2 Sameela 11 - ጌሻ ማፃፋ

ዳዊታነ በርሳቦ

¹ ላይ ላመን ካዎት ኦላስ ከይያ ዎደ ዳዊቲ ባ አሳራነ እስራኤለ ኦላንቾታራ እስፈ እዮኣባ ኦላስ የድስ። ኤንቲ አሞነ ኦልድ፥ ራባ ካታማ ተቅዶሶና። ሽን ዳዊቲ የሩሳላመን አትስ።

² እስ ጋላስ ኦማርስ ዳዊቲ ባ ሂፃፐ ደንድድ፥ ኬ ቦላ ደእያ በሳ ከይድ ሄመትሸ ቦላ ሜጨትያ እስ ማጫስ በእስ፤ ሄ ማጫስያ ዳሮ ማላ ሎኦ።

³ ዳዊቲ እያ ኦነኮ ኤራናዉ ኮይድ አሰ ኪትስ። ኪተትዳ አደይ፥ “እያ ኤልያባ ናእዉ፥ ህተ አድያ ኦርዮና ማችዉ በርሳቦ” ያግስ።

⁴ ዳዊቲ አሰ ኪትድ፥ እዮ ኤህስስ፤ ኢራ አቅስ። ሄ ዎደ እያ ኩሸ መቶይ አን፥ ጌያዳ ደአዉሱ። እያ ባ ሶ ስማዳ ባሱ።

⁵ ጉየፐ እያ ቃንትዳይሳ ኤርዳ ዎደ ዳዊታኮ፥ “ነዉ ቃንታስ” ያጋሱ።

⁶ ዳዊቲ፥ “ህተ አድያ ኦርዮና ሃ የዳ” ያግድ እዮኣባኮ ኪትስ። እዮኣብ ኦርዮና ዳዊታኮ የድስ።

⁷ ኦርዮን ይን ዳዊቲ፥ “እዮኣብ አይ መሌ? ኦላንቾት አይ መሌ? ኦላይ ዋኒ?” ያግድ ኦይችስ።

⁸ ዳዊቲ ኦርዮናኮ፥ “ሶ ባዳ ሸምፓ” ያግን፥ ኦርዮን ካዎ ጋፐ ከይድ ብስ። ካዎይ ኦርዮና ጉየራ ካ የድስ።

⁹ ሽን ኦርዮን ሶ ቦና ካዎ ጋ ድርሳ ፐንግያን ባ ጎዳ አይለታራ አቅስ።

¹⁰ ኦርዮን ባ ሶ ቦናይሳ ዳዊቲ ስእድ፥ “ኔኒ ሃሆሶፐ ያዳሳ ግድኪ? ነ ሶ አይስ ባብኪ?” ያግድ ኦይችስ።

¹¹ ኦርዮን ዳዊታኮ፥ “ታቦተይ፥ እስራኤለ አሳይ፥ ይሁዳ አሳይ፥ ታ ሀላቃይ እዮኣብነ ካዋ አሳይ ደንባን ዱንካነን ደኦሶና። ያትን ታ ዋናዳ ሶ ባዳ ሞ፥ ኡዮ፥ ቃስ ታ ማቸራ ዋናዳ አቆ? ነ ሸምፖይ ኤሮ! ታኒ ሀይሳ መላባ ኦከ” ያግድ ዛርስ።

¹² ዳዊቲ፥ “እስ ጋላስ ሀይሳን ጋምአ፤ ዎንቶ ነና ጉየ የዳና” ያግስ። ኦርዮን ሄ ጋላስነ ዎንተ ጋላስ የሩሳላመን ጋምእስ።

¹³ ዳዊቲ ሾቢን ኦርዮን እያራ ምስ፤ እ ማታና ጋካናዉ ዳዊቲ እያ ኡሽስ። ሽን ሄ ዎደ ኦማርስ ኦርዮን ባ ሶ ቦና፥ ባ ሂፃ ሂፅድ ባ ጎዳ አይለታራ አቅስ።

