1 Taarike 27 - ጌሻ ማፃፋ

እስራኤለ ቶራ ሞጮናታ

¹ ባንታ ጩጋን ጩጋን ካዎተ አይስያ እስራኤለ ሶ አሳ ሀላቃት፥ ሻላቃትነ ማቶ ሀላቃት ሀይሳፈ ካልድ ፃፈትዳይሳታ። እስ እስ ጩጋን 24,000 አሳት ደኦሶና። እስ እስ ጩጋይ ላይን እስ አጌና ማራን ማራን ካዎተ ኦሶ ኦናዉ ከዬስ።

² ኮይሮ አጌናን ከያ ጩጋ ካለይ ዛብድኤላ ናኣ ያሾብኣማ፤ እያ ጩጋን 24,000 አስ ደኤስ።

³ ያሾብኣም ፓረሳ ኮቸ፤ እ ኮይሮ አጌናስ ቶራ ሞጮናታ።

⁴ ናምአን አጌናን ከይያ ጩጋ ካለይ አሆሀ አድያ ዶዳያ፤ እያ ጩጋን 24,000 አስ ደኤስ። ሄ ጩጋ ካለያ ናምአን ሀላቃይ ምክሎታ።

⁵ ሄን አጌናን ከይያ ጩጋ ካለይ ካህንያ ዮዳሄ ናኣ ባናያ፤ እያ ጩጋን 24,000 አስ ደኤስ።

⁶ ባናይ ሀስታሙ ኤረትዳ አሳታ ግዶን ምኖ አስ፤ ቃስ ሀስታማታ ሀላቃ። እያ በሳን እያ ናአይ አምዛባድ ሀላቃ ግድስ።

⁷ ኦይዳን አጌናን ከይያ ጩጋ ካለይ እዮኣባ እሻ አሳሄላ፤ እያ ጩጋን 24,000 አስ ደኤስ። እያ በሳን እያ ናአይ ዛባድ ሀላቃ ግድስ።

⁸ እቻሻን አጌናን ከይያ ጩጋ ካለይ ይስሃራ ያራፐ ሻምሁታ፤ እያ ጩጋን 24,000 አስ ደኤስ።

⁹ ኡሱፑን አጌናን ከይያ ጩጋ ካለይ ተቁሄ አድያ እስካ ናኣ እራ፤ እያ ጩጋን 24,000 አስ ደኤስ።

¹⁰ ላፑን አጌናን ከይያ ጩጋ ካለይ ኤፍሬማ ኮቸ ግድዳ ፕሎና አድያ ሰለሳ፤ እያ ጩጋን 24,000 አስ ደኤስ።

¹¹ ሆስፑን አጌናን ከይያ ጩጋ ካለይ ሁሻ አድያ ስባካያ፤ እያ ጩጋን 24,000 አስ ደኤስ። ስባካይ ይሁዳ ኮቸነ ዛራ ያራ።

¹² ኡዱፉን አጌናን ከይያ ጩጋ ካለይ ብንያመ ኮቸ ግድዳ አናቶተ አድያ አብኤዘራ፤ እያ ጩጋን 24,000 አስ ደኤስ።

¹³ ታማን አጌናን ከይያ ጩጋ ካለይ ናፆፋ አድያ ዛራ ያራ ግድዳ ማህራ፤ እያ ጩጋን 24,000 አስ ደኤስ።

¹⁴ ታማነ እስን አጌናን ከይያ ጩጋ ካለይ ኤፍሬማ ኮቸ ግድዳ ፕርአቶና አድያ ባናያ፤ እያ ጩጋን 24,000 አስ ደኤስ።

¹⁵ ታማነ ናምአን አጌናን ከይያ ጩጋ ካለይ ጎቶንያላ ያራፐ ግድዳ ናፆፋ ሄልዳያ፤ እያ ጩጋን 24,000 አስ ደኤስ።

እስራኤለ ሞርናታ

¹⁶ እስራኤለ ኮቻታ አይሳናዉ ሹመትዳይሳት ሀይሳፈ ካልድ ፃፈትዳይሳታ። ሮቤላ ኮቻ አይሰይ ዝክራ ናኣ አላዛራ። ስሞና ኮቻ አይሰይ ማእካ ናኣ ሳፋፃ።

