቃማ ኔራ እስ አስካ አተና። ናአተፈ ሀች ጋካናዉ ነና ጋክዳ ኢታ ኡባፈ ሀይስ ነዉ አዳ ኢታ ግዳና” ያግስ።

ዳዊቲ የሩሳላመ ስምስ

⁸ ሄሳ ግሾ፥ ካዎይ ደንድድ ፐንግያ ማታን ኡትስ። ካዎይ ፐንገን ኡትዳይሳ አሳ ኡባይ ስእዳ ዎደ ካዋኮ ይዶሶና። ሄ ዎደ እስራኤለ አሳ ኡባይ ባንታ ሶ ሶ ባቃትዶሶና።

⁹ እስራኤለ ኮቻት ኡባይ እሶይ እሱዋራ ሀይሳዳ ያግድ ፓላምዶሶና፤ “ካዎይ ዳዊቲ ኑና ኑ ሞርከታ ኩሸፐ አሽስ፤ ኑና ፍልስፄመታ ኩሸፐ ዎስስስ፤ ሽን እ ሀእ አበሰሎመ ጋሶን ቢታ አግድ ባቃትስ።

¹⁰ ኑ ቦላ ካዎታናዳ ኑኒ ትይዳ አበሰሎመይ ኦላን ሀይቅስ። ያትን፥ ካዋ ጉየ ኤሀናባ ህንተ አይስ ስእ ግደቲ?” ያግዶሶና።

¹¹ ካዎይ ዳዊቲ ካህነታ ሳዶቃነ አብያታራ ኪትድ፥ ይሁዳ ጭማታኮ ሀይሳዳ ያግስ፤ “እስራኤለ አሳ ኡባይ ኦደትያ ኦዳይ ካዋ ጋክስ። ያትን፥ ካዋ እያ ጋ ዛር ኤሀናዉ ህንተ አይስ ጉየ አቴቲ?

¹² ህንተ ታ እሻታ፤ ህንተ ታ አሾነ ታ ሱ። ያትን፥ ካዋ ጉየ ዛር ኤሀናዉ ህንተ አይስ ሀራታፐ ጉየ አቴቲ?” ያግስ።

¹³ ቃስ ዳዊቲ አማሳኮ፥ “ኔኒ ታ አሾነ ታ ሱ ግድኪ? ሀችፈ ዶምን፥ ታኒ ነና እዮኣባ በሳን ታ ቶራ ሞጮና ኦና እፅኮ፥ ፆሲ ታና ፕርዶ” ያግስ።

¹⁴ እ ይሁዳ አሳ ኡባ ዎዛና እስኖ ኦድ ሻምስ። ሄሳ ግሾ፥ ኤንቲ ካዋኮ ኪትድ፥ “ኔራ ነ አሳራ ኡባይ ሃ ስምተ” ያግዶሶና።

¹⁵ ካዎይ ስሚድ፥ ዮርዳኖሰ ሻፋ ጋካናዉ ይስ። ይሁዳ አሳይ ካዋ ዮርዳኖሰ ሻፋ ፕንናዉ ጋልጋላ ብዶሶና።

¹⁶ ብራቅማ አደይ፥ ብንያመ ኮቻይ፥ ጌራ ናአይ ሳም ዳዊታ ሞካናዉ ኤለስድ ይሁዳ አሳራ ብስ።

¹⁷ እያራ ብንያመ ኮቸ ግድዳ ሙኩሉ አሳይ፥ ሳኦላ አይለይ ሲብ፥ ታማነ እቻሹ እያ ናይትነ ላታሙ አይለት እያራ ደኦሶና። ኤንቲ ካዎይ ደእያ በሳ ዮርዳኖሰ ሻፋ ድርግሸ ብዶሶና።

¹⁸ ካዋ ሶ አሳ ኤሀናዉነ ካዋ ኡፋይስያባ ኦናዉ ፕንያ በሳራ ፕንዶሶና። ጌራ ናአይ ሳም ዮርዳኖሰ ሻፋ ፕንዳ ዎደ ካዋ ስንን ጉፋንድ፥

