2 Kawota 9 - ጌሻ ማፃፋ

እዩ ትየተ

¹ ናበይ ኤልስ ናበታ ጩጋፐ እስ አስ ፄግድ፥ “ነ ማኡዋ ማአዳ፥ ፃሮ ዛይትያ ነ ኩሸን ኦይካዳ፥ ጋላዳን ደእያ ራሞታ ባ።

² ያ ጋካዳ፥ እዮሳፈፃ ናኣ፥ ናምሳ ናኣ ናኣ እዩ ኮያ። እያ ደማዳ፥ እያ ላገታፐ እያ ሻካዳ ቆልአ ገልሳ።

³ ሄሳፈ ጉየ፥ ፃሮ ዛይትያ ኤካዳ፥ እያ ሁጵያን ትጋዳ፥ ‘ነና እስራኤለ ቦላ ካዎ ኦ ትያና መላ ጎዳይ ታና ኪትስ’ ያጋ። ያታዳ ፐንግያ ዶያዳ፥ ኤለሳዳ ባቃታ” ያግስ።

⁴ ሄሳ ግሾ፥ ፓን ናበይ ጋላዳን ደእያ ራሞታ ብስ።

⁵ እ ያ ጋክዳ ዎደ ቶራ ሞጮናይ እስፈ ዞረትሽን ደምድ፥ “ጎዳዉ፥ ታኒ ነዉ ኦድያባይ ደኤስ” ያግስ። እዩይ፥ “ኑ ግዶፈ ኦደስ ኦዳኔ?” ያግድ ኦይችስ። ናበይ፥ “ጎዳዉ፥ ነዉ ኦዳና” ያግድ ዛርስ።

⁶ እዩይ ደንድድ ሶ ገልን፥ ናበይ እያ ሁጰን ዛይተ ትግድ፥ “ጎዳይ እስራኤለ ፆሳይ፥ ነና ሀይሳዳ ያጌስ፥ ‘ኔኒ ጎዳ ደርያ፥ እስራኤለ ቦላ ካዎታና መላ ታኒ ነና ትያስ።

⁷ ኔኒ ነ ጎዳ አካባ ኮቻ ይሳና። ታኒ ኤልዛቤላ ጉስዳ ናበታ፥ ታ አይለታ ሱነ ታ ሀራ አይለታ ሱ ሃሉዋ ከሳና።

⁸ አካባ ኮቻ ኡባይ ያና፤ ታኒ እስራኤለን አካባ ኮቻፈ አይለ ግድን፥ ዎማኖ ግድን፥ አደ ኡባ ይሳና።

⁹ አካባ ኮቻ ናባፃ ናኣ እዮርባማ ኮቻዳነ አክያ ናኣ ባኦሳ ኮቻዳ ኦና።

¹⁰ ኤልዛቤሎ፥ እዝራኤላ ጎሻን ካናት ማና፤ ኦንካ እዮ ሞገና’ ” ያግስ። ሄሳ ኦድዳፐ ጉየ፥ ፐንግያ ዶይድ ባቃትስ።

¹¹ እዩይ ባ ላገ ግድዳ ቶራ ሞጮናታኮ ብዳ ዎደ፥ ኤንቲ፥ “ሳእ ሳሮ? ሀ ጎሻይ ኔኮ አይስ ይዴ?” ያግድ ኦይችስ። እዩይ፥ “ሀ አድያባነ እያ ኦዳ ህንተ ኤሬታ” ያግስ።

¹² ኤንቲ፥ “ሀይስ ዎርዶ። አነ ኔኒ ኑስ ኦዳ” ያግዶሶና። እዩይ፥ “ኔኒ እስራኤለ ቦላ ካዎ ግዳና መላ ታኒ ነና ትያናዳ ጎዳይ ታና ኪትስ” ያግስ።

¹³ ሄ ዎደ ኤንቲ ባንታ ማኡዋ ቃርድ፥ እዩይ የድ ከይያ ደን ሂፅድ፥ ሞይዘ ፑንዶሶና። ባንታ ቃላ ቁ ኦድ፥ “እዩይ ካዎትስ” ያግዶሶና።