¹⁷ ሌወ ኮቻ አይሰይ ቃሙኤላ ናኣ ሀሳባያ። አሮና ኮቻ አይሰይ ሳዶቃ።

¹⁸ ይሁዳ ኮቻ አይሰይ ዳዊታ እሻ ኤልሁ። ይሳኮራ ኮቻ አይሰይ ምካኤላ ናኣ ኦምራ።

¹⁹ ዛብሎና ኮቻ አይሰይ አብድዩ ናኣ ያሽማያ። ንፍታለመ ኮቻ አይሰይ አዝርኤላ ናኣ ያርሞታ።

²⁰ ኤፍሬማ ኮቻ አይሰይ አዛዛ ናኣ ሆሰአ። ምናሰ ኮቻፈ ባጋ አይሰይ ፓዳያ ናኣ እዩኤላ።

²¹ ጋላዳን ደእያ ምናሰ ኮቻፈ ባጋ አይሰይ ዛካርያሳ ናኣ እዶ። ብንያመ ኮቻ አይሰይ አበኔራ ናኣ የእስኤላ።

²² ዳነ ኮቻ አይሰይ ይሮሃማ ናኣ አዛርኤላ። ሀይሳቲ እስራኤለ ኮቻ አይሰይሳታ።

²³ ጎዳይ እስራኤለ አሳ ሳሎ ፆልንቶዳ ዳርሳና ግዳ ግሾ ዳዊቲ ላታሙ ላይነ እያፐ ጋርሳራ ደኤይሳታ ታይቦን ገልስቤና።

²⁴ ፃሩያ ናአይ እዮኣብ አሳ ታይቦ ዶምድ ዉርሶና አግስ። አሳ ታይብዳ ግሾ ጎዳይ እስራኤለ አሳ ቦላ ሀንቀትዳ ግሾ ኤንታ ታይቦይ ካዋ ዳዊታ ታርከ ማዝጋበን ፃፈትቤና።

ካዋ ቡቁራ አይስያ አሳታ

²⁵ ካዎ ቡቁራ ምንጅያ በሳ አዋተን አይስያ አሳ ሱንይ ሀይሳፈ ካልድ ፃፈትዳይሳታ። አድኤላ ናኣ አዝሞት ካዎ ኬ ቡቁራ አዋተን አይሴስ። ኦዝያና ናአይ ዮናታን ጋፃረን፥ ካታማንነ ጉታን ደእያ ካዎ ኬ ሚሸታ አዋተን አይሴስ።

²⁶ ካሉባ ናአይ እዝር ጎሻንቾታ አዋተን አይሴስ።

²⁷ ራማ አደይ ሳመእ ዎይነ ጋደታ አዋተን አይሴስ። ሳፋማ አደይ ዛብድ ዎይነ ኡሻ ምንጅያ ኬ አዋተን አይሴስ።

²⁸ ጋዳራ አደይ ባአል-ሀናን ዙማ ቦላ ደእያ ዛይተ ሻማሁዋነ ቦባ አዋተን አይሴስ። ዛይተ ዎያ ኬ አዋተን አይሰይ እዮኣሳ።

²⁹ ሳሮና ደንባን ሄመትያ መህያ አዋተን አይሰይ ሳሮና አድያ ሳፅራ። ዛንጋራን ሄመትያ መህያ አዋተን አይሰይ አድላያ ናኣ ሻፋፃ።

³⁰ ግማለታ አዋተን አይሰይ እስማኤላ አድያ ኡብሳ። ሀረታ አዋተን አይሰይ መሮኖታ አድያ የህዳያ።

³¹ ዶርሳታነ ዴሻታ አዋተን አይሰይ አጋራ አደይ ያዝዛ። ሀይሳቲ ኡባይ ዳዊታ ሻሉዋ ቦላ አዋተይሳታ።

³² ዳዊታ አዋ እሻይ፥ ፃፈይ ዮናታን አኬካነ ካዋ ዞርያ አስ። ሀክሞና ናአይ ይኤል ካዋ ናይታ ታማርሴስ።

³³ አክፆፈል ካዋ ዞረይሳ። አርካ አደይ ኩስ ካዋ ላገ።

³⁴ አክፆፈል ሀይቅን፥ እያ በሳን ባናያ ናአይ ዮዳሄይነ አብያታር ካዋ ዞርያ አስ ግድዶሶና፤ እዮኣብ ካዋ ቶራ ሞጮና።