2 Sameela 1 - ጌሻ ማፃፋ

ዳዊቲ ሳኦላ ሀይቁዋ ስእስ

¹ ሳኦል ሀይቅዳፐ ጉየ፥ ዳዊቲ አማለቃታ ፆን ስሚድ ፅቅላጋን ናምኡ ጋላስ ጋምእስ።

² ሄን ጋላስ እስ አደይ ባ ማኡዋ ዳክድ፥ ባ ሁጰን ባና ቆልድ፥ ሳኦል ዱንካንዳ ጉታፐ ይስ። እ ዳዊታኮ ይድ ሳአን ጉፋንድ ዝግስ።

³ ዳዊቲ፥ “ኔኒ አዋፐ ያዲ?” ያግድ ኦይችስ። እ ዛሪድ፥ “ታኒ እስራኤለት ዱንካንዳ ጉታፐ ከሳ ኤካዳ ያስ” ያግስ።

⁴ ዳዊቲ፥ “አነ ሀንዳባ ታዉ ኦዳ” ያግስ። እ ዛሪድ፥ “ኑ ኦላንቾት ኦላፐ ባቃትዶሶና፤ ኑ አሳፐ ዳሮት ሀይቅዶሶና፤ ሳኦልነ እያ ናአይ ዮናታን ሀይቅዶሶና” ያግስ።

⁵ ዳዊቲ እያዉ ኦድዳ ፓን፥ “ሳኦልነ እያ ናኣ ዮናታን ሀይቅዳይሳ ኔኒ አይብን ኤራይ?” ያግድ ኦይችስ።

⁶ ፓንይ፥ “ታኒ ግልቦአ ደርያ ቦላ ደእሽን፥ ሳኦል ባ ቶራ ጉፈትድ ኤቅዳይሳ በአስ፤ ፓራ ጋረትነ ፓራ አሳት ሳኦላኮ ማታትዶሶና።

⁷ ሄ ዎደ ሳኦል ጉየ ስሚድ ታና ደምድ ፄግስ። ታኒ፥ ‘ዬ’ ያጋዳ ኮያስ።

⁸ ሳኦል፥ ‘ኔኒ ኦኔ?’ ያግድ ኦይችን፥ ‘ታኒ አማለቃ አስ’ ያጋዳ ዛራስ።

⁹ ሄሳፈ ጉየ ሳኦል፥ ‘ታኒ ማዱንፃዳ፥ ሀይቆስ ጋካስ፤ ኔኒ ታ ቦላ ከይያ ኤቃዳ ታና ዎ’ ያግስ።

¹⁰ እ ኩንድዳፐ ጉየ ሀይቆፐ አቶናይሳ ኤርዳ ግሾ ታኒ እያ ቦላ ከያ ኤቃዳ እያ ዎስ። እያ ሁጰን ደእያ ካላቻነ እያ ቀሰን ደእያ አምባርያ ኤካዳ ኔኮ ታ ጎዳኮ ያስ” ያግስ።

¹¹ ዳዊቲነ ዳዊታ አሳይ ካዮትድ፥ ባንታ ማኡዋ ዳክዶሶና።

¹² ኤንቲ ሳኦል፥ ዮናታን፥ ጎዳ ኦላንቾትነ እስራኤለ አሳይ ኦላን ዉርዳ ግሾ ኦማርስ ጋካናዉ ካዮትዶሶና፤ ዬክዶሶና፤ ፆምዶሶና።

¹³ ዳዊቲ ሄሳ ኤንታዉ ኤህዳ ፓን፥ “ነ አዉፐ ያዲ?” ያግድ ኦይችስ። እ ዛሪድ፥ “ታኒ በተ አስ ግድድ ደእያ አማለቃ አድያ ናአ” ያግስ።

¹⁴ ዳዊቲ፥ “ጎዳይ ትይዳ ካዋ ዎናዉ ነ ኩሽያ ደንሸ ዋናዳ ያያብኪ?” ያግስ።

¹⁵ ዳዊቲ ባ አሳታፐ እሱዋ ፄግድ፥ “እያ ዎ” ያግን፥ እ አማለቃ ፓን ጫድድ ዎስ።

¹⁶ ዳዊቲ አማለቃ አድያኮ፥ “ጎዳይ ትይዳ ካዋ ታኒ ዎስ” ያጋዳ “ኔኒ ነ ዶናን ማርካትዳ ግሾ ነ ሱ ጎመይ ነና ኦይኮ” ያግስ።

ዳዊቲ ሳኦላስነ ዮናታናስ ዬክስ

¹⁷ ዳዊቲ ሳኦላስነ እያ ናኣ ዮናታናስ ሀይሳዳ ያግድ ዘሌልስ።

¹⁸ ይሁዳ አሳይ፥ “ዶንገ ዬሆ” ጌተትያ ሀ ዘለልሳ ታማራና መላ ኪትስ፤ ሀ ዘለልሳይ ያሻራ ማፃፋን ፃፈትስ።

¹⁹ “ነኖ እስራኤለ፥ ነ ሀላቃት፥ ቃ በሳን ሀይቅዶሶና። ዎልቃማት ዋንድ ኩንድዶና!

²⁰ ፍልስፄመ ማጫ ናይት ሄሳ ስእድ ኡፋይቶና መላ፥ ቃፃረትቦና አሳ ማጫ ናይት ሀሹ ጎና መላ፥ ሀይሳ ጋተ ካታማን ኦዶፕተ አስቃሎና ኦገታን አዋጆፍተ።

²¹ ህንተኖ ግልቦአ ደረቶ፥ ህንተ ቦላ እር ቡኮፎ፤ አክ ዎፎ። ሄ በሳን ዎልቃማታ ጎንዳለይ ቱንዳ ግሾ፥ ሳኦላ ጎንዳለይ ዛይተን ቁሸትቦና ግሾ፥ ሄ ጋድያን ካ ዶሎፖ።

²² ጎይረትዳይሳታ ሱፈ፥ ዎልቃማታ ሞዋፈ፥ ዮናታና ዶንገይ ጉየ ግቤና፤ ሳኦላ ማሻይ ካሎና ስምቤና።

²³ ሳኦልነ ዮናታን ዶሰተይሳታ፤ ሀይቆንነ ፓፃን ሻከትቦኮና። ኤንቲ አርጋንፈ አድ ኤሶ፤ ጋሞፈ አድ ምኖ።

²⁴ ህንተኖ እስራኤለ ማጫሳዉ፥ ዞኦነ አሌቆ ማኦ ማይዝዳይሳስ፥ ህንተ ማኡዋ ዎርቃን አሌቅስዳ ሳኦላስ ዬክተ።

²⁵ ዎልቃማት ኦላን ዋንድ ኩንድዶና? ዮናታን ቃ በሳን ሀይቅስ።

²⁶ ታ እሻ ዮናታና፥ ታ ነዉ አዛናይስ፤ ነ ታዉ ዳሮ አልኦ። ኔኒ ታና ዶስያ ዶሶይ ማላልሴስ፤ ማጫ ሲቆፐካ አስ።

²⁷ ዎልቃማት ዋንድ ኩንድዶና? ኦላ ሚሸይካ ዋንድ ይዴ?” ያግድ ዳዊቲ ዘሌልስ።