1 Taarike 26 - ጌሻ ማፃፋ

ፆሳ ኬ ፐንገ ናገይሳታ

¹ ፆሳ ኬ ፐንግያ ናገይሳት ሀይሳፈ ካልድ ፃፈትዳይሳታ። ኮይሮይ ቆረ ኮቻፈ አሳፋ አደ ናይታፐ ቆረ ናአ ማሱላማ።

² ማሱላም ላፑን አደ ናይታ የልስ፤ ኤንቲ ባንታ የለታ ማራን ዛካርያሳ፥ ይድኤላ፥ ዮዞባታ፥ ያትንኤላ፥

³ ኤላማ፥ ይሆናነ ኤልሆና።

⁴ ፆሳይ ኦቤድ-ኤዶማ አንጅዳ ግሾ፥ እ ሆስፑን አደ ናይታ የልስ። ኤንቲ ባንታ የለታ ማራን ሻማያ፥ ዮዛባታ፥ እዮኣሳ፥ ሳካራ፥ ናትናኤላ፥

⁵ አምኤላ፥ ይሳኮራነ ፑላታ።

⁶ ኦቤድ-ኤዶማ ናአይ ሻማየይ ኡሱፑን አደ ናይታ የልስ፤ ኤንቲ ምኖ አስ ግድዳ ግሾ፥ ባንታ አዋ ሶ አሳስ ሀላቃ ግድዶሶና።

⁷ ሻማያ ናይት ኦትና፥ ራፋኤላ፥ ዮቤዳነ ኤልዛባዳ፤ ኤንታ እሻት ኤልሁይነ ሳማክ ቃራ አሳታ።

⁸ ሀይሳቲ ኡባይ ኦቤድ-ኤዶማ ኮቻታ፤ ኤንቲ፥ ኤንታ ናይታነ ኤንታ ዳቦት ኦሶስ ምኖ። ኦቤድ-ኤዶማ ኮቻት ኩመ ኡሱፑን ታማነ ናምአ።

⁹ ማሱላማስ ምኖ ናይትነ ምኖ ዳቦት ደኦሶና፤ ኤንቲ ኩመ ታማነ ሆስፑና።

¹⁰ ማራራ ያራፐ ሆሳ ጌተትያ አድያስ ኦይዱ አደ ናይት ደኦሶና። ሽምር ባይራ ናአ ግደና፥ ሽን እያ አዋይ እያ ሀላቃ ኦስ።

¹¹ እያ እሻት ካልቀ፥ ዛባላነ ዛካርያሳ። ሆሳ ናይትነ እያ ዳቦት ኩመ ታማነ ሄ።

¹² ፆሳ ኬ ፐንግያ ናገይሳት ባንታ ሶ አሳ ሀላቃታ ጩጋን ጩጋን ሻከትዶሶና። ሀራ ሌወታዳ ኤንታካ ፆሳ ኬ ኦሶይ ሻሆን ጋክስ።

¹³ እስ እስ ፐንግያ ናጋናዉ ባንታ ሶ አሳን አሳን ናአ ጭማ ጎና ሳማ የግዶሶና።

¹⁴ ዶሎሀ ፐንግያ ናጋናዉ ሳማይ ሳላማስ ከይስ። ሎኦ ዞረ ዞርያ እያ ናኣ ዛካርያሳ ፑደሀ ፐንግያ ናጋናዉ ሳም ከይስ።

¹⁵ ኦቤድ-ኤዶማስ ዱገሀ ፐንግያ ናጋናዉ ሳም ከይስ። እያ ናይታስ ቡቁራ ምንጅያ ኬ ናጋናዉ ሳም ከይስ።

¹⁶ ዉሎሀ ፐንግያነ ቆሞ ባጋራ ደእያ ሻለኮታ ፐንግያ ናጋናዉ ሳም ሱፍማስነ ሆሳስ ከይስ። ናጎይ ማራን ማራን ጋኬስ።

¹⁷ ጋላስ ጋላስ ዶሎሀ ባጋራ ኡሱፑን፥ ፑደሀ ባጋራ ኦይዳ፥ ዱገሀ ባጋራ ኦይዱ ሌወት ናጎሶና። ቃስ ቡቁራ ምንጅያ ኬ ናምኡ ናምኡ ሌወት ናጎሶና።

