1 Taarike 9 - ጌሻ ማፃፋ

የሩሳላመን ደእያ አሳ

¹ እስራኤለ አሳ ኡባይ ባ የለታን የለታን፥ እስራኤለ ካዎታ ማፃፋን ፃፈትድ ደኤስ። ይሁዳ አሳይ ጎዳስ አማነትቦና ግሾ ባብሎነ ቢታ ድኤትድ ብዶሶና።

² ኮይሮ ስሚድ ባንታ ቢታንነ ባንታ ካታማታን ኡትዳይ ጉ እስራኤለ አሳታ፥ ካህነታ፥ ሌወታነ ፆሳ ኬ ኦሳንቾታ።

³ ይሁዳፐ፥ ብንያመፐ፥ ኤፍሬማፐነ ምናሰፐ ጉ አሳት ይድ የሩሳላመን ደእዶሶና።

⁴ ይሁዳ ናኣ ፓረሳ ያራፐ ኡታይ የሩሳላመን ደኤይሳታስ ሀላቃ። ኡታይ አምሁዳ ናአ፤ አምሁድ ኦምራ ናአ፤ ኦምር እምራ ናአ፤ እምር ባና ናአ።

⁵ ይሁዳ ናኣ ሴላ ያራፐ አሳይነ እያ ናይት የሩሳላመን ደኤይሳታስ ሀላቃ።

⁶ ይሁዳ ናኣ ዛራ ያራፐ ይኡኤል የሩሳላመን ደኤይሳታስ ሀላቃ። ይሁዳ ኮቻ ታይቦይ ኡሱፑን ፄታነ ኡዱፉን ታማ።

⁷ ብንያመ ያራ ሀላቃት ሀይሳፈ ካልድ ፃፈትዳይሳታ። ማሱላማ ናኣ ሳሉ፥ ሆዳዋ ናኣ ማሱላማ፥ ሀሰናኡ ናኣ ሆዳዋ፥

⁸ ይሮሃማ ናኣ ይብናያ፥ ኦዛ ናኣ ኤላ፥ ምክራ ናኣ ኦዛ፥ ሳፋፃ ማሱላማ፥ ራኡላ ናኣ ሳፋፃ፥ ይብና ናኣ ራጉኤላ።

⁹ ብንያመ ኮቻ ታይቦይ ኡዱፉን ፄታነ እሻታማነ ኡሱፑና። ሀይሳቲ ኡባይ ባንታ ሶ አሳ ሀላቃታ።

¹⁰ የሩሳላመን ደእዳ ካህነት ሀይሳፈ ካልድ ፃፈትዳይሳታ። ኤንቲ ዮዳሀ፥ ዮራባ፥ ያክናነ

¹¹ ፆሳ ኬን አዋትያ አዛርያሳ። አዛርያስ ካልቀ ናአ፤ ካልቀይ ማሱላማ ናአ፤ ማሱላም ሳዶቃ ናአ፤ ሳዶቅ ማርዮታ ናአ፤ ማርዮት አክፆባ ናአ።

¹² ሀራት ቃስ ይሮሃማ ናኣ አዳያነ አድኤላ ናኣ ማእሰያ። ይሮሃም ፓስኮራ ናአ፤ ፓስኮር ማልክያ ናአ። አድኤል ያህዜራ ናአ፤ ያህዜር ማሱላማ ናአ፤ ማሱላም ማሽልሞታ ናአ፤ ማሽልሞት እመራ ናአ።

¹³ ባንታ ሶ አሳስ ሀላቃ ግድዳ ካህነታ ታይቦይ 1,760. ሀይሳቲ ፆሳ ኬን ኦናዉ ዳንዳእያ አሳታ።

¹⁴ የሩሳላመን ደእያ ሌወት ሀይሳፈ ካልድ ፃፈትዳይሳታ። ሀሹባ ናአይ ሻማየይ ማራራ ያራ። ሀሹብ አዝርቃማ ናአ፤ አዝርቃም ሀሳባያ ናአ።

¹⁵ ሀራት ቃስ ባቅባቃራ፥ ሄሬሳ፥ ጋላላነ ማታና። ማታን ምካ ናአ፤ ምክ ዝክራ ናአ፤ ዝክር አሳፋ ናአ።

¹⁶ ሀራት ቃስ ናፆፋታ ጉታን ኡትዳይ አብድዩነ ባራካ። አብድዩይ ሻማእያ ናአ፤ ሻማኤይ ጋላላ ናአ፤ ጋላል የዱቱና ናአ፤ ባራክ አሳ ናአ፤ አስ ኤልቃና ናአ።

¹⁷ ካዎ ፐንግያ ናገይሳት፥ ሳሉማ፥ አቁባ፥ ታልሞና፥ አህማናነ ኤንታ እሻታ፤ ሳሉም ኤንታ ሀላቃ።

¹⁸ ኤንቲ ዉሎሀ ባጋራ ደእያ፥ ካዎ ፐንግያ ናግዶሶና። ሀይሳፈ ካሰ ኤንቲ ሌወት ዱንካንዳ ጉታ ናጎሶና።

¹⁹ አብሳፋ ናኣ ናአይ ቆረ ናአይ ሳሉም ቆረ ያራ። ቆረ ያራይ ካሰ ጎዳ ዱንካንያ ናግዳይሳዳ ሳሉምነ ቆረ ኮቸ ግድዳ እያ ዳቦት ፆሳ ኬ ፐንግያ ናጎሶና።