¹⁴ ዎንተ ዳዊቲ እዮኣባስ ዳብዳበ ፃፍድ፥ ኦርዮና ቦላ የድስ።

¹⁵ ዳዊቲ ባ ዳብዳብያን፥ “ኦርዮና ኦላይ ጎብያ በሳን ስን ባጋ አ። እ ሾጨትድ ሀይቃና መላ እያ ማታፐ ሃክተ” ያግስ።

¹⁶ እዮኣብ ሄ ካታማ ተቅዳ ዎደ እ ኤርያ ምኖ ሞርከ ኦላንቾት ደእያ በሳን ኦርዮና ኤስስ።

¹⁷ ካታማ አሳት ከይድ እዮኣባራ ኦለትዶሶና። ዳዊታ ኦላንቾታፐ ጉ አሳት ሀይቅዶሶና፤ ኦርዮን ህተ አደይካ ሀይቅስ።

¹⁸ እዮኣብ ኦላን ሀንዳባ ኡባ ዳዊታስ ኪትስ።

¹⁹ እዮኣብ ኪተትድ ብያ አድያኮ፥ “ኦላን ሀንዳባ ነ ካዋስ ኦዳ ዉርስዳ ዎደ፥

²⁰ ካዎይ ሸነትድ፥ ‘ህንተ ኤንታራ ኦለታናዉ ካታማኮ አይስ ሺቅደቲ? ኤንቲ ግምብያ ቦላ ኤቅድ ዶንገን ዱካናይሳ ኤረከቲ?

²¹ ገድዮና ናአይ አብመለከይ ዋንድ ሀይቅዳኮ አኬከከቲ? ማይደ ግምብያ ቦላራ ዱገ ሆላዳ ተበሳ ጌተትያ በሳን ዎዳይ እስ ማጫስ ግደኬ? ያትን፥ ህንተ ግምብያኮ አይስ ሺቅደቲ?’ ያግድ ኦይችኮ፥ ኔኒ፥ ‘ነ አይለይ፥ ህተ አደይ ኦርዮንካ ሀይቅስ’ ” ያጋ።

²² ኪተትዳይስ ብድ እዮኣብ ኪትዳባ ኡባ ዳዊታስ ኦድስ።

²³ አደይ፥ “ኑ ሞርከት ኑፐ ዎልቃምዶሶና፤ ኑራ ኦለታናዉ ካታማ ጋፃን ደእያ ደምባ በሳ ከይዶሶና። ሽን ኑ ኤንታ ካታማ ፐንግያ ጋካናዉ ጉየ ዛሪድ የደዳ።

²⁴ ሄሳፈ ጉየ፥ ዶንገን ዱከይሳት ግምብያ ቦላ ግድድ ነ አይለታ ዶንገን ዱክዶሶና። ካዋዉ፥ ነ አሳታፐ ጉት ሀይቅዶሶና፤ ነ አይለይ፥ ህተ አደይ ኦርዮንካ ሀይቅስ” ያግስ።

²⁵ ዳዊቲ ኪተትዳይሳኮ፥ “ኔኒ እዮኣባኮ ሀይሳዳ ያጋ፤ ‘ቶሪ ገደካ ሃካ ምያ ግሾ ሀይሳስ አዛኖፓ፤ ካታማ ኦላዳ ኦይካናዉ ምና’ ያጋዳ እያ ምን” ያግስ።

²⁶ ኦርዮና ማችያ ባ አዝናይ ሀይቅዳይሳ ስእዳ ዎደ እያዉ ዬካሱ።

²⁷ እያ ካዮ ዎ ስምን፥ ዳዊቲ ኪትድ እዮ ባ ሶ ኤህስ። እያ እያዉ ማቾ ግዳዳ አደ ናአ የላሱ። ሽን ዳዊቲ ኦዳ ኦሶይ ኢታ ግድያ ግሾ ጎዳይ ኡፋይትቤና።