¹⁹ “ካዋዉ ታ ናጋራ ታይቦፓ። ታ ጎዳይ፥ ካዎይ፥ የሩሳላመፐ ከይያ ዎደ ታኒ ነ አይለይ ቆህዳ ቆሁዋ ሀሳዮፓ። ሄሳ ነ ኡሎን ኦይኮፋ።

²⁰ ነ አይለይ ታኒ ናጋራ ኦዳይሳ ኤራይስ፤ ሽን ታ ጎዳ፥ ካዋ ሞካናዉ ዮሰፋ ሶ አሳ ኡባፈ ኮይሮታዳ ታኒ ሀች ያስ” ያግስ።

²¹ ፃሩያ ናአይ አብስ፥ “ሳም ጎዳይ ትይዳ ካዋ ባድዳ ግሾ ሀይቃናዉ በሰነዬ?” ያግስ።

²² ዳዊቲ አብሳኮ፥ “ህንተኖ፥ ፃሩያ ናይቶ፥ ህንተና ጋያባይ አይቤ? ህንተ ሀች ታዉ ሞርከ ግዴት! ሀች እስራኤለን አይ አስካ ሀይቀና! ሀች እስራኤለ ካዎይ ታና!” ያግስ።

²³ ካዎይ ሳም፥ “ነ ሀይቃካ” ያግድ ጫቅስ።

²⁴ ቃስ ሳኦላ ናአይ መምፕቦስተይ ካዋ ሞካናዉ ዱገ ዎስ። ካዎይ ብዳ ጋላሳፐ ዶምድ እ ሳሮን ጉየ ስምያ ጋላስ ጋካናዉ መምፕቦስተይ ባ ቶሁዋነ ባ ማኡዋ ሜጭቤና፤ ባ ቡቻ ሜድቤና።

²⁵ መምፕቦስተይ ካዉዋራ ጋሄታናዉ የሩሳላመፐ ይዳ ዎደ ካዎይ፥ “መምፕቦስተ፥ ኔኒ ታራ አይስ ባብኪ?” ያግድ ኦይችስ።

²⁶ መምፕቦስተይ፥ “ታ ጎዳዉ ካዋዉ፥ ታኒ ነ አይለይ ስላ ግድያ ግሾ ‘ታኒ ቶጋዳ ካዉዋራ ባና መላ ታ ሀርያ ኮራ’ ያጋስ። ሽን ታ አይለይ ሲብ ታና ጭምስ።

²⁷ ታ ጎዳ፥ ካዋስ ዎርዶ ኦድድ ታ ሱን ኢስስ። ኔኒ ታ ጎዳይ፥ ካዎይ ፆሳ ኪታንቾ መላ ግድያ ግሾ ነና ሎእዳባ ኦ።

²⁸ ታ አዋ ሶ አሳ ኡባይ ሀይቃናዉ በሴስ፥ ሽን ታኒ ነ አይለይ ነ ጋይታፐ መይሳታራ ማና መላ ታዉ በሰ እማዳሳ። ያትን፥ ሄሳፈ አያባ ካዋ ኦይቻናዉ ታዉ አይ ማት ደኢ?” ያግስ።

²⁹ ካዎይ ዛሪድ፥ “ኔኒ ዳሮባ ኦደታናዉ ኮሸና። ኔራ ሲባራ ጋድያ ሻከትድ ኤካና መላ ኪታስ” ያግስ።

³⁰ መምፕቦስተይ፥ “ታ ጎዳይ፥ ካዎይ ሳሮ ሶ ስማፈ አትሽን፥ ኡባይ ሲባስ ግዶ” ያግስ።

³¹ ጋላዳ አደይ ባርዝለይ ካዉዋራ እስፈ ዮርዳኖሰ ፕንድ እያ ሞይዛናዉ ሮጋልማፐ ይስ።

³² ባርዝለይ ላይ ሆስፑን ታሙ ግድዳ ጭማ አስ። እ ዳሮ ዱረ ግድያ ግሾ ካዎይ ማሀናይማ ካታማን ደእያ ዎደ ካዋስ ኮሽያባ እሚስ።

³³ ካዎይ እያኮ፥ “ኔኒ ታራ የሩሳላመ የ፤ ታኒ ነዉ ኮሽያባ እማና” ያግስ።

³⁴ ሽን ባርዝለይ፥ “ታኒ ህዛፐ ዳሮ ላይ ደእከ፤ ታኒ ካዉዋራ የሩሳላመ አይስ ቦ?