²⁰ አላዛራ ናአይ ፕንሃስ ካሰ ቆረ ያራ ሀላቃ፤ ጎዳይ እያራ ደኤስ።

²¹ ማሱላማ ናአይ ዛካርያስ ዱንካንያ ግዶ ገልያ ፐንግያ ናጌስ።

²² ፐንግያ ናጋናዉ ዶረትዳይሳት ኩመ ናምኡ ፄታነ ታማነ ናምአ፤ ሄሳት ባንታ ጉታን ጉታን ታይበትድ ፃፈትዶሶና። ኤንታ ያራስ ሀ አዋተ እምዳይ ካዋ ዳዊታነ ናብያ ሳሜላ።

²³ ሄሳ ግሾ፥ ኤንትነ ኤንታ ናይት ፆሳ ኬ ፐንግያ ናጎሶና።

²⁴ ኦይዱ ባጋራ ዶሎሀን፥ ዉሎሀን፥ ፑደሀን ዱገሀን እስ እስ ፐንገይ ደኤስ፤ ሄ ፐንገታ ናገይሳት ደኦሶና።

²⁵ ሄ ጉታን ደእያ ኤንታ ዳቦት ላፑን ጋላሳን ጋላሳን ላመትድ፥ ናግድ ኤንታ ማዶሶና።

²⁶ ፐንግያ ናግያ ኦይዱ ሌወት ሀላቃ፤ ኤንቲ ፆሳ ኬ ክፍለታነ ክፍለታ ግዶን ደእያ ሚሸታ አዋተን አይሶሶና።

²⁷ ፆሳ ኬ ናገይነ ዎንታ ጉራ ካርያ ዶየይ ኤንታ ግድያ ግሾ ያን አቆሶና።

²⁸ ሌወታፐ ጉት ጎይኖ ዎደ ጎኤትያ ሚሸታ ናጎሶና፤ ሄ ሚሸታ ካረ ከሰይነ ሶ ገልሰይ ኤንታ።

²⁹ ኤንታፈ እሶት እሶት ፆሳ ኬን ጎኤትያ ሀራ ሚሸታ፥ ለ፥ ዎይነ ኡሹ፥ ዛይተ፥ እፃነነ ሳዎታ አዋተን አይሶሶና።

³⁰ ሽን ካህነታ ናይታፐ ባጋት ሳዉዋ ዋላኮሶና።

³¹ ቆረ ኮቻፈ ሳሉማ ባይራ ናአይ ማታታስ ያርሾ ኡይ ኡክስያ አዋተ ደኤስ።

³² ቃሃታ ያራ ግድያ ኤንታ ዳቦታፐ ባጋት ሳምባታን ሳምባታን ፃርጴዛ ቦላ ዎያ ኡይ ጊግስያ አዋተ ኤክዶሶና።

³³ ሌወ ኮቻፈ ጉ ሀላቃት ፆሳ ኬን የፀይሳታ። ቃማነ ጋላስ ኤንቲ ኦያ ግሾ ሀራ ኦሶ ኦና ፆሳ ኬ ድርሳ ግዶን ደእያ ኬታን ደኦሶና።

³⁴ ሀይሳቲ ኡባይ ሌወ ሶ አሳ ሀላቃታ፤ ኤንቲ የሩሳላመን ደእዶሶና።

ካዋ ሳኦላ ሼሽ

³⁵ ጋባኦና አዋይ ይኤል ጋባኦና ካታማን ደእስ፤ እያ ማቸ ሱንይ ማእኮ።

³⁶ እያ ናአይ ባይራይ አብዶና፤ እያ ናይት ሀራት ፁራያ፥ ቂሳ፥ ባኣላ፥ ኔራ፥ ናዳባ፥

³⁷ ጋዶራ፥ አህያ፥ ዛካርያሳነ ምክሎታ።

³⁸ ምክሎት ስምአ የልስ። ሀይሳቲ የሩሳላመን ደእያ ባንታ ዳቦታ ማታን ደእዶሶና።

³⁹ ኔር ቂሳ የልስ፤ ቂስ ሳኦላ የልስ። ሳኦል ዮናታና፥ ማልክሳ፥ አብናዳበነ ኤሽባኣላ የልስ።

⁴⁰ ዮናታና ናአይ ማርባኣላ የልስ፤ ማርባኣል ምክያሳ የልስ።

⁴¹ ምክያሳ ናይት ፕቶና፥ መለካ፥ ታረአነ አካዛ።

⁴² አካዝ ያእራ የልስ። ያእር አለሜታ፥ አዝማወታነ ዝምራ የልስ። ዝምር ሞፃ የልስ፤

⁴³ ሞፅ ብንአ የልስ፤ ብንእ ራፋያ የልስ፤ ራፋይ ኤልኣሳ የልስ፤ ኤልኣስ አፄላ የልስ።

⁴⁴ አፄላስ ኡሱፑን አደ ናይት ደኦሶና። ኤንታ ሱንይ አዝርቃማ፥ ቦኬራ፥ እስማኤላ፥ ሻኣራ፥ አብድዩነ ሀናና።