2 Kawota 4 - ጌሻ ማፃፋ

አምኤ ዛይተ

¹ ናበታፐ እሱዋ ማችያ ኤልሳኮ ባዳ፥ “ነ አይለይ፥ ታ አዝናይ ሀይቅስ። እ ጎዳ ያይያ አስ ግደይሳ ኔኒ ኤራሳ። ሽን ሀእ እያ አጮ አዋይ ታ ናይታ ናምአ ባዉ አይለ ኦናዉ ኮዬስ” ያጋዳ እያዉ ኦዳሱ።

² ኤልስ፥ “ያትን ታኒ ነዉ አይ ኦ? ነ ሶን አይበ ደኤይ? አነ ታዉ ኦዳ” ያግስ። ማጫስያ፥ “ታዉ፥ ነ አይሌስ ጉ ፃሮን ደእያ ዛይተፐ አትሽን፥ ሀራባይ አይብካ ባዋ” ያጋሱ።

³ ኤልስ፥ “ባዳ ነ ሾሮታ ኡባፈ ካይሳ ኦቶታ ጋርፃ። ጋርፃሸ ጉ ጋርፆፋ።

⁴ ሄሳፈ ጉየ፥ ሶ ገላዳ፥ ነ ቦላነ ነ ናይታ ቦላ ካርያ ጎርዳ። ኦቶ ኡባን ዛይተ ትጋ፤ ዛይተይ ኩምዳ ኦቶታ እስ ባጋ አ” ያግስ።

⁵ ማጫስያ ባዳ፥ ካርያ ባ ቦላነ ባ ናይታ ቦላ ጎርዳሱ። ኤንቲ እዉ ኦቶታ ሺሽን፥ እያ ዛይትያ ትገ ኦይካሱ።

⁶ ኦቶ ኡባይ ኩምዳ ዎደ፥ ማጫስያ ባ ናኣኮ፥ “አነ ታዉ ሀራ ኦቶ ኤካዳ ያ” ያጋሱ። ሽን ናአይ ዛሪድ፥ “ሀር እስ ኦቶይካ ዴና” ያግስ። ሄሳፈ ጉየ፥ ዛይተይ ጎገይሳ አጋግስ።

⁷ ማጫስያ ስማ ባዳ ኤልሳስ ኦዳሱ። እ፥ “ባዳ ዛይትያ ባይዛዳ፥ ነ አጩዋ ቃንፃ። አትዳይሳ ኔንነ ነ ናይት ጎኤትድ ዳናዉ ዳንዳኤታ” ያግስ።

⁸ እስ ጋላስ ኤልስ እስ ዱረ ማጫስያ ደእያ ሱኔማ ካታማ ብን፥ ማጫስያ ሾባዳ፥ እያ ካ ሙዛሱ። ሄ ጋላሳፐ ዶምን፥ እ ያራ አያ ዎደ ኡባን ካ ማናዉ እ ሶ ገሌስ።

⁹ እያ ባ አዝናኮ፥ “ሄኮ፥ ኡባ ዎደ ኑ ማታራ አያ አደይ ፆሳ አስ ግደይሳ ታኒ ኤራይስ።

¹⁰ አነ እስ ጉ ክፍለ ፖቅያ ቦላ እያዉ ኬፆስ፤ እያ ግዶን አርስ፥ ኦይደ፥ ፃርጴዛነ ፆምፐ ዎስ። እ ኑኮ ይዳ ዎደ ኡባን ያ ገላናዉ ዳንዳኤስ” ያጋሱ።

¹¹ እስ ጋላስ ኤልስ ሱናማ ካታማ ይድ፥ ባ ክፍልያ ፑደ ከይድ ያን ሸምፕስ።

¹² ባ አይልያ ግያዛኮ፥ “ባዳ ማጫስዉ ፄጋ” ያግን፥ ግያዝ ፄግን፥ እያ ያዳ ኤልሳ ስንን ኤቃሱ።

¹³ ኤልስ ግያዛኮ፥ “ሀ ማጫስያ ሀ ኡባ ኑስ ኦሱ። ኑኒ ነዉ አይ ኦኖ? ኑኒ ብድ፥ ካዋ ዎይኮ ቶራ ሞጮና ኦድሳናባይ አይብ ደእያኮ እዮ ኦይቻ” ያግስ። ማጫስያ፥ “ታኒ ሀይሳን ታ አሳ ግዶን ደአይስ” ያጋሱ።