ካዋ እዮራማ ሀይቁዋ

¹⁴ እዮሳፈፃ ናአይ፥ ናምሳ ናኣ ናአይ እዩይ፥ እዮራማ ቦላ ማቀትስ። ሄስ ሀንያ ዎደ፥ እስራኤለ አሳ ኡባይ አራመ ካዋ አዛሄላ ጋላዳን ደእያ ራሞታን ናጋናዉ ብዶሶና።

¹⁵ ሽን ኤንታፈ ካዎይ እዮራም ሶረ ካዋ አዛሄላራ ኦለትዳ ዎደ፥ አራመ ቢታ አሳይ እያ ጫድዳ ጫቻስ እዝራኤለ ይስ። እዩይ ሀላቃታ፥ “ህንተ ቆፋይ ሄሳ ግድኮ፥ ሀ ካታማፐ እስ አስካ ከይድ፥ እዝራኤለ ካታማን ሀ ኦዳ ኦዶናዳ ተቅተ” ያግስ።

¹⁶ ሄሳፈ ጉየ፥ እዩይ ፓራ ጋርያን ከይድ፥ እዝራኤለ ብስ። እዮራም ፓፅቦናይስ ያን ሸምፔስ። ቃስ ይሁዳ ካዎይ አካዝያስ እያ ኦይቻናዉ ያ ዱገ ብስ።

¹⁷ እዝራኤላ ግምብያ ቦላ ኤቅድ ዎቸይሳ ፄግድ፥ “እስ ጩጋ የይሳ ታዉ በንቴስ” ያግስ። እዮራም፥ “ኤንታራ ጋሄታናዳ እስ ፓራ የዳ። ፓራዋይ ብድ፥ ‘ሳእ ሳሮ?’ ያጎ” ያግስ።

¹⁸ ፓራዋይ እዩራ ጋሄታናዉ ብድ፥ “ካዎይ ነና፥ ‘ሳአይ ሳሮ?’ ያጌስ” ያግስ። እዩይ፥ “ሳሮባን ነና ጋያባይ ባዋ። ታ ጉየ አዳ ታና ካላ” ያግድ ዛርስ። ዎቸይስ ካዋ፥ “ኪተትዳይስ ኤንታኮ፥ ጋክስ፤ ሽን ጉየ ስምቤና” ያግድ ኦድስ።

¹⁹ ሄሳ ግሾ፥ ካዎይ ናምአን ፓራዋ ኤንታኮ ኪትስ። እ ኤንታኮ ይድ፥ “ካዎይ ህንተና፥ ‘ሳእ ሳሮ?’ ያጌስ” ያግስ። እዩይ፥ “ነዉ ሳሮራ አይ ጋሄተ ደኢ? ታ ጉየ አዳ ታና ካላ” ያግስ።

²⁰ ዎቸይስ፥ “ናምአን ፓራዋይ ኤንታኮ ጋክስ፤ ሽን ጉየ ስሚድ ይቤና። ቃስ ጋርያ ላጎይ ናምሳ ናኣ ናኣ እዩ ላጉዋ መላ፤ እ ጎያ አሳዳ ላጌስ” ያግድ ኦድስ።

²¹ ካዎይ እዮራም፥ “ታዉ ፓራ ጋረ ጊግስተ” ያግድ ኪትስ። ኤንቲ ፓራ ጋረ ጊግስዶሶና፤ እስራኤለ ካዎይ እዮራም ይሁዳ ካዎይ አካዝያስ ባንታ ጋርያን ጋርያን ኡትድ፥ እዩራ ጋሄታናዉ ብድ፥ እዝራኤለ ናቡተ ጋደን እያ ደምዶሶና።

²² እዮራም እዩ በእዳ ዎደ፥ “እዩ፥ ሳእ ሳሮ?” ያግድ ኦይችስ። እዩይ፥ “ነ አየ ኤልዛቤል ላይማተይነ ብታይ ደእሽን፥ ሳሮይ አዉን ደኢ?” ያግድ ዛርስ።

²³ እዮራም ባ ፓራ ጋርያ ጉየ ዛሪድ ባቃትድ፥ አካዝያሳ ፄግድ፥ “አካዝያሳ፥ ሀይስ ማካላ” ያግስ።

²⁴ እዩይ፥ ባ ዶንግያ ባ ኩመ ዎልቃን ዳፍድ፥ እዮራማ ናምኡ ካትሶታፐ ግዶን ዱክስ። ዶንገ ቶራይ እያ ዎዛናራ ካንድ ከይን፥ ባ ጋርያ ግዶን ኩንድስ።

²⁵ እዩይ ቶራ ሞጮና ብድቃራኮ፥ “እዮራማ ደንዳ፥ ናቡተ ጋደን ኦላ። ኔራ ታራ እስፈ እዮራማ አዋ አካባ ካልድ ቶግድ ብሽን፥ ጎዳይ እያ ቦላ ትንብተ ኦድዳይስ አኬካ።

²⁶ ሄ ዎደ ጎዳይ፥ ‘ናቡተ ሱነ እያ አደ ናይታ ሱ ታኒ ዝነ በአስ፤ ሄሳ አጩዋ ታኒ ነና ቱማ ሀ ጋደን ቃንፅሳና’ ያግስ። ሀእ ስሚድ ጎዳይ ግዳይሳዳ፥ እዮራማ ደንዳ፥ ሀ ጋደን ሆላ” ያግስ።

²⁷ ይሁዳ ካዎይ አካዝያስ ሄሳ በእዳ ዎደ፥ ቤት-ሀጋና ባቃትስ። እዩይ እያ ካልድ የደድ፥ “እያካ ዎተ” ያግስ። ኤንቲ እያ ካልድ፥ ይብላማ ማታን ደእያ ጉራ ፑደን እያ ጋርያ ቦላ ጫድዶሶና። እ ማግዶ ባቃትድ፥ ያን ሀይቅስ።

²⁸ እያ አይለት ጋርያን እያ ኤክድ፥ የሩሳላመ ኤፍዶሶና፤ እያ ማይዛታ ማታን ዳዊታ ካታማን ሞግዶሶና።

²⁹ አካባ ናአይ እዮራም ካዎትዳ ታማነ እስን ላይን አካዝያስ ይሁዳን ካዎትስ።

ኤልዛቤል ሀይቁዋ

³⁰ ሄሳፈ ጉየ፥ እዩይ እዝራኤላ ብስ። ኤልዛቤላ ሄሳ ስእዳ ዎደ፥ ባ አይፍያ ትያዳ፥ ባ ሁጵያ ፕፃዳ፥ ማስኮትያራ ዱገ ኦግያ ፄላሱ።

³¹ እዩይ ፐንገራ ገልሽን፥ “ላ ነ ጎዳ ዎዳ ዘምራ ሀይሳ ሳሮ ያዲ?” ያጋሱ።

³² እዩይ ፑደ ማስኮትያኮ ፄልድ፥ “ታ ባጋ ግዳናይ ኦኔ? ኦኔ?” ያግስ። ናምኡ ዎይኮ ሄ ሹፋት እያ ፄልዶሶና።

³³ እዩይ፥ “እዮ ዱገ ሆልተ” ያግስ። ኤንቲ እዮ ዱገ ሆልዶሶና። እ ሱይ ጎዳ ቦላነ ፓራታ ቦላ ርጨትስ፤ ፓራት ባንታ ቶሁዋን እዮ የዶሶና።

³⁴ እዩይ ካዋ ኬ ገልድ፥ ምስነ ኡይስ። እ፥ “ሀ ባደትዳ ማጫስዉ ኤፍድ ሞግተ፤ አይ ግድኮካ እያ ካዎ ናአ” ያግስ።

³⁵ ሽን ኤንቲ እዮ ሞጋናዉ ብድ፥ እ ጉግያፈ፥ ቶሆታፐነ ኩሸታፐ አትሽን፥ ሀራባ ደምቦኮና።

³⁶ ኤንቲ ስሚድ፥ እያዉ ኦድዶሶና፤ እ፥ “ጎዳይ ባ አይልያ ትስባ ኤልያሳ ባጋራ፥ ‘እዝራኤለ ጋደን ኤልዛቤል አሹዋ ካናት ማና።

³⁷ አትዳይስ እዝራኤላን ፕቶ መላ የገታና። ሄሳ ግሾ ኦንካ፥ “ሀና ኤልዛቤሎ” ጋናዉ ዳንዳኤና’ ያግድ ኦድዳ ቃላይ ሀይሳ” ያግስ።