1 Taarike 23 - ጌሻ ማፃፋ

ሌወታ

¹ ዳዊቲ ጭምዳ ዎደ ባ ናኣ ሶሎሞነ እስራኤለ ቦላ ካዎስ።

² ዳዊቲ እስራኤለ ካለይሳታ ኡባ፥ ካህነታነ ሌወታ እስፈ ሺሽስ።

³ ላይ ሀስታማነ እያፐ ቦላ ግድዳ ሌወት ታይበትድ ኩመ 38,000 ግድዶሶና።

⁴ ኤንታፈ ጎዳ ኬ አዋተን አይስያ 24,000 ሌወታ ካዎይ ዎስ፤ 6,000 ሌወታ ሀላቃታነ ፕርዳ ዳይናታ ኦድ ዎስ።

⁵ 4,000 ሌወታ ፐንገ ናገይሳታ ኦድ ዎስ። ቃስ ጎዳ ጋላታናዉ ዳዊቲ ጊግስዳ የ ሚሸን ጎዳ ጋላትያ 4,000 ሌወታ ዎስ።

⁶ ዳዊቲ ሌወ አደ ናይታ ገድሶና፥ ቃሃታነ ማራራ ኤንታ ያራን ያራን ሄ ጩጋን ሻክስ።

ገድሶናታ

⁷ ገድሶና አደ ናይት ላእዳነነ ሳምአ።

⁸ ላእዳነ ሄ አደ ናይት ይኤላ፥ ዘታማነ እዩኤላ።

⁹ ሳመአ ሄ አደ ናይት ሳሎሞታ፥ ሀዝኤላነ ሀራና፤ ሀይሳቲ ላእዳነ ያራ ሀላቃታ።

¹⁰ ሳማአ ኦይዱ አደ ናይት ያሃታ፥ ዚዛ፥ ኡሳነ ባርአ።

¹¹ ኡስ ባይራ፥ ዚዝ ካሎ። ሽን ኡሳስነ ባርአስ ናይት ዳሮና ግሾ ኤንቲ እስ ያራዳ ታይበትዶሶና።

ቃሃተታ

¹² ቃሃታ ኦይዱ አደ ናይት አንባራማ፥ ይስሃራ፥ ከብሮናነ ኡዝኤላ።

¹³ አንባራማ አደ ናይት አሮናነ ሙሰ። አሮንነ እያ ኮቻይ ኡባፈ ጌሽ ግዳና መላ ዱማትዶሶና። ኤንቲ ጎዳ ስንን እፃነ ጩይሳናዉ፥ ጎዳስ ኦናዉነ ጎዳ ሱንን አሳ አንጃናዉ መርናዉ ዱማትዶሶና።

¹⁴ ፆሳ አሰ ግድዳ ሙሰ ናይታ ሌወ ኮቻታራ ጋድ ታይብዶሶና።

¹⁵ ሙሰ ናይት ገድሶና አላዛራ።

¹⁶ ገድሶና ናይታ ግዶፈ ሀላቃይ ሳቡኤላ።

¹⁷ አላዛራ ናአይ ራሃባ። አላዛራስ ሀራ ናእ ባዋ፤ ሽን ራሃባስ ናይት ዳሮ።

¹⁸ ይስሃራ ናይታ ሀላቃይ ሳሎምታ።

¹⁹ ከብሮና ናአይ ባይራይ ይርያ፤ ካሎይ አማረ፤ ሄንይ ያሀዝኤላ፤ ኦይዳንይ ያቅምኣማ።

²⁰ ኡዝኤላ ባይራ ናአይ ምክያሳ፤ ካሎይ ይሽያ።

ማራራታ

²¹ ማራራ ናይት ማህላነ ሙሳ። ማህላ ናይት አላዛራነ ቂሳ።

²² አላዛር ማጫ ናአፐ አትሽን፥ አደ ናአ የሎና ሀይቅስ። ሄሳ ግሾ፥ ኤንታ አዋ እሻ ቂሳ ናይት ኤንታ ማችዶሶና።

²³ ሙሳ ሄ ናይት ማህላ፥ ኤደራነ ይረሞታ።

²⁴ ሌወ የለታን ባንታ ኮቻንነ ሶ አሳን ባንታ ሱንን ማዝጋበትዳ ሌወ ኮቻት ሀይሳታ። ላይ ላታማነ እያፐ ቦላ ግድዳ ሌወ ኮቻት ኡባይ ጎዳ ፆሳ ኬን ኦዶሶና።

²⁵ ዳዊቲ፥ “ጎዳይ፥ እስራኤለ ፆሳይ ባ አሳ ሸምፕስስ። ጎዳይ የሩሳላመን መርናዉ ዳና።

²⁶ ሌወት ዱንካንያነ እያ ግዶን ጎኤትያ ሚሸታ ህዛፐ ጉየ ቶካናዉ በሰና” ያግስ።

²⁷ ዳዊቲ ዉርሰ ኪታን፥ ላይ ላታማነ እያፐ ቦላ ግድዳ ሌወት ታይበትዶሶና።

²⁸ ኤንቲ ጎዳ ፆሳ ኬን ኦያ አሮና ኮቻታ ማዶሶና። ጎዳ ፆሳ ኬን ካረራነ ሶራ ኦሶና፤ ጌሻ ሚሸ ኡባ ቱኖና መላ ናጎሶና።

²⁹ ኤንቲ ፆሳ ስንን ዎያ ኡይ፥ ካ ያርሾስ ሺሽያ ልያ፥ እርሾይ ባይና ኡይነ ዛይተራ ሙኑቀትያ ልያ አዋተን አይሶሶና፤ ፆሳ ኬን ማከትያባነ ልከያባ ኡባ አዋተን ፄሎሶና።

³⁰ ቃስ ኤንቲ ኡባ ጋላስ ዎንታነ ኦማርስ ጎዳ ጋላታናዉነ ሳባናዉ ኤቆሶና።

³¹ ሳምባታ ጋላስ፥ አጌና ፄሮን፥ ዎጋይ ኪትያ ሀራ ባኣለ ጋላሳይ ጋክያ ዎደ ጎዳስ ፁሳ ያርሾ ያርሾሶና። ኤንታዉ እመትዳ ታይቡዋዳነ ኪታዳ ኡባ ዎደ ጎዳ ስንን ኦሶና።

³² ዱንካንያነ ጎዳ ፆሳ ኬ ናጋና መላነ ባንታ እሻ ግድዳ፥ አሮና አደ ናይታ፥ ማዳና መላ አዋተ ሌወታስ እመትስ።