¹⁴ ኤልስ ግያዛ፥ “ያትን፥ ታኒ እዉ አይ ኦ?” ያግድ ኦይችስ። ግያዝ፥ “እዉ ናእ ባዋ፤ እ አዝናይ ጭምስ” ያግስ።

¹⁵ ኤልስ፥ “ማጫስዉ ፄጋ” ያግስ። ግያዝ እዮ ፄግስ፤ እያ ያዳ፥ ፐንገን ኤቃሱ።

¹⁶ ኤልስ፥ “ዎንቶ ላይ ሀኖደ ኔኒ አደ ናአ እድማና” ያግስ። ማጫስያ፥ “አካይ፥ ታ ጎዳዉ፥ ኔኒ ፆሳ አስ ግድክ፥ ታዉ ዎርዶቶፓ” ያጋሱ።

¹⁷ ሽን ማጫስያ ቃንታሱ፤ ኤልስ እዉ ኦድዳይሳዳ፥ ካልያ ላይ አደ ናአ የላሱ።

¹⁸ ናአይ ድጭስ፤ እስ ጋላስ ካ ጫክያ አሳታራ ደእያ ባ አዋኮ ብስ።

¹⁹ ባ አዋኮ፥ “ዎ ታና ሁጰይ ዎስ! ዎ ታና ሁጰይ ዎስ!” ያግስ። እያ አዋይ እስ አይልያ፥ “ቶካዳ አየኮ ኤፋ” ያግድ ኪትስ።

²⁰ አይለይ ናኣ ኤክድ፥ አየኮ ኤፍስ። ሴታ ጋላስ ግዳና ጋካናዉ፥ ናአይ ባ አየ ክኦን ኡትስ፤ ሄሳፈ ጉየ፥ ናአይ ሀይቅ አግስ።

²¹ ማጫስያ ናኣ ፑደ ኤፋዳ፥ ፆሳ አድያ አርሳን ዝንእሳሱ። ያታዳ እያ ቦላ ካረ ጎርዳዳ ባሱ።

²² ባ አዝና ፄጋዳ፥ “ታኒ ፆሳ አድያኮ ኤለ ባዳ ያና መላ፥ አይለታፐ እሱዋነ ሀረታፐ እሱዋ ታዉ የዳ” ያጋሱ።

²³ እ፥ “ሀች አጌና ፄሮ ጋላስ ዎይኮ ሳምባታ ግደና፤ ነና እያኮ ኤፈይ አይቤ?” ያግስ። እያ ዛራዳ፥ “አይብካ ባዋ” ያጋሱ።

²⁴ እያ ሀረ ጫናዳ፥ ባ አይልያ፥ “ሀርያ ላጋ! ታኒ ነዉ ኦዳና ጋካናዉ፥ ለፕ ኦዳ ላጎፋ” ያጋሱ።

²⁵ ማጫስያ ያፐ ደንዳዳ፥ ቃርመሎሳ ዙማን ደእያ ፆሳ አድያኮ ባሱ። ኤልስ ማጫስው ሃሆን በእድ፥ ባ አይልያ ግያዛ፥ “በአ፥ ሱናማን ደእያ ማጫስያ ያዉሱ።

²⁶ እዮ ሞካናዉ ዎፃ ባዳ፥ ‘ኔኒ ሳሮ? ነ አዝናይ ሳሮ? ነ ናአይ ሳሮ?’ ያጋዳ ኦይቻ” ያግስ። ማጫስያ፥ “ኑኒ ኡባይካ ሳሮ” ያጋሱ።

²⁷ ማጫስያ ዙማ ቦላ ደእያ ፆሳ አድያኮ ጋክዳ ዎደ፥ ሆካዳ እያ ቶሁዋ ኦይካሱ። ግያዝ ማጫስዉ ድጋናዉ ሺቅስ፤ ሽን ፆሳ አደይ፥ “አጋ! እያ ግታ መቶን ደአዉሱ፤ ሽን ጎዳይ ታፐ ሄሳ ገንስ። እ መቱዋ ታዉ ኦድቤና” ያግስ።

²⁸ ማጫስያ፥ “ታ ጎዳዉ፥ ኔኒ ታዉ ናአ እማና መላ ታኒ ነና ኦይቻድና? ታኒ ነና፥ ‘ታና ጮ ጭሞፋ ያጋብክና?’ ” ያጋሱ።

²⁹ ኤልስ ግያዛኮ፥ “ነ አዱሳ ማኡዋ ነ ሳቅያን ስርቃ፤ ታ ፃምአ ኤካዳ ኤለሳ። ኦገን ኦደራካ ጋሄትኮ፥ ሳሮፋ፤ ኦንካ ነና ሳሮትኮ፥ ዛራዳ ሳሮ ጎፓ። ታ ፃምአ ናኣ ሶምኡዋ ቦላ ዎ” ያግስ።

