2 Kawota 7 - ጌሻ ማፃፋ

¹ ኤልስ፥ “ጎዳ ቃላ ስአ! ጎዳይ ሀይሳዳ ያጌስ። ዎንቶ ሀኖደ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ ሳማረ ካታማ ፐንገን እስ ብራ ሳንትመን ባይዘታና” ያግስ።

² ካዋስ ማታትያ ሀላቃይ ፆሳ አድያኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ሽን ኤልስ ዛሪድ፥ “ኔኒ ሄሳ ነ አይፍያን በአና፤ ሽን እያፐ ማካ” ያግስ።

³ ካታማ ገልያ ፐንግያን ግታ ጎጋ ሀርገይ ኦይክዳ ኦይዱ አሳት ደኦሶና። ኤንቲ እሶይ እሱዋኮ፥ “ኑኒ ሀይቃና ጋካናዉ፥ ሀይሳን አይስ ጋምአኔ?

⁴ ኑኒ ካታማ ገልኮ፥ ኮሽ ደእያ ግሾ፥ ኑኒ ያን ሀይቃና። ቃስ ሀይሳን ጋምእኮካ ሀይቃና። ሄሳ ግሾ፥ አራመታ ሚፃ አነ ቦስ። ኤንቲ ኑና አሽኮ አታና፤ ኤንቲ ዎኮ ሀይቃና” ያግዶሶና።

⁵ ሳእ ምያ ዎደ ደንድድ፥ አራመታ ሚፃ ብዶሶና። ኤንቲ ብድ ሚፃ ጋክያ ዎደ፥ ሄኮ፥ እስ አስካ ያን ባዋ።

⁶ ሄስ ሀንዳይ፥ ጎዳይ ፓራ ጋረታ፥ ፓራታነ ዳሮ ኦላንቾታ ቃላ አራመ አሳ ስስስ። ያትን ኤንቲ እሶይ እሱዋኮ፥ “ሄኮ፥ እስራኤለ ካዎይ ኑና ኦልሳናዉ፥ ህተነ ግብፀ ካዎታ ኡነይድ ኤህስ” ያግዶሶና።

⁷ ሄሳ ግሾ፥ ኤንቲ ደንድድ፥ ባንታ ሚፃ፥ ባንታ ዱንካንያ፥ ባንታ ፓራታነ ባንታ ሀረታ ኩመ የግ አግድ፥ ሳእ ማ ደእሽን፥ ባንታ ሸምፑዋ አሻናዉ ባቃትዶሶና።

⁸ ሄ ግታ ጎጋ ሀርገይ ኦይክዳ አሳት አራመታ ሚፃ ጋክድ፥ ኤንታ ዱንካነታፐ እሱዋ ገልድ፥ ምዶሶናነ ኡይዶሶና፤ ብራ፥ ዎርቃነ ማኦ ኤክድ ቆትዶሶና። ናምአን ስሚድ፥ ሀራ ዱንካንያ፥ ገልድ እያፐ ኤክዳይሳ ቆትዶሶና።

⁹ ሄሳፈ ጉየ፥ ኤንቲ እሶይ እሱዋ፥ “ኑኒ ሎኦባ ኦቦኮ። ሀች ምሽራቾ ጋላስ፤ ሽን ኑኒ ስእ ግዳ። ሳእ ዎንታና ጋካናዉ፥ ስእ ግድ ኡትኮ፥ ኑኒ ሴረታና። አነ፥ ሀእ ብድ፥ ካዎ ጋን ደእያ አሳስ ኦዳና” ያግዶሶና።

¹⁰ ሄሳ ግሾ፥ ኤንቲ ብድ፥ ካታማ ፐንግያ ናገይሳታ ፄግድ፥ “ኑኒ አራመ ሚፃ ብዳ፤ ሽን፥ ሄኮ፥ እስ አስ ዎይኮ አሳ ግርስ ሄ በሳን ባዋ። ቃሸትዳ ፓራታ ፃላልነ ሀረት ደኦሶና፤ ቃስ ኤንቲ አግድ ብዳ ዱንካነት ደኦሶና” ያግዶሶና።

¹¹ ፐንግያ ናገይሳት ፄግድ፥ ካዎ ጋን ደእያ አሳስ ኦድዶሶና።

¹² ካዎይ ቃማ ደንድድ፥ “አራመት ኑና ኦዳባ ታኒ ህንተዉ ኦዳና። ኑኒ ኮሻትዳይሳ ኤንቲ ኤሮሶና። ሄሳ ግሾ፥ ባንታ ሄራፐ ከይድ፥ ጋፃርያን ቆሰትድ፥ ኤንቲ ካታማፐ ካረ ከይን፥ ኑኒ ኤንታ ፓፃ ኦይክድ፥ ካታማ ገላና ያግድ ቆፕዶሶና” ያግድ ባ ሹማታስ ኦድስ።

¹³ ካዋ ሀላቃታፐ እሶይ፥ “ሀ ካታማን አትዳ አሳይ ካሰ ሀይቅዳ አሳ መላ ሀይቆፐ አተና። ሄሳ ግሾ፥ ሀንዳባ ኤራናዉ አነ አሳ ዶሮስ። አትዳ እቻሹ ፓራታራ አነ ኤንታ ሶረታ ሚፃ የዶስ” ያግስ።

¹⁴ ጉ አሳታነ ናምኡ ፓራ ጋረታ ዶርዶሶና። ካዎይ ኤንታ ሶረ ኦላንቾታ ጌዶ የድድ፥ “ብድ ሀንያባ በእተ” ያግድ ኪትስ።

¹⁵ አሳት ኤንታ ጌዶ ካልድ፥ ዮርዳኖሰ ሻፋ ጋካናዉ ብዶሶና። አራመ አሳት ባቃትሸ የግዳ ማኦይነ ኦላ ሚሸይ ኦግያን ኩምስ። ኪተትዳ አሳት ጉየ ስሚድ፥ ካዋስ ኦድዶሶና።

¹⁶ አሳይ ብድ፥ አራመታ ሚፃ ቦንቅዶሶና። ጎዳይ ግዳይሳዳ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ እስ ብራ ሳንትመን ባይዘትስ።

¹⁷ ካዎይ ባዉ ማትያ ሀላቃ ፐንገ ናገይሳታ ሀላቃ ኦድ ሹምስ፤ ሽን አሳይ እያ ፐንገን የስ። ካዎይ ኤልሳኮ ብዳ ዎደ፥ ኤልስ ሀ ሀላቃ ቦላ ኦድዳይሳዳ አደይ ሀይቅስ።

¹⁸ ፆሳ አስ ግድዳ ኤልስ ካሰ ካዋስ፥ “ዎንቶ ሀኖደ ሄ ክሎ ግራመ ግስተ ለይ ዎይኮ ኡሱፑን ክሎ ግራመ ባንግ ሳማረ ካታማን እስ ብራ ሳንትመን ባይዘታና” ያግስ።

¹⁹ ሄ ዎደ ሀላቃይ ኤልሳኮ፥ “ጎዳይ ሳሎ ማስኮተታ ዶያኮካ ሄስ ሀነና” ያግስ። ኤልስ፥ “ሄኮ፥ ኔኒ ሄሳ ነ አይፈን በአና፤ ሽን እያፐ ማካ” ያግድ ዛርስ።

²⁰ ኤልስ ኦድዳይሳዳ፥ ሄ አደይ፥ አሳይ ፐንገን የን ሀይቅስ።