³⁵ ታኒ ሀእ ሆስፑን ታሙ ላይ አስ፤ ታኒ ኢታነ ሎኦ ሻካዳ ኤራናዉ ዳንዳእያና? ታኒ ነ አይለይ ታ ምያባነ ኡያባ ማልኡዋ ሻካዳ ኤራናዉ ዳንዳእያና? ታኒ አደነ ማጫ የ ሻካዳ ስአናዉ ዳንዳእያና? ያትን፥ ታኒ ነ አይለይ፥ ታ ጎዳዉ ካዋዉ አይስ ቶሆ ግዶ?

³⁶ ታኒ ነ አይለይ ነና ዮርዳኖሰ ፕንና። ሽን ካዎይ ታዉ ኩሸ ዛራናዉ አይስ ኮሺ?

³⁷ ታኒ ታ አዋነ ታ አየ ዱፉዋ ማታን ታ ካታማን ሀይቃና መላ ስማይስ። ነ አይለይ ክምሃም ሀይስሽ፤ ታ ጎዳ፥ ካዉዋራ እ ቦ፤ ነና ኡፋይስያባ እያዉ ኦ” ያግስ።

³⁸ ካዎይ፥ “ክምሃም ታራ ፕኖ፤ ነና ኡፋይስያባ ታኒ እያዉ ኦና። ቃስ ኔኒ ታና ኦይችያባ አይባ ግድኮካ ታኒ ነዉ ኦና” ያግስ።

³⁹ ሄሳፈ ጉየ፥ አሳ ኡባይ ዮርዳኖሰ ፕንዶሶና፤ ካዎይካ ፕንስ። ካዎይ ባርዝለ ዬርድ አንጅስ፤ ባርዝለይ ባ ሶ ስምስ።

⁴⁰ ካዎይ ዮርዳኖሰ ፕንድ ጋልጋላ ብያ ዎደ ክምሃም እያራ እስፈ ብስ። ይሁዳ ኦላንቾት ኡባይነ እስራኤለ ኦላንቾታፐ ባጋት ካዉዋራ ብዶሶና።

⁴¹ እስራኤለ ኡባይ ካዋኮ ብድ፥ “ኑ እሻት፥ ይሁዳ አሳይ ካዋነ እያ ሶ አሳ ቆስድ፥ እያ አሳራ እስፈ ዮርዳኖሰ አይስ ፕንዶና?” ያግዶሶና።

⁴² ይሁዳ አሳይ፥ “ኑኒ ሄሳ ኦዳይ ካዎይ ኑስ ማታ ዳቦ ግድያ ግሾሳ። ያትን፥ ህንተ ሄሳስ አይስ ይሎተቲ? ኑኒ ካዉዋፐ አይኮ ምዶ? ዎይኮ ኑኒ እያፐ አይኮ ኤክዶ?” ያግዶሶና።

⁴³ እስራኤለ አሳይ፥ “ካዉዋፐ ታሙ ኩሸይ ኑሳ፤ ዳዊታ ማታን ኑስ ህንተፈ አ ማት ደኤስ! ያትን፥ ህንተ ኑና አይስ ካደቲ? ካዋ ጉየ ዛሪድ ኤሀናዉ ኮይሮትድ ኦድዳይ ኑና ግዶኮ?” ያግዶሶና። ሽን እስራኤለ አሳፐ ይሁዳ አሳይ ዳሮ ዎልቃንድ ሃሳይዶሶና።