³⁰ ሽን ናኣ አይያ፥ “ደኦ ጎዳይ ኤርያ መላ፥ ነ ሸምፖይ ኤሮ! ታኒ ነና የጋዳ ቢከ” ያጋሱ። ኤልስ ደንድድ፥ እዮ ካልስ።

³¹ ግያዝ ኤንታፈ ስንትድ ብድ፥ ፃምአ ናኣ ሶምኡዋ ቦላ ዎስ። ሽን ግርስ ዎይኮ ሸምፖይ ባዋ። ያትን ግያዝ ኤልሳራ ጋሄታናዉ ስም ይድ፥ “ናአይ ባርክቤና” ያግድ ኦድስ።

³² ኤልስ ሶ ገልድ፥ ሄኮ፥ ናኣ አሀይ እያ አርሳን ዝንእዳይሳ በእስ።

³³ ባ ቦላነ ናኣ ቦላነ ካርያ ጎርድድ፥ ጎዳ ዎስስ።

³⁴ ናኣ አሀ ቦላ ከይድ፥ ባ ዶና እያ ዶናን፥ ባ አይፍያ እያ አይፍያን፥ ባ ኩሸታ እያ ኩሸታራ ጋድ ዝንእስ፤ ናኣ አሳተይ ሆእስ።

³⁵ ኤልስ ደንድድ፥ ሶ ግዶን ያ ሃ ስመረትስ። ናምአን ስሚድ፥ ናኣ ቦላ ዝንእስ፤ ናአይ ላፑን ቶሆ ሀሽዳፐ ጉየ ፄልስ።

³⁶ ኤልስ ግያዛ ፄግድ፥ “ሱናማ ማጫስዉ ፄጋ” ያግስ። ግያዝ እዮ ፄግን፥ እያ ይዳ ዎደ፥ ኤልስ፥ “ነ ናኣ ኤካ” ያግስ።

³⁷ ማጫስያ ኤልሳ ቶሁዋ ቦላ ኩንዳዳ፥ ሳአን ጉፋናሱ፤ ባ ናኣ ኤካዳ ካረ ከያሱ።

³⁸ ኤልስ ጋልጋላ ስሚድ ይዳ ዎደ፥ ቢታን ኮሽ ደኤስ። ናበታ ጩጋይ እያ ስንን ኡትድ ደእሽን፥ እ ባ አይልያ፥ “ዎጋ ኦቶ ታማ ቦላ ዎዳ፥ ናበታስ ዎፀ ካ” ያግስ።

³⁹ ኤንታፈ እሶይ ቦንጮ ማፅድ ኤሀናዉ ዎራ ብድ፥ ኤጨረ ሌሄ ዳንያባ ደምስ። ቶካናዉ ዳንዳኤይሳ ኬና ዳሮ ኤጨረ ሌሄ ኤክድ ይስ፤ እ አይበኮ ኤሮና አንጭድ፥ ኦቱዋን የግስ።

⁴⁰ አሳይ ማና መላ ዎፅያ ከስዶሶና፤ ኤንቲ ዎፅያ ቱሽ ባሪ በእድ፥ “ናብያዉ፥ ሀ ኦቱዋን ዎያባይ ደኤስ” ያግድ ዋስዶሶና። አሳይ ማናዉ ዳንዳእቦኮና።

⁴¹ ኤልስ፥ “አነ ታዉ ለ ኤክድ ዪተ” ያግስ። ሄ ልያ ኦቱዋን ቆልድ፥ “አሳይ ማናዳ ዎፅያ ትግተ” ያግስ። ሄሳፈ ጉየ፥ ኦቱዋን ኢታባይ በንትቤና።

⁴² ኮይሮ ጋክዳ ካፈ ኡከትዳ ላታሙ ባንጋ ዳቡዋ፥ ትያ ካራ እስፈ ባ ኦጎሩዋን የግድ፥ ፆሳ አድያስ ኤህያ እስ አደይ ባኣል-ሻልሻፔ ይስ። ኤልስ ባ አይልያ፥ “ማና መላ አሳስ አ” ያግስ።

⁴³ እያ አይለይ፥ “ታኒ ፄቱ አሳ ስን ሀይሳ ዋታዳ አ?” ያግድ ኦይችስ። ሽን ኤልስ፥ “ማና መላ አሳስ አ፤ ጎዳይ ‘ኤንቲ ምድ ካልን፥ ቲፈይ አታና’ ” ያግስ።

⁴⁴ ሄሳ ግሾ፥ አይለይ ኤንታ ስን አን፥ ኤንቲ ምዶሶና፤ ጎዳይ ግዳይሳዳ ቲፈይ አትስ።