2 Kawota 8 - ጌሻ ማፃፋ

ሱናማ ማጫስዉ

¹ ኤልስ፥ ሀይቅዳ እ ናኣ ፓዳ ማጫስዉ፥ “ነ ሶ አሳ ኤካዳ ሀይሳፈ ባዳ ኔኒ ዳንዳእያ በሳን አዉንካ ደአ። ጎዳይ ላፑን ላይ ኮሻ ሀ ቢታ ቦላ የድስ” ያግስ።

² ማጫስያ ኤልስ ኦድዳይሳዳ ባ ሶ አሳራ ባዳ፥ ፍልስፄመ ቢታን ላፑን ላይ ደአሱ።

³ ላፑን ላይ ዉርሰን ማጫስያ ፍልስፄመ ቢታፈ ስማሱ። ባ ኬነ ባ ጋድያ ኦይቻናዉ ካዋኮ ባሱ።

⁴ ሄ ዎደ ካዎይ ፆሳ አስ ግድዳ ኤልሳ አይልያ ግያዛራ ኦደትሸ፥ “ኤልስ ኦዳ ግታ ኦሶ ኡባ አነ ታዉ ኦዳ” ያግስ።

⁵ ኤልስ ሀይቅዳ ናኣ ዋትድ ፓዳኮ፥ ግያዝ ካዋስ ኦድሽን፥ ሄኮ፥ ኤልስ እ ናኣ ፓዳ ማጫስያ ባ ኬነ ባ ጋድያ ኦይቻናዉ ያሱ። ግያዝ፥ “ታ ጎዳዉ፥ ካዋዉ፥ ማጫስያ ሀናሹ፤ ኤልስ ሀይቆፐ ፓዳ እ ናአይካ ሀይስሽ” ያግስ።

⁶ ካዎይ ማጫስዉ ኦይችን፥ እያዉ ኦዳሱ። ሄሳ ግሾ፥ ካዎይ ሀላቃ ፄግድ፥ “ሀ ማጫሴባ ግድዳ ኡባነ እያ አጋ ብዳ ዎድያፐ ሀች ጋካናዉ እ ጋደን ሞክዳ ኡባ እዉ ዛራ” ያግድ ኪትስ።

⁷ ኤልስ ዳማስቆ ካታማ ብድ ጋክያ ዎደ፥ ሶረ ካዎይ ዎልደ-አዳር ሳከቴስ። እ፥ “ፆሳ አስ ሀይሳ ይስ” ግያ ዎረ ስእስ።

⁸ ካዎይ አዛሄላኮ፥ “እምያባ ኤካዳ ፆሳ አድያራ ጋሄታናዉ ባዳ፥ ‘ታኒ ሀ ሀርግያፈ ፓፃኔ?’ ያጋዳ ጎዳ ኦይቻ” ያግስ።

⁹ ሄሳ ግሾ፥ አዛሄል ዳማስቆን ደእያ ዱማ ዱማ ቆሞ ሙሩታፐ ኦይታሙ ግማለን ጫንድ፥ ኤልሳራ ጋሄታናዉ ብስ። ኤልሳ ስንን ኤቅድ፥ “ነ ናአይ አራመ ካዎይ ዎልደ-አዳር፥ ‘ታኒ ሀ ሀርግያፈ ፓፃኔ?’ ያግድ፥ ነና ኦይቻናዳ ታና ኔኮ ኪትስ” ያግስ።

¹⁰ ኤልስ አዛሄላኮ፥ “ኔኒ ባዳ እያኮ፥ ‘ቱማ ኔኒ ፓፃና’ ያጋ። ሽን እ ቱማ ሀይቃናይሳ ታና ጎዳይ በስስ” ያግስ።

¹¹ አዛሄል ዬላታና ጋካናዉ፥ ኤልስ እያ ትሽ ኦድ ፄልድ ዬክስ።

¹² ያትን፥ አዛሄል፥ “ታ ጎዳይ አይስ ዬኪ?” ያግድ ኦይችስ። ኤልስ፥ “ኔኒ እስራኤለ አሳ ቦላ ኦና ኢታባ ታኒ ኤርያ ግሾ ዬካይስ። ኤንታ ሚፃ ኔኒ ታማን ፁጋና፤ ኤንታ ፓንታ ኔኒ ማሻን ዎና። ቃስ ኤንታ ዮጋ ናይታካ ኔኒ ሹቻን መንረና፤ ኤንታ ቃን ማጫሳታ ኡሉዋ ኔኒ ዳካና” ያግድ ዛርስ።

¹³ አዛሄል ዛሪድ፥ “ታኒ ነ አይለይ፥ ፓና ካናይ፥ ሀይሳ መላ ግታባ ዋታዳ ኦናዉ ዳንዳእያና?” ያግስ። ኤልስ ዛሪድ፥ “ኔኒ አራመ ቢታን ካዎታናይሳ ታና ጎዳይ በስስ” ያግስ።