¹⁸ ዉሎሀ ባጋራ ዳባባኮ ኤፍያ ኦግያ ኦይዱ፥ ቃስ ዳባባ ናምኡ ሌወት ናጎሶና።

¹⁹ ህዛ ቆረስነ ማራራ ኮቻስ እመትዳ ፐንገ ናጎ ኦሶይ ሀይሳ።

ምንጃ ኬ ሹማታ

²⁰ አክያ ጌተትያ ሌወይ ፆሳ ኬን ደእያ ቡቁራነ ፆሳስ ዱማይ ዎዳ እሞታታ ናጋናዉ ሹመትስ።

²¹ ገድሶና ናኣ ላዳና ያራፐ ይኤል ዱማ ዱማ ሶ አሳስ አዋተስ።

²² ይኤላ ናይት ዘታማነ እያ እሻ እዩኤላ፤ ኤንቲ ፆሳ ኬን ደእያ ቡቁራ ናጋናዉ ሹመትዶሶና።

²³ አምራማ፥ ይስሃራ፥ ከብሮናነ ኡዝኤላ ያራታስ ኦሶይ ሻከትድ እመትስ።

²⁴ ሙሰ ናኣ ገድሶና ያራ ግድዳ ሳቡኤል ፆሳ ኬን ደእያ ቡቁራ ናገይሳታ ሀላቃታ ቦላ ሹመትስ።

²⁵ እ ገድሶና እሻ አላዛራ ባጋራ ሳሎሞታስ ዳቦ። አልአዛር ራሃብያ የልስ፤ ራሃብ የሻያ የልስ፤ የሻይ ዮራማ የልስ፤ ዮራም ዝክራ የልስ፤ ዝክር ሳሎምታ የልስ።

²⁶ ሳሎሞትነ እያ ዳቦት ካዎይ ዳዊቲ፥ እያ ሶ አሳ ሀላቃት፥ ሻላቃት፥ ማቶ ሀላቃትነ ቶራ ሞጮናታ ፆሳስ ዱማይዳ ሚሸ ኡባ ቦላ ሹመትዶሶና።

²⁷ ሀ አሳት ኦላን ድኤትድ ይዳ ሚሸታፐ ባጋ ፆሳ ኬን ዱማይድ ዎዶሶና።

²⁸ ቆንጨ በእያ ሳሜል፥ ቂሳ ናአይ ሳኦል፥ ኔራ ናአይ አበኔርነ ፃሩያ ናአይ እዮኣብ ካሰ ዱማይድ ዎዳ እሞታ ኡባ ሳሎሞትነ እያ ዳቦት ናጎሶና።

²⁹ ይስሃራ ያራታፐ ካናነይነ እያ ናይት ፆሳ ኬፈ ካረራ ደእያ ኦሶን እስራኤለ አሳ አይሳናዉነ ዳይናታናዉ ሹመትዶሶና።

³⁰ ከብሮና ያራታፐ ሀሻብነ እያ ዳቦት 1,700 ምኖ አሳት፥ ጎዳ ኦሱዋስነ ካዋ ኦሱዋስ ዮርዳኖሰፐ ዉሎሀ ባጋራ ደእያ እስራኤለ አሳ ቦላ ሹመትዶሶና።

³¹ ከብሮና ያራታ ማዝጋብያ ማራን ይርይ ኤንታ ሀላቃ። ዳዊቲ ካዎትዳ ኦይታማን ላይን ማዝጋበን ኮይን ኤንታ አሳ ግዶፈ ምኖ አሳት ጋላዳ ቢታን ያእዜራ ጌተትያ በሳን በንትዶሶና።

³² ኤንታ ሶ አሳስ ሀላቃ ግድዳ ይርያ ዳቦት ምኖት 2,700. ካዎይ ዳዊቲ ፆሳ ኦሱዋስነ ካዋ ኦሱዋስ ሮቤላ፥ ጋደነ ምናሰ ኮቻታፐ ባጋታ ቦላ ኤንታ ሹምስ።