¹⁴ ሄሳፈ ጉየ፥ አዛሄል ኤልሳፈ ሻከትድ፥ ባ ጎዳኮ ስምስ። ዎልደ-አዳር፥ “ኤልስ ነና ዎይግዴ?” ያግድ ኦይችስ። አዛሄል፥ “ኔኒ ቱማ ፓፃና” ያግስ።

¹⁵ ሽን ዎንተ ጋላስ አዛሄል ቡሉኮ ኤክድ፥ ሃን ሙክድ፥ ካዋ እያራ ቱጭን፥ ካዎይ ሀይቅስ። አዛሄል እያ በሳን ባዉ ካዎትስ።

ይሁዳ ካዋ እዮራማ

¹⁶ አካባ ናአይ፥ እስራኤለ ካዎይ እዮራም ካዎትዳ እቻሻን ላይን፥ ይሁዳ ካዋ እዮሳፈፃ ናአይ እዮራም ይሁዳን ካዎትስ።

¹⁷ እዮራም ካዎትያ ዎደ እያዉ ላይይ ሀስታማነ ናምአ፤ እ የሩሳላመን ሆስፑን ላይ ካዎትስ።

¹⁸ እዮራም አካባ ናእዉ ማቾ ኤክዳ ግሾ፥ አካባ ሶ አሳይ ሄመትዳይሳዳ ካሰ እስራኤለ ካዎታ ኦግያን ሄመትስ፤ ጎዳ ስንን ኢታባ ኦስ።

¹⁹ ግዶሽን፥ ባ አይልያ ዳዊታ ግሾ፥ ጎዳይ ይሁዳ ይሳናዉ ኮይቤና፤ ዳዊታ ኮቻይ መርናዉ ካዎታናዉ ደኤይሳ ጎዳይ ኡፋይሳ ቃላ እሚስ።

²⁰ እዮራም ካዎትዳ ዎደ፥ ኤዶመ አሳይ ይሁዳ ካዋ ቦላ ማካልድ፥ ባንታዉ ካዎ ካዎይዶሶና።

²¹ ሄሳ ግሾ፥ እዮራም ባ ፓራ ጋረታ ኡባራ ፃእራ ጌተትያ በሳ ብስ። ኤዶመ አሳት እያነ እያ ፓራ ጋረታ ሀላቃታ ተቅዶሶና፤ ሽን እዮራም ቃማ ደንድድ፥ ከስ ኤክድ ብስ። እያ ኦላንቾት ባቃትድ፥ ጉየ ሶ ስምዶሶና።

²² ሄ ዎደፐ ዶምድ ሀች ጋካናዉ፥ ኤዶመ አሳይ ይሁዳ አሳስ ሃረትቦኮና። ልብና አሳይ ቃስ ሄ ዎደ ማካልስ።

²³ እዮራም ሀንዳ ሀራባይነ እ ኦዳባ ኡባይ ይሁዳ ካዎታ ታርከ ማፃፋን ፃፈትስ።

²⁴ እዮራም ሀይቅድ፥ ባ ማይዛታን ጋሄትስ። ባ ማይዛ ዳዊታ ካታማን ሞገትስ፤ እያ በሳን እያ ናአይ አካዝያስ ካዎትስ።

ይሁዳ ካዋ አካዝያሳ

²⁵ አካባ ናአይ፥ እስራኤለ ካዎይ እዮራም ካዎትዳ ታማነ ናምአን ላይን፥ ይሁዳ ካዋ፥ እዮራማ ናአይ አካዝያስ ይሁዳን ካዎትስ።

²⁶ አካዝያስ ካዎትዳ ዎደ፥ እያዉ ላይ ላታማነ ናምአ፤ እ የሩሳላመን እስ ላይ ካዎትስ። እያ አየ ሱንይ ጎቶሎ፤ እያ እስራኤለ ካዋ ኦምራ ናኣ ናእዉ።

²⁷ እ ኤንታዉ ቦሎ ግድዳ ግሾ፥ አካባ ሶ አሳ ኦግያን ሄመትስ፤ አካባ ሶ አሳይ ኦዳይሳዳ፥ እ ጎዳ ስንን ኢታባ ኦስ።

²⁸ አካዝያስ አራመ ካዋ አዛሄላራ ጋላዳን ደእያ ራሞታ ካታማን ኦለታናዉ ብድ፥ አካባ ናኣ እዮራማራ እስፈ ብን፥ አራመ አሳት እዮራማ ጫድዶሶና።

²⁹ እዮራም አራመ ካዋ አዛሄላራ ኦለትያ ዎደ፥ አራመ አሳት ጫድዳ ጫቻፈ ፓፃናዉ እዝራኤለ ስምስ። እዮራማ ናአይ፥ ይሁዳ ካዎይ አካዝያስ፥ ጫደትዳ አካባ ናኣ እዮራማ ኦይቻናዉ ዱገ እዝራኤለ